Tatarstan xäbärläre 35/2024

Tatarstan belän Üzbäkstan arasında tovar äyläneşe arttı

Kiçä Tatarstan Räise Röstäm Miñnexanov Tatarstan neft’- gaz ximiyäse forumı qısalarında “Qazan Êkspo”da Üzbäkstan ênergetika ministrı Jurabäk Mirzamäxmüdüv belän oçraştı. Ul qunaqqa çarada qatnaşuı häm respublika belän xezmättäşlekne üsterügä iğ’tibarı öçen räxmät belderde.

Miñnexanov üzara säwdä külämnäre arta baruın bilgeläp ütte. 2023 nçe yıl näticäläre buyınça Tatarstan belän Üzbäkstan arasında tovar äyläneşe 370 million dollar bulğan, üseş 27%nı täşkil itkän.

Yaqlar urtaq proyektlarnı ğamälgä aşıruğa bäyle êş mäs’äläläre turında fiker alıştı.

Tatarstan igençeläre 2 million tonna aşlıq cıyıp alğan

Tatarstan igençeläre 2 million tonna aşlıq cıyıp alğan. Anıñ urtaça uñışı gektardan 30 śentner täşkil itä. “43 rayonda börtekle kul’turalarnı cıyalar. Uzğan ike köndä böten respublika buyınça 162 tonnadan artıq awıl xucalığı kul’turaları suqtırıldı” dip belderälär Awıl xucalığı häm azıq-tölek ministrlığınnan.

Tatarstannan portlar aşa aşlıq êksportı bıyıl yaqınça öç tapqır artqan

Ağımdağı yılnıñ 7 ayında Tatarstannan çit ilgä su transportı belän 230 meñ tonna börtekle produkśiya ozatılğan. Bu 2023 nçe yılnıñ şul kürsätkeçennän yaqınça öç tapqır kübräk bulğan. “Uzğan yıl yılğa transportı belän 80 meñ tonnağa yaqın börtekle produkśiya ozatılğan” dip belderä Aşlıq sıyfatın bäyäläw üzägeneñ Tatarstandağı filialı direktorı Tat’yana Menlikiyeva. 

Belgeç süzlärençä, bıyıl aşlıq Kavkaz häm Ästerxan portlarına qadär kiterelgän, soñınnan Soğud Ğaräbstanına häm Afrikanıñ törle illärenä ozatılğan. Monan tış, yıl başınnan Tatarstannan turıdan-turı êksportqa yaqınça 60 meñ tonna börtekle produkśiya cibärelgän.

Tatarstan köräşçeläre Qırğızstanda dön’ya çempionatında ciñü yawladı

21-23 nçe avgust könnärendä Qırğızstan başqalası Bişkäk şähärendä Köräş buyınça xalıqara yarışlar buldı. Alar Qırğıstan xalıqlarınıñ tradiśion köräşe buyınça dön’ya çempionatı häm xapsagay yakut köräşe buyınça berençe dön’ya çempionatı belän berlektä uzdı. Yarışlarda dön’yanıñ 35 ilennän 160 tan artıq sportçı qatnaştı.

Köräş buyınça Rusiya cıyılma komandası sportçısı tatarstanlı Aleksey Abramov 66 kilogramm awırlıq kategoriyäsendä qırğız köräşe buyınça dön’ya çempionı titulına iyä buldı. İslam Fäläxov häm Renas Kälimullin 72 kilogramm häm 90 kilogramm awırlıq  kategoriyälärendä kömeş medal’ yawladılar.

“İslam. Berençe adımnar” kurslarına tıñlawçılar cıyalar

Tatarstan Diniya näzaräte namaz uqırğa häm İslam dine nigezlärenä öyrätüçe “İslam. Berençe adımnar” kurslarınıñ 14 nçe sezonına tıñlawçılar cıya başladı. Uqular 5 nçe oktyabr’dä başlana. Şäkertlär qısqa waqıtlı populyar kurs däwamında - 8 ğadäti däres êçendä - namaz uqırğa häm İslam dine nigezlärenä öyränä alaçaq. Däreslär - tüläwsez. Kurslarğa yazılu başlandı.  

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.