Bügen Êmil’ Cäläletdinov belän xuşlaştılar

Tatar cämäğat’çelege zur yuğaltu kiçerä. Bügen Tatarstan başqalası Qazannıñ Märcani mäçetendä xalqıbıznıñ tanılğan artistı Êmil’ Cäläletdinov belän xuşlaştılar. Ul kiçä 90 yäşendä baqıylıqqa küçte. Êmil’ ağa 10 kön êlek insul’t kiçerep xastaxanägä salınğan bulğan, kiçä isä yöräk öyänäge anı alıp kitä.

Tatar-inform mäğ’lümat agentlığı xäbär itkänçä, soñğı yuğla ozatu çarasın Ğabdulla Tuqay isemendäge Tatar däwlät filarmoniyäse oyıştıra.

Êmil’ ağanı küplär qabatlanmas şäxes ide dip iskä ala. “Tatarnıñ rıśare dip atar idem. Anıñ säğat’lär buyı söylägän şiğır’-cırların tıñlap, läzzätlänep, köç alıp tora idem. Ul tatar xalqınıñ uqımışlı, zıyalı ikänen kürsätep tora ide,”-dip iskä ala Tatar däwlät filarmoniyäse direktorı Qadim Nurullin.

Rusiyäneñ atqazanğan häm Tatarstannıñ xalıq artistı Êmil’ Cäläletdinov bıyıl 90 yäş’lek yubileyın zurlap ütkärergä dip äzerlänep yörgän bulğan. Ul bik kiñqırlı sänğat’çe ide. Törle janrlarnı – klassik äsärlärne dä, xalıq cırların da yuğarı ostalıq belän başqara aldı. Êmil’ Cäläletdinovnıñ konśert programmasında tatar kompozitorları Cihanov, Yaxin, Monasıypov, Fäyzi, Mözaffarov, Yarullin, Yenikeyev häm başqalarnıñ muzıkası ayırım urın alıp tora.

Ozatu çarasınnan soñ sänğat’çene Märcäni mäçetenä qarawçı möselman ziratına, 2021nçe yılnıñ cäyendä ülgän xatını Venera qabere yanına cirlädelär