Tatarstan xäbärläre 33/2023

XI Respublikaküläm iftar uzdı

15 nçe aprel’dä “QazanÊkspo” kürgäzmä üzägendä XI Respublikaküläm iftar uzdı. İftarğa kilüçelärne Tatarstan möftiyeneñ berençe urınbasarı İlfar xäzrät Xäsänov sälamläde. Annan Yäşel Üzän imam-möxtäsibe Ğabdelxämid xäzrät Zinnätullin Qor’än süzlären yañğırattı.

Namaz zalında Tatarstannıñ xalıq artistı, Bua tatar däwlät teatrınıñ sänğat’ citäkçese Rail Sadriyev başqaruında “Därviş” monospektakle täq’dim itelde.

 Kilgän qunaqlar öçen xäläl market oyıştırıldı. Anda bizänü äyberläre, ballı rizıqlar, qul êşlänmäläre häm başqalar satıldı.

 Cämäğat’ möfti Kamil xäzrät Samiğullin belän namazğa bastı. İftarda 11 meñ keşe qatnaştı.

Tatarstan möftiye Kamil xäzrät Sämiğullin Respublikaküläm iftarda qatnaşqan, oyıştıruda yärdäm itkän här keşegä räxmät süzlären äytte. Ul Ramazan ayına qağılışlı xädislärne dä äytep uzdı.

 “Ramazan ayın döres ütkärergä kiräk. Päyğambärebez (s.g.v) xädisendä äytelgänçä, Ramazannı döres ütkärsäñ, böten yıl bäräkätle, mul bulaçaq. 21 nçe aprel’dä yaña tuğan balalar kebek çip-çista kileş oçraşırğa nasıyp busın. Allahınıñ rizalığına ömelänäbez”,- dide ul.

Tatarstan xalqınıñ 94%ı êkologik akśiyälärdä qatnaşırğa äzer

Tatarstan xalqınıñ 94%ı êkologik akśiyälärdä qatnaşırğa äzer. Bu xaqta Tatarstan êkologiya häm tabiğat’ resursları ministrı Aleksandr Şadrikov belderä. “Soñğı 5 yılda êkologik çaralarda qatnaşuçılar sanı 1 million 200 meñgä citte. Bu här öçençe tatarstanlı qatnaşa digän sz. Bez ütkärgän soraştıru kürsätkänçä, Tatarstan xalqınıñ 94%ı êkologik akśiyälärdä qatnaşırğa äzer”, - di ministr.

Ul xalıqnı ağaç utırtu häm sanitar-êkologik ikeaylıqta qatnaşırğa öndäde.

Berläşkän Ğaräp Ämirleklärendä Sabantuy bula

29 nçı aprel’dä Bötendön’ya tatar kongressı Berläşkän Ğaräp Ämirleklärendä yäşäwçe tatar aktivistları belän berlektä Sabantuy oyıştıra. Milli bäyräm Dubaynıñ “Safa” parkında 15.00 säğat’tä başlana. Sabantuyda Qazan artistları qatnaşa.

Bäyrämdä köräş, qaşıqqa yomırqa salıp yögerü, ger kütärü, çülmäk watu kebek milli uyınnar ütkäreläçäk.

Qazanda Êduard Xäyrullinnı soñğı yulğa ozattılar

Kiçä (17 nçe aprel’dä) Tatarstan başqalası Qazanda “Tatmedia” respublika matbuğat häm massaküläm kommunikaśiyälär agentlığı citäkçese urınbasarı Êduard Xäyrullin belän xuşlaşu märasime buldı. Çara “Säydäş” mädäni üzäge mäydançığında uzdı.

Êduard Xäyrullin belän xuşlaşırğa häm çäçäklär salırğa yözlägän keşe, şul isäptän Däwlät Duması xalıq ışanıçlıları, respublika citäkçelege wäkilläre, xezmättäşläre häm anıñ jurnalistlıq talantın yaratuçılar kilde.

Êduard Xäyrullin 14 nçe aprel’ kiçendä 54 yäşendä kinät wafat bula. Tatarstan Räise Röstäm Miñnexanov häm Apparat citäkçese Äsğat’ Säfärov tanılğan jurnalistnıñ äniseneñ tirän yuğaltu qayğısın urtaqlaştı.

Qazanda 19 nçı ğasırda tözelgän İske Taş mäçeten restavraśiyälilär

Qazanda 19 nçı ğasırda tözelgän häm federal’ däräcädäge mädäni miras ob’yektı bulğan Yaña Bistä mäçeten restavraśiyälilär. Êş “Tarixi istälek” federal’ proyektı nigezendä alıp barıla. Mäcit Ğafuri uramında 19 ğasır binasın restavraśiyäläwdän tış, ayırım mädräsä häm xäläl kafesı bulğan tulı ber kompleks tözü planlaştırıla. Fasad êşlären qışqa qadär tämamlawlarğa, restavraśiya häm êçke êşlären 2024 nçe yılnıñ cäyenä tögällärgä cıyınalar.

İlham Şakirov isemendäge Respublika premiyäsen filarmoniyädä tapşraçaqlar

31 nçe mayda Ğabdulla Tuqay isemendäge Tatar däwlät filarmoniyäsendä İlham Şakirov isemendäge Respublika premiyäsen tapşıru tantanası uzaçaq.

Älege premiya çırçı-başqaruçılarğa milli cır sänğate ölkäsendä yuğarı ictimaği tanılu alğan iñ kürenekle qazanışları, başqaru ostalığı häm tatar cır mädäniyäteneñ xalıqçan tradiśiyälären saqlap qalu, professional’ cır häm vokal’ icatnı üsterü buyınça näticäle êşçänlege öçen birelä.

İlham Şakirov isemendäge Respublika premiyäse laureatları:

“Vokal” nominaśiyäsendä ( xatın - qızlar) – Tatarstannıñ xalıq artistkası Flyura Söläymanova;

“Vokal” nominaśiyäsendä (ir-atlar) -Tatarstannıñ xalıq artistı Ferdinand Säläxov;

“Xalıq cırlawı” nominaśiyäsendä – Başqortstannıñ atqazanğan mädäniyät xezmätkäre Fäwdät Ğıylacev häm Tatarstannıñ xalıq artistı Äsxät Xismätov.