Tatarstan xäbärläre 39/2023

Ästerxanda Bötenrusiyä awıl Sabantuyı uzdı

27nçe mayda Ästerxannıñ Cämäle awılında 13nçe Bötenrusiyä awıl Sabantuyı uzdı. Anda Tatarstannan da bik küp qunaqlar, sänğat’çelär qatnaştı. Şulay uq, respublika citäkçese Röstäm Miñnexanov ta Sabantuyda bulıp üzeneñ qotlawların citkerde. “Bu Rusiyädä bıyılğı berençe Sabantuy, Tatarstanda da äle Sabantuylar oyıştırılmadı. Älege bäyrämgä kilgän delegaśiyälärgä, Ästerxan xalqına zur räxmätemne citkeräm,”-dide ul.

Tatarstan räise Röstäm Miñnexanov Sabantuyında Ästerxan ölkäse tatarlarınıñ milli-mädäni möxtäriyätenä mikroavtobus büläk itte. Şulay uq, Ästerxan tatar cämäğat’çelegenä däwlät büläkläre tapşırıldı.

“Rubin” - çempion

Qazannıñ “Rubin” futbol komandası çempionnar matçında Maxaçkalanıñ “Dinamo”sın ciñde häm 2012nçe yıldan soñ berençe tapqır Tatarstan başqalasına kubok büläk itte. Tatarstan räise Röstäm Miñnexanov çempionnarğa üzeneñ täbriklären citkerde. “Komandanı häm canatarlarnı klubnıñ çempion buluı häm Rusiyä Prem’yer-ligasına äylänep qaytuı belän qotlıym” dip yazdı ul üzeneñ Telegram-kanalında häm uyınçılarnıñ fotosın urtaqlaştı.

Flyera Safiullinanıñ tuuına 85 yıl

Qazanda fän ähele, tatar ğalimäse Flyera Safiullinanıñ tuuına 85 yıl tuluğa bağışlanğan çaralar oyıştırıldı. Şularnıñ berse – KFUnıñ Ğabdulla Tuqay isemendäge Milli mädäniyät häm mäğarif yuğarı mäktäbendä uzğan kiçä ide. Anda professornıñ xezmättäşläre, şäkertläre çığış yasadı, märxümäneñ mirasın barladılar, xatirälär belän urtaqlaştılar. Monnan tış, tatar ğalimnäre küpsanlı däresleklär häm süzleklär avtorı Flyera Safiullinanıñ qaberen ziyärät itte. Bu uñaydan Qazan federal’ universitetınıñ Qayum Nasıyri institutı direktorı, ğomumi tel beleme häm tyurkologiyä kafedrası professorı Älfiyä Yosıpova bolay dip söyli: “Flyera Sadriyevnanıñ qabere İske tatar ziratında urnaşqan. Yıl sayın 24nçe mayda, Flyera apanıñ tuğan könendä bez ostazıbıznıñ qaberenä barabız. Qaberen çistartabız, çäçäklär salabız, ruxına doğa qılabız. Ul xörmätkä layıq şäxes, andıy ostazıbıznı onıtırğa yaramıy”.

Qazanda Salix Säydäşevnı iskä alalar

Bügen Qazanda Salix Säydäşev häykäle yanındağı mäydanda mäşhür tatar kompozitorınıñ şäxese häm icatına bağışlanğan 9nçı “Xalıq mäxäbbäte laureatı” muzıkal’ sänğat’ bäyräme bula. Anda Tatarstan başqalasınıñ törle muzıkal’ kollektivları häm başqaruçıları çığış yasıy. Alar arasında Kamal teatrı orkestrı häm artistları, “Qazan nurı” törkeme häm Qazan şähär filarmoniyäse solistları, “Fantaziyä” xatın-qızlar djaz orkestrı häm “Säydäş” mädäniyät üzäge sänğat’çeläre bar.

Proyektnıñ avtorı – Rusiyäneñ xalıq artistı, Tatarstannıñ atqazanğan sänğat’ êşleklese, professor Lima Kustabayeva.     

Tapşırunı äzerlägändä Tatarstan Räiseneñ matbuğat xezmäte, “Tatar-inform” xäbär agentlığı yazmaları qullanıldı.