Tatarstan xäbärläre 36/2024

30nçı avgust - Tatarstan cömhüriyäte köne

  30nçı avgustta Tatarstan başqalası Qazan häm rayonnarda Cömhüriyät köne bilgeläp ütelde. Bilgele bulğança, 1990nçı yılda älege könne Tatarstannıñ möstäqıyl’lek turında Deklaraśiyäse qabul itelde. Şul çaqtan birle bu data tatar xalqı öçen ayırım ähämiyätkä iyä. Bıyıl Bäyräm çaralarında 400 meñnän artıq keşe qatnaşqan. Şularnıñ 290 meñe - Qazanda.

Başqalada bäyräm xörmätenä “Yılmay” balalar parkı açıldı. Bu respublikada açıq hawa astındağı iñ zur küñel açu mäydanı. Kreml’ yar buyındağı älege parknıñ açılış tantanasında Tatarstan räise Röstäm Miñnexanov ta qatnaştı. Anıñ äytüençä, Cömhüriyät könendä iñ yaxşı büläk - balalarnıñ yılmayuı, çönki Tatarstannıñ kiläçäge alar qulında.  

  Tatarstan Ğazzä sızığına gumanitar yärdäm cibärde

Tatarstan möselmannarı Diniyä näzaräte Ğazzä sızığında çolğanışta yäşäwçe xalıqqa gumanitar yärdäm cibärde. Ğomumi awırlığı 30 tonna bulğan konservlanğan xäläl itne oçqıç belän Misırğa cibärdelär. Diniyä näzaräte wäkilläre anı “Äl-Arış” aêroportında Misırnıñ “Qızılay” cämğıyätenä tapşırdı. Alar yärdämne Ğazzä xalqına cibäräçäk. Yaqın arada Tatarstan möselmannarı Diniyä näzaräteneñ “Zäkyat” xäyriyä fondınnan tağın ber yök cibärü kötelä.  

Qazan aêroportı yabıldı

   Tatarstan başqalasındağı Qazan xalıqara aêroportı 28nçe avgustta pilotsız hawa apparatları qurqınıçı arqasında oçışlarğa yabıldı. Rusiya-Ukraina çigennän 900 çaqrım yıraqlıqta urnaşqan Qazan moña qadär dä Ukraina dronnarı höcümena duçar bulğan ide.

Qazan aêroportına yul totqan oçqıçlar ul könne Samara hawa mäydanına cibärelde.

Tatarstan belem birü yortlarında yaña belgeçlär

Yaña uqu yılında 1 meñgä yaqın yäş’ belgeç Tatarstannıñ belem birü oyışmalarına êşkä kilä. Şularnıñ 400e - Qazan mäktäplärenä. Bu xaqta Tatarstannıñ mäğarif häm fän ministrlığınıñ matbuğat xezmäte xäbär itä. Bıyıl respublikada 53 meñnän artıq bala berençe sıynıfqa kilde. Tatarstan mäktäplärendä barlığı 516 meñ 700 bala belem ala.

Tatarstanda sentyabr’ cılı bulaçaq

Тatarstanda sentyabr’ ayında urtaça hawa temperaturası klimatik normadan 1 gradusqa yuğarıraq bulaçaq. Bu xaqta Gidrometeorologiyä häm äylänä-tirä moxitne küzätü idaräse xäbär itä. Sentyabr’dä aylıq yawım-töşem küläme normağa yaqın bulır dip kötelä. Ul region öçen 48 millimetrğa, başqala öçen 50 millimetrğa tigez dip iskärtä sinoptiklar.

Tatarstanda avgust axırında temperatura fasıl normalarınnan 4-6 gradusqa yuğarıraq buldı.  

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.