Tatarstan xäbärläre 39/2024

Oktyabr’dä Qazanda BRİKS sammitı uza

22-24 nçe oktyabr’dä Tatarstan başqalası Qazanda 16 nçı BRİKS sammitı uza. Tatarstan Räise Röstäm Miñnexanov iskärtkänçä, mondıy däräcädäge waqıyğanı ütkärü - respublika öçen zur däräcä häm cawaplılıq. Qazan mêrı İlsur Metşin xäbär itkänçä, bu könnärdä şähär 20 meñgä yaqın qunaqnı qabul itäçäk.

Tatarstan yuğarı citeşterüçänlekle êş urınnarı reytingına êläkkän

Yuğarı citeşterüçänlekle êş urınnarı buyınça Tatarstan da maqtana ala. Çönki ul änä şundıy reytingqa êläkkän. Tikşerenüdän kürengänçä, uzğan yıl Tatarstanda 1 meñ keşegä zamança cihazlanğan 328 êş urını turı kilgän. 85 töbäkneñ 34endä älege kürsätkeçneñ urtaçadan yuğarıraq buluı açıqlanğan. 58 sub’yektta mondıy urınnarnıñ iñ kübe êşkärtü sänäğatenä turı kilgän. Mäskäw, ğadättägeçä, berençe urınğa çıqqan. Sankt-Peterburg ikençe, Sverdlovsk ölkäse häm Tatarstan öçençe urında.

73 qazanlı bıyıl 100 häm annan da kübräk yäşen bilgeläp ütä

 Qazanda yäşäwçe 41 meñgä yaqın keşe 80 yäş’ne uzğan, ä 73 qazanlı bıyıl 100 häm annan da kübräk yäşen bilgeläp ütä. Alar arasında 70 xatın - qız häm 3 ir-at bar. Bu xaqta şähär Başqarma komitetı citäkçese urınbasarı Güzäl Sağıytova xäbär itä.

 “2024 nçe yılnıñ 1 nçe ğıynwarına Qazanda iminiyät pensiyälären 286 meñ keşe ala, alarnıñ 79%ı xatın - qızlarğa häm 21%ı ir-atlarğa turı kilä”,- di Säğıytova.

“İslam. Berençe adımnar” kurslarına tıñlawçılar cıyalar

Tatarstan Diniya näzaräte namaz uqırğa häm İslam dine nigezlärenä öyrätüçe “İslam. Berençe adımnar” kurslarınıñ 14 nçe sezonına tıñlawçılar cıya. Uqular 5 nçe oktyabr’dä başlana. Şäkertlär qısqa waqıtlı populyar kurs däwamında - 8 ğadäti däres êçendä - namaz uqırğa häm İslam dine nigezlärenä öyränä alaçaq. Däreslär - tüläwsez. Kurslarğa yazılu däwam itä.   

Filologiya häm mädäniyätara bağlanışlar institutı tüläwsez tatar tele kurslarına çaqıra

7 nçe oktyabr’dä Qazan federal’ universitetınıñ Filologiya häm mädäniyätara bağlanışlar institutında Tatarstan Respublikası xalqı öçen tüläwsez tatar tele kursları başlana. İnstitutnıñ matbuğat xezmäte xäbär itkänçä, kurslar 2 ayğa isäplänelgän, 7 nçe oktyabr’dä başlanıp 29 nçı noyabr’gä qadär däwam itäçäk. Tıñlawçılar, tel belü däräcäsenä qarap, törkemnärgä bülenäçäk: başlangıç häm däwam itüçe. Däreslärneñ waqıtı - atnağa öç tapqır, 17.30- 19.45 säğat’tä. Kurslardan soñ, maxsus test ütep, tatar tele kursların tämamlaw turında sertifikat bireläçäk.

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  häm “Watanım Tatarstan” gazetı yazmaları qullanıldı.