Tatarstan xäbärläre 25/2024

Qazanda BRİKS uyınnarı uza

12 nçe iyün’dä Tatarstan başqalası Qazanda BRİKS illäre uyınnarı räsmi räweştä start aldı. Aar 23 nçe iyün’gä qadär däwam itäçäk. Turnir programması 27 sport disśiplinasın üz êçenä ala. 93 ildän kilgän 4 meñ 700 dän artıq sportçı ber-berse belän köç sınaşa. 387 komplekt medal’ uynatıla. Uyınnarnı uzdıru öçen Qazannıñ 16 sport ob’yektı cälep itelä.

2023 nçe yılda Tatarstanğa turistlar ağımı 4,2 million keşegä qadär artqan

Tatarstanda räsmi turistlar ağımı 2023 nçe yıl näticäläre buyınça 4 million 200 meñ keşe täşkil itkän. 2022 nçe yıl belän çağıştırğanda respublikağa kilüçe turistlar sanı 7,6%qa artqan. Bu kürsätkeç belän Tatarstan Rusiya Federaśiyäse töbäkläre arasına altıncı urında. Tatarstannı uzıp kitkän lider töbäklär bişlegenä Mäskäw (20,1 million turist), Krasnodar krayı (18,1 million), Mäskäw ölkäse (16,6 million), Sankt-Peterburg (11,7 million) häm Leningrad ölkäse (8,7 million) kergän.

Karadäniz Ärdoğannı Qazan yanında üze tözetkän mäçetneñ räsmi açılışına kötä

“Rubin-2” komandasınıñ baş trenerı häm “Rubin” sostavında ike tapqır Rusiya çempionı Gökdäniz Karadäniz Törkiyä ilbaşı Räcäp Tayyip Ärdoğannı Qazan yanında üze tözetkän mäçetneñ räsmi açılışında kürergä teli.

“Mäçet tözegänçe min Qazanda bik ozaq futbol uynadım häm monda yäşädem. Mäçet tözelgännän soñ Qazan belän tağın da yaqınaydım. Bez älbättä mäçetne Törkiyä ilbaşı Räcäp Tayyip Ärdoğan açuın telädek, şuña kürä räsmi açılış äle bulmadı, ämma mäçet inde täwlek buyı êşli “,- dip belderä törek futbolçısı.

Futbolçı süzlärençä, älegä Törkiyä liderı Rusiyägä säfäre waqıtında mäçetne räsmi  räweştä açsın öçen söyläşülär alıp barıla.

Tatarstannıñ Biyektaw muniśipal’ rayonı Kalinino awılında Gökdäniz Karadäniz iğanäsenä mäçet tözeleşe 2016 nçı yılda başlandı. Ul 2020 nçe yılnıñ oktyabrendä açıldı.

Söyembikä manarası tözekländereläçäk

Qazanda töp xalıqara çaralar - BRİKS uyınnarı häm sammit tögällängännän soñ Söyembikä manarasın tözekländeräçäklär. Başta fasad öleşe, gidroizolyaśiya êşläre başqarılaçaq. Annarı ikençe êtapqa - konstruktiv öleşkä küçäçäklär.

Restavraśiya proyektın êşläwgä 7 million 500 meñ sum sarıf iteläçäk. Söyembikä manarasın yañartunıñ küpmegä töşäçäge bilgele tügel.

Qazanda törek aşların äzerläw üzençälekläre belän tanıştırdılar

Tatarstanda törek mädäniyäte könnäre qısalarında “Tuğan awılım” restoran kompleksında aş-su ostaları törek rizıqların peşerü üzençälekläre belän tanıştırdı.

Törkiyäneñ Qazandağı baş konsulı Uğur Yılmaz barlıq kilgän qunaqlarnı Qorban Ğayete bäyräme belän qotladı. “Bäyrämnär bergäläp cıyılır öçen ber matur säbäp bulıp tora. Yıl sayın Törkiyä häm Rusiya, Törkiyä häm Tatarstan arasındağı êlemtälär nığıy bara. Mönäsäbätlärneñ üseşenä qunaqçıllıq tradiśiyäse dä yoğıntı yasıy. Mädäni êlemtälärne üsterü öçen bez Tatarstanda törek mädäniyäte könnnären uzdırabız”,- dip bilgeläp ütte baş konsul.

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.