Tatarstan xäbärläre 38/2024

“Altın mönbär” büläkläre iyälärenä tapşırıldı

Tatarstan başqalası Qazanda “Altın mönbär” xalıqara kinofestivaleneñ yabılu tantanası ütte. Bıyıl ul 20nçe tapqır uzdırıldı. Festival’neñ konkurs programmasında 51 äsär bar ide. Monnan tış, 90 kartina konkursqa parallel’ räweştä uzuçı programmalarda kürsätelde. Şunısın da äytergä kiräk, bıyıl konkurs programmasındağı fil’mnarnı qaraw tüläwle ide.

 “Altın mönbär”neñ jyuri räise törek rejissyerı Metin Günay buldı. Çaranıñ gran-priyen rejissyer Aleksey Romanovnıñ “Mäñgelek qarlar riwayäte” fil’mı aldı.

Kinofestival’neñ yabılu tantanası 11nçe sentyabr’dä Kamal teatrında uzdı.

 “Telegram”nıñ interfeysın tatarçağa tärcemä itü tögällände.

“Telegram” sośial’ aralaşu quşımtasınıñ interfeysın tatar telenä tärcemä itü êşen volontyer İlgiz Cihangirov başqarıp çıqtı. Başta ul rol’le östäl uyınnarın häm sport turındağı mäqalälärne tärcemä itkän, ä 2023nçe yıldan üz teläge belän messendjer interfeysına totınğan. Cihangirov äytüençä, Tatarstanda 525 “Telegram” kanalı bar, şularnıñ 181e - tatar telendä. Ul interfeysnı tatar telle qullanuçılarğa ciñel bulsın öçen tärcemä itä başlıy. “Telegram”nı tatarçalaştıru proyektın Tatarstan Fännär akademiyäseneñ Ğalimcan İbrahimov isemendäge Tel, ädäbiyat häm sänğat’ institutı da xuplıy.

“Xäzerge zaman tatar balalar ädäbiyatı antologiyäse” rus telendä.

Mäskäwdä  “Xäzerge zaman tatar balalar ädäbiyatı antologiyäse”n rus telendä bastırıp çığardılar. Anı Tatarstan Yazuçılar berlegeneñ Ädäbi tärcemä üzäge äzerlägän. Antologiyägä barlığı 35 yazuçınıñ äsäre kergän. Aralarında Rabit Batulla, Êl’mira Şärifullina, Ranif Şäripov, Rkail Zäydulla, Ğazinur Morat şikelle avtorlarnıqı bar.

Antaliyada  - tatar kitapxanäse

13nçe sentyabr’ könne Antaliya tarixın öyränü üzäge kitapxanäsendä tatar bülege açıldı. Çarada Bötendön’ya tatar kongressı Başqarma komitetı citäkçese Danis Şakirov ta qatnaştı. Açılışta Antaliya mêrı urınbasarı Durmuş Ali Arslan çığış yasadı häm tatarlarnıñ Törkiyä tarixında zur rol’ uynawın xäterlätte.

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.