Kısır yasıybız

Kısır waq bulgurdan yasala

Kısır yasıybız

Boday häm bodaydan yasalğan êşlänmälär törek aş-sularında yış qullanıla. Anadolu cirläreneň häm geografiya şartlarınıň boday citeşterügä uňdırışlı buluı belän anlatıla bu wazğiyät’. Töreklärneň mädäniyät tarixında boday aşlıq qına tügel, ä şul uq waqıtta mullıq häm bäräkät simvolıdır. Tradiŝion törek sänğatendä boday räsemen yış kürep bula. Mäsälän, kelämnär, tabaqlar yäisä ağaçtan yasalğan äyberlär östendä.

 

Boday sındırılıp, waqlanğaç bulgur payda bula. Ul da törek aş-sularınıň töp rizıqlarınnan berse bulıp tora. Bulgur yasar öçen bodaynı başta yualar, soňınnan kipterälär. Annarı qabığın çistartıp, tegermännärdä törle zurlıqqa waqlıylar. Zur kisäkläre döğe kebek qullanıla, waqları salatlarda, kotlet häm dolma yasağanda. Bügenge tapşıruıbızda sezgä waq bulgurdan yasaluçı salatqa oxşaş rıziq yasarğa öyräterbez. İseme kısır bula.

 

Kısır öçen tübändäge rizıqlar kiräk:

2 stakan waq bulgur

2 stakan qaynar su

1 aş qaşığı tomat pastası

1 aş qaşığı borıç pastası (taba almasağız tomat pastası 2 aş qaşığı bulsın)
3-4 aş qaşığı zäytün mayı

1 pomidor

Yäşel suğan

1 baş suğan

Petruşka

Bötnek

1 limonnıň suı

1 çäy qaşığı qaraborıç

1 çäy qaşığı toz

9-10 salat yafrağı


İň êlek kiň sawıtqa quyılğan bulgur östenä qaynar su salabız häm östen yababız. Bulgur yomşarğanğa qadär 15-20 minut kötäbez. Yomşarğan häm suı qalmağan bulgurnı yaxşılap bolğatabız. Şunda uq waq turalğan tomat häm borıç pastasın, zäytün mayın häm limon suın quşıp, bolğatabız. Turalğan suğannarnı, waq turalğan pomidor, petruşka häm bötnekne dä salabız. Toz häm qaraborıç quşabız. Barısın da yaxşılap bolğatabız.

Salat yafraqları quyılğan tälinkälärgä salıp çığabız.

Aşlarığız tämle bulsın!



Bäyläneşle xäbärlär