Törkiyäneñ ikençe astronavtı oçarğa äzer

Tuva Cihangir Atasävär jurnalistlarğa nilär söyläde?

2150040
Törkiyäneñ ikençe astronavtı oçarğa äzer

Törkiyäneñ barı berniçä könnän ğalämgä ikençe astronavtın cibäräçägen beläsezme? Törkiyä Milli ğaläm programması öçen yaña tarixi mizgelgä qadär törek astronavt Tuva Cihangir Atasävär belän oçraşu mömkinlege buldı. Atasävär "Virgin Galaktik" firmasınıñ AQŞnıñ N'yu-Mexiko ştatındağı "Spaceport" ob'yektınnan bulaçaq kütärelügä äzerlänä.

Tuva Cihangir Atasävär - törek astronavtı:

- Törkiyäneñ ikençe keşele ğaläm yulçılığın tormışqa aşıru zur märtäbä häm östenlek. Wazıyfamnıñ berniçä könnän başlanuı säbäple bik zur dulqınlanu kiçeräm. Bu orbita astı tikşerenü oçışında "VSS Unity" dip ataluçı ğaläm korabında bulaçaqmın. Bu oçışnıñ unikal' üzençälege bar. "Eve" digän êtüçe oçqıç belän quzğalıp kitäçäkbez. Ul bezne 13700 metr biyeklekkä kütäräçäk. "Eve", kiräkle şartlar täêmin itelgännän soñ, "VSS Unity" ğaläm korabınnan ayırılaçaq. Şunnan soñ "VSS Unity"nıñ gibrid raketa motorı qabınaçaq. Bez yuğarığa taba xäräkät itäçäkbez häm 1 minuttan az waqıt êçendä säğatenä 3700 çaqrım tizlekkä citäçäkbez. Tawış tizlegennän 3 tapqır artıq bulğan tizlekkä bik dinamik häm kisäk ireşäbez. Motor tuqtatılğannan soñ mikrogravitaśiya şartlarına keräbez. "Galaktik -07" missiyäse qısalarındağı oçış waqıtında 7 törle täcribä başqarılaçaq. Öçese minem östemdä bulğan törle cihazlar belän yasalaçaq. Alarnı mikrogravitaśiyagä kergäç êşläyäçäkmen. Qalğan 4se keşe fiziologiyäse täcribäläre bulaçaq. Härber tikşerenüçe bu ğaläm yulçılığınıñ üz tarmağındağı temalarğa täêsiren qarayaçaq.

Törkiyä ğaläm agentlığı berniçä yıl êlek Milli ğaläm programması tözede. Häm anda kiläse 10 yıl êçendä başqarırğa telägän 10 törle maqsat bilgelände. Tulayım alğanda, törek astronavtın citeşterü häm fänni missiyä - şul maqsatlar êçendä. Täwge törek astronavtı uzğan ğıynvar ayında ğalämgä cibärelde. Xalıqara ğaläm stanśiyäsendä 13 törle täcribä uzdırıldı Bu Törkiyä ğaläm agentlığı, TÜBİTAK häm ğomumän Törkiyädäge ğaläm industriyäse öçen zur uñış häm öyränü prośessı buldı. Şulay itep, Törkiyä yasağan berençe adımda, täwge missiyädä ük zur mäğ'lümatqa iyä buldı. Kiläse berniçä yıl êçendä ğaläm texnologiyäläre êşçänlekläre öçen ildä yaña texnologiyä töbäkläre tözeläçäk. Täwge tapqır Ayğa menü küzdä totıla. Bu êtaptan soñ Ay missiyäsen sikerü taqtası bularaq qullanıp tağın da yıraqqa kitü plannarı bar. Ayıruça, barısınnan da ähämiyätlese, maqsat - planetabızğa fayda kiterü öçen yaña texnologiyälär häm yaña çişeleşlär tabu.



Bäyläneşle xäbärlär