Tatarstan matbuğatında Tuqay häm Törkiyä tatarları
Tatarstan xäbärläre – 05/2022
26nçı aprel’ könne Tatarstanda Tuğan tel köne häm Ğabdulla Tuqaynıñ 136 yıllığı tantanalı räweştä bilgeläp ütelde. Bügenge yazmada milli şağıyr Ğabdulla Tuqayğa bağışlap törki-tatar dönyasında ütkärelgän qayber çaralarğa küzätü täq’dim itäbez.
“Watanım Tatarstan” gazetı 29nçı aprel’dä Qazannıñ “Çerek kül” parkında uzğan “100 Tuqay” performansı turında xäbär itä:
“Älege çara böyık şağıyrneñ tuuına 136 yıl tuluğa bağışlandı. Çaranı Käriyıv teatrı Qazan şähär xakimiyäte belän berlektä oyıştırdı. Çarada Tuqay şiğırläre häm akyorlarnıñ üzläre yazğan tekstları yañğıradı.
“İdel” basmasıÄnkarada Tuqay häykäle yanında bulıp uzğan çara turında xäbär itä:
“Böyık tatar şağıyre Ğabdulla Tuqaynı iskä alu çarasında tatar, noğay, uyğır häm törek xalqı wäkilläre qatnaştı. Oyıştıruçılar Tuqaynıñ tormış yulı häm icatı turında qısqaça mäğ’lümat birgän,” – dip yaza sayt.
“Azatlıq” radiosı säxifäsendä isä Änkaradağı Tuqay çarası belän bäyle bularaq ber uquçınıñ fikere citkerelä:
“Barıbıznı berläşterep toruçı - Tuqay. Çit ildä anı iskä aluığız öçen räxmät. Tatarnı xörmät itep, Tuqay uramın, Tuqay häykälen buldırğannarı öçen Änkara xakimiyätenä dä zur räxmät. Tuqay uramına totaşqan 8nçe cäddägä dä Söyımbikä isemen birsälär bötenläy mökämmäl, iskitkeç bulır ide. Näq’ Qazandağı Tatarstan uramı belän kiseşkän Tuqay uramı kebek bulır ide, tatar êzlären saqlağan ike qardäş mäxällä.”
13nçe may könne Rusiyä Federaśiyäseneñ Samara ölkäsendäge “Xalıqlar duslığı yortı” («Халыклар дуслыгы йорты»нда) Ğabdulla Tuqaynıñ tormışı häm icatına bağışlanğan öç tomlı monografiyäne täq’dim itü bulaçaq. “Samara tatarları” saytı şul turıda xäbär itä.
“Tatar-inform” agentlığı beldergänçä, 27nçe aprel’dä Üzbäkstannıñ Firganä ölkäse tatar milli-mädäni üzäge Firğanä däwlät universitetında böyık tatar şağıyre Ğabdulla Tuqaynıñ tuğan könenä bağışlanğan muzıkal’-şiğ’ri kiçä ütkärde. Tatarstannıñ Üzbäkstandağı wäkilçelege şul turıda xäbär itä.
Konśertta şağıyr’neñ şiğır’läre urıs häm tatar tellärendä yañğıradı. Studentlarğa şağıyr’neñ tormışı häm icatı turında fil’m kürsätelde. “Kübälägem” ansamble çığış yasadı, diyılä xäbärdä.
26nçı aprel’ könne Qazaqstannıñ Ural’sk şähärendä böyık tatar şağıyre Ğabdulla Tuqaynıñ tuuına 136 yıl tuluğa bağışlanğan bäyräm çarası uzğan. Bu xaqta “Tatar-inform” agentlığına Ğabdulla Tuqaynıñ Qazandağı ädäbi muzeyı direktorı Güzäl Töxvätova xäbär itte.
Bu çara Könbatış-Qazaqstan ölkäseneñ Qazaqstan Xalıq assambleyası, Rusiyä Federaśiyäseneñ Ural’sk şähärendäge General’ konsullığı yärdäme belän oyıştırılğan.
“Tatar-inform” agentlığı säxifäsendä Zilä Möbäräkşinanıñ “Änkara universitetında tatar keşese Äqdäs Niğmät Qurat isemendäge auditoriya açılğan” isemle yazma urnaştırılğan.
Yazmada: “Änkara universitetı Tel häm tarix-geografiya fakul’tetında Çirmeşän rayonı Bärkätä awılı yıgete, dönyaküläm tanılğan tarix ğalime Äq’däs Niğ’mät Qurat isemendäge auditoriya açıldı”, - diyılä.
