İzrailneñ İranğa höcümennän soñ...

İzrailneñ “Xamas” liderı İsmail Xäniyyäne Tähranda üterüe häm Livanda “Xizbulla” liderlarına höcümnär İrannıñ cawap birü köçen sınadı. Ul İzrailgä ballistik raketalar belän qarşılıq kürsätte. Şunnan soñ İzrail İranğa cawap qaytardı - höcüm kötelgänçä ük zur bulmasa da, İrannıñ hawa saqlanu sistemaları belän qayber ähämiyätle xärbi ob’yektların bärdelär. Xäzer küzlär İranda.

   İzrail atna axırında İranğa qarata küpmeder waqıttan birle kötelgän cawap höcümen yasadı. Ul Ğıyraq häm Süriyä hawa mäydanın qullanıp yaqınça 100 tiräse F-16, F-15 häm F-35 törendäge xärbi oçqıçlar belän 3 ayırım dulqın räweşendä İrannı utqa tottı.

OSİNT mäğ’lümatlarına qarağanda, berençe alınğan videolarda İrannıñ hawa saqlanu sistemaları häm qayber ähämiyätle raketa, keşesez hawa apparatı ob’yektlarına bärüläre kürenä. Tähran citkergänçä, waqıyğada 5 keşeneñ ğomere özelgän.

Tik höcümneñ kötelgän qadär köçle bulmawın häm çağıştırmaça çikle xäräkät ikänlegen äytergä mömkin. Monda, älbättä, AQŞnıñ İzrailgä basımı häm bu xäräkättä anı yaqlamawınıñ täêsire zur. Östäwenä, İran belän İzrail arasında yaqınça 1500 çaqrım bar häm bu İzrailneñ texnik mömkinleklären çikli. Şunısın da isäpkä alırğa kiräk, İzrailneñ İran atom-töş programmasına qarşı berdäm operaśiyä täq’dimen AQŞ kire qaqtı, İrannıñ neft’ êksportı asqormasına bärüne dä Amerika kirtäläde.

Bu xäldä Netan’yaxu üzeneñ telägänenä tulısınça ireşä almağan şikelle kürenä. İrannıñ da, kisken belderülärenä qaramastan, xäzergä cawap birüe kötelmi. Bolar - yaqın arada däwlätlär arası zur suğış çığu mömkinlegen kimetüçe faktorlar.

Tik İzrailneñ Ğazzädä dä, Livannıñ kön’yağında da basıp aluları däwam itä, şulay uq, tınıç xalıq ülemnäre dä tuqtamıy. “Xamas” häm “Xizbulla” assimetrik qarşılıq kürsätüläre belän İzrail armiyäsenä zur yuğaltu kiterä. İzrailgä xäzerge wäzğıyät’ne däwam itü bik caylı bulmayaçaq. Monnan tış, İzrail watandaşı fälästinlelärneñ här kön diyärlek il êçendä höcümnär oyıştıruı da alcıta.

Añlaşılğan şul ki, Netan’yaxu häm suğış kabinetı Tramp çorı kilüen kötä. Alar AQŞnıñ Tramp citäkçelegendä tağın da agressiv räweştä İzrailne yaqlayaçağın küzallıy. Tik turıdan-turı İran belän suğışu kötelmi. Mondıy wäzğıyät’neñ AQŞ mänfäğat’lärenä xezmät itmäyäçäge açıq. Tramp xäzerge waqıtta sionistlar belän yaxşı mönäsäbättä bulıp saylawlarda östenlek alırğa teli. Tik ilbaşı bulğannan soñ nindi säyäsät alıp baraçağı bilgesez.

Can Acun

SETA agentlığınıñ tışqı säyäsät tikşerenüçese