Tatarstan xäbärläre 45/2024

Tatarstan Räise Xalıqlar berdämlege köne belän qotladı

4 nçe noyabr’dä Tatarstanda Xalıqlar berdämlege könen bilgeläp üttelär. Respublika Räise Röstäm Miñnexanov bu uñaydan tatarstanlılarğa möräcäğat’ itte.

Ul xalıqlarnıñ berdämlege, millätlär häm dinnär arasında tradiśion ruxi-äxlaqıy xäzinälärgä nigezlängän tatulıq, üzara añlaşıp yäşäwneñ Tatarstan Respublikasınıñ tizläneşle üseşe öçen möhim şartlarnıñ berse bulıp toruın assızıqladı.

“İxlas yöräktän sezgä isänlek-sawlıq, tınıçlıq, igelek häm iminlek telim”,- diyelä qotlawda.

Röstäm Miñnexanov Bäxräyn patşası belän xezmättäşlek perspektivaları turında fiker alıştı

Tatarstan Räise Röstäm Miñnexanov uzğan atnada Bäxräyngä säfär qıldı. Ul êş säfäre barışında älege il patşası Xämäd bän İsa Äl-Xalifä belän oçraştı. Respublika citäkçese bilgeläp uzğança, İslam bankingı häm finansları buyınça 19 nçı yıllıq konferenśiyädä qatnaşu Tatarstan delegaśiyäse öçen bik faydalı, çönki respublika Rusiyädä bu yünäleş buyınça sınaw töbäk bulıp tora.

Ağımdağı yılnıñ berençe yartıyıllığı näticälärenä qarağanda, Bäxräyn belän Tatarstan arasında tovar äyläneşe uzğan yılnıñ şul uq çorı belän çağıştırğanda 100%qa artqan häm 465 meñ amerika dolları däräcäsenä citkän. Yaqlar kiterü öçen produkśiya nomenklaturası şaqtıy kiñ bulu belän kileşte.

Tatarstanda real’ xezmät xaqları artqan

2024 nçe yılnıñ berençe 8 ayında Tatarstandağı predpriyatiye-oyışmalardağı, şul isäptän keçe êşmäkärlek sub’yektlarında real’ xezmät xaqı, 2023 nçe yılnıñ şul çorı belän çağıştırğanda ,11,2%qa artqan. Ğıynwar-avgust aylarında urtaça aylıq nominal’ xezmät xaqı 70 meñ 764,1 sum bulğan. Ul uzğan yılnıñ berençe 8 ayı belän çağıştırğanda 20,2%qa artqan.

Şunıñ belän berrättän, avgust ayın ayırım alğanda, Tatarstan xalqınıñ xezmät xaqı uzğan yılnıqına qarağanda 11,8%qa artqan. Avgustta respublika xalqınıñ nominal’ xezmät xaqı 74 meñ 697,2 sum bulğan. Ul yıllıqta 21,8%qa, ä aylıqta 0,2%qa artqan.

”Tatarça diktant” akśiyäse uza

8-10 nçı noyabr’ könnärendä dön’ya külämendä “Tatarça diktant” akśiyäse tuğızınçı tapqır uzaçaq. Ul tatar tele söyüçelären berläşterä, döres yazu häm ädäbi tatar telen belügä qızıqsınunı arttıruğa yünälderelgän. Bötendön’ya tatar kongressınıñ matbuğat xezmäte xäbär itkänçä, diktantta härkem qatnaşa ala. Akśiyägä qatnaşu, yazu noqtasın oyıştıru, diktantnı onlayn yazu öçen tulıraq mäğ’lümatnı diktant.tatar saytında tabarğa mömkin.

Diktantta qatnaşuçılar öçen öç törle tekst äzerlängän: qatlawlı (İdel  - Ural ölkäse öçen), urtaça (Rusiya Federaśiyäse töbäkläre öçen) häm ciñel (çit illär öçen) däräcälär.

Bıyıl berençe tapqır diktantnı latin älifbasında da yazarğa mömkin bulaçaq.

Antaliyada Tatarstan kinosı könnäre başlandı

2 nçe noyabr’dä Törkiyäneñ Antaliya şähärendä Tatarstan kinosı könnäre başlandı. Proyektnı oyıştıruçılar - Tatarstan mädäniyät ministrlığı, “Tatarkino” mädäniyät uçrejdeniyese häm Antaliya şähäreneñ “Tatarstan mädäniyät cämğıyäte”.

Tamaşaçılar iğ’tibarına “Äpipä” muzıkal’ komediyäse, tatar ädäbiyätı klassigı Ğalimcan İbrahimovnıñ “Almaçuar” äsäre motivları buyınça töşerelgän, Tatarstan belän Qazaqstannıñ urtaq proyektı “Tarlan”, Zifa Qadıyrova äsäre buyınça töşerelgän “Sömbel” kartinaları täq’dim iteläçäk. Ul fil’mnar ayğa ber märtäbä tatar telendä rus subtitrları belän kürsäteläçäk.  

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.