Türkiyädäge cirteträwdän zıyan kürüçelär öçen konteyner şähärçeklär

Universitet şähärçege êçendä urnaşqan şuşı aq tartmalar yözlärçä ğailä öçen öy wazıyfasın üti.

Hawadağı tuzan tığız, ömetlär isä yuğarı.

Cirteträwdän isän qalğan ğailälär töbäkkä kilergä däwam itkän bulsa êşçelär tağın da kübräk konteyner berämlegen tiz itep äzerlärgä tırışa.

Türkiyä meñlägän cirteträwdän zıyan kürüçegä çağıştırmaça komfort täq’dim itä alu öçen konteyner şähärçeklär tözi başladı.

Muttalip Ärdoğan, Kahramanmaraş, Türkiyä:

“Räsmilärneñ prioritetı cirteträwdän zıyan kürüçelärne urnaştıru maqsatınnan çığıp tiz itep konteyner şähärçeklär tözü bulsa da waqıtlıça biredä yäşäwçelärgä mömkin bulğança yaxşı yäşäw forsatın täq’dim itä alu öçen törle sośial’ xezmätlär dä uylanılğan.”

Osman Varol, Ağrı gubernatorı:

“Konteyner şähärçeklärebezdä törle sośial’ qorılmalar bar. Balalar törle kurslarğa bara alaçaq urınnar, sälamätlek saqlaw qorılmaları, küp sanda psixologik yärdäm berämlege häm böten ministrlıqlarıbıznıñ bäyläneşle bülekläre öçen ayırılıp quyılğan mäydannar bar. Başqa törle äytsäk, watandaşlarıbızğa normal’ tormışlarında iyä bulğan forsatlarnı çikläwle räweştä bulsa da täq’dim itärgä tırışabız.”

Kahramanmaraşta räsmilär häm yärdäm xezmätläre berämlekläre cirteträwdän zıyan kürüçelärne çatırlardan bu räweşle yaxşı äzerlängän mäydannarğa küçerä alu öçen köne buyı êşli. Cirteträwdän zıyan kürüçelärgä şuşı awır waqıtta beraz ciñellek täêmin itü öçen marketlar, kibetlär, azıq-tölek çatırları häm törle xezmätlär täq’dim itelgän.

Haticä Usanmaz, Türkiyä Diyanät êşläre räislege:

“Balalarıbızğa travmaların beterä alu öçen matur moxit äzerlädek. Biredä balalarıbız belän uyınnar uynıybız, alar belän cırlar häm mönäcätlär cırlıybız. Bergä pazl yasıybız. Sport belän dä şöğıl’länäbez. Balalarıbız biredä bik bäxetle.”

“Bez barbi qurçaqları belän uynıybız. Alar şundıy matur. Bezgä monda bik küñelle. Bezneñ küñelebezne açalar. Barısına da bik zur räxmät”

Mäxmät häm ğailäse cirteträwdän soñ berençe könnärdä çatırda qalğannar.

Xäzer isä şuşı konteyner şähärçektä yäşilär häm torışlarınnan qanäğät buluların äytälär.

Mäxmät Yutaş, cirteträwdän zıyan kürüçe:

“Här mömkinlek bar. Balalar öçen bulsın, bezneñ öçen bulsın. Mäsälän, minem öçen mäçet bar. Balalar öçen uyın mäydançığı bar. Annan soñ xanımnar öçen mäçet bar. Tegü çigü kursı bar. Böten närsä bar. Rizıqlarıbız da bik yaxşı. Telägän çaqta kiyım-salım alırğa bula. Annan soñ market bar. Işanığız, min öydä bu qadär räxät tügel idem. Samimi äytäm. Cirteträw buldı, bik qayğırdıq. Ämma min şäxsän üzem bolay da öydä räxät tügel idem”

Mäxmät äfände, biredä qalu öçen niçek röxsät aluın sorağaç, ê-däwlät (gosusluği) aşa möräcäğät itüen häm annan soñ räsmilärneñ üzenä şaltıratuın añlata.

Mäxmät Yutaş, cirteträwdän zıyan kürüçe

“Räsmilär minem ê-däwlät möräcäğätemne kürgännär, soñınnan miña şaltırattılar. Ber könnän soñ Qaracasu mäxälläsendäge şuşı konteyner şähärçektä oçraştıq. Açqıçımnı birdelär, min dä barıp balalarımnı alıp kildem."

Mäxmät äfände töp ixtıyaclarınıñ şuşı waqıtlı konteyner şähärçektä qanäğätländerelüen beldersä dä başqa ğailälär kebek anıñ da xıyalı ber könne tormışların qabat torğıza alaçaq daimi öygä küçä alu.

Muttalip Ärdoğan, TRT World, Kahramanmaraş