Tatarstan xäbärläre - 34/2024

Röstäm Miñnexanov Malayziya başqalasındağı Putra mäçete fotosın kürsätte

Tatarstan Räise Röstäm Miñnexanov Malayziya başqalası Kuala-Lumpurda urnaşqan mäçetneñ fotosüräte belän urtaqlaştı. Mäçetkä 15 meñ keşe sıya.

“Kuala-Lumpurda oçraşular küp. Şähärne avtomobil’ täräzäsennän genä qarıy alam. Uzıp barışlıy ğacäyep matur Putra mäçeten kürdek. Namazlardan tış, biredä seminarlar häm konferenśiyalär uzdıralar”, - dip yazğan respublika citäkçese Telegram kanalında.

Röstäm Miñnexanov 12 avgust könne Malayziyagä êş säfäre belän kitkän ide. 13endä ul Malayziya prem’yer-ministrı Änwär İbrahim, Malayziya awıl xucalığı ministrı Möxämmäd Sabu, ilneñ êşlekle dairäläre, Malayziya patşası Soltan İbrahim belän oçraştı.

Törkiyädä seber tatarları nigez salğan Böğrüdälik awılı turında kitap çıqtı

Tatarstan matbuğatında Törkiyädä yäşäwçe tatarlar turında da yazmalar dön’ya kürä.

Alardan berse bulğan Räxmätullah Qurtaran xaqında “Tatar-inform” xäbärçesenä Törkiyädä yäşäp, icat itüçe yazuçı, jurnalist Ayziräk Gäräyeva-Aqçura xäbär itte.

Törkiyäneñ Böğrüdälik awılı tatarı Räxmätullah Qurtarannıñ “Tatarlarnıñ Seberdän Kön’yağa ğam’ tulı xicräte” dip atalğan kitabı dön’ya kürde.

Kitapnı Kon’ya şähäre muniśipalitetı Kul’tur akśionerlık şirkäte näşer itkän. Seber tatarlarınıñ tarixın, mädäniyäten häm sośial’ tormışın yaqtırtqan basma çığaru proyektınıñ konsul’tantı – professor, doktor Canär Arabaçı, basma redaktorı – dośent, doktor Mäxmät Gök.

Kitapnıñ kereş bitlärendä Kön’ya şähäre mêrı, Kul’tur anonim şirkäte citäkçese Uğur İbrahim Altaynıñ süzläre urın alğan.

Alğa taba ğalim, yazuçı Canär Arabaçı fikerläre belän tanışırğa mömkin.

Törek telendä dön’ya kürgän tatarlarğa bağışlanğan kitap öç bülektän tora: “Seberdän Anadoluğa xicrät xatiräläre”, “Seberdän Anadoluğa taşılğan mädäniyät”, “Seberdän Böğrüdälik xicrätenä bäyle söyläşülär”.

Monnan tış, kitapta seber tatarları bäyetläre, awılda qullanılğan mäqal’lär, seber tatarları süzlege, tarixi fotolar, dokumentlar urın alğan.

Mäskäwdä balalar öçen tatarça teatr tügäräge açıla

Tel belgeçe Dilä Söläymanova Mäskäwdä balalar öçen tatarça teatr tügäräge aça. Bu xaqta Rusiyä Federaśiyase möselmannarı Diniyä näzaräteneñ Telegram kanalında xäbär itelä.

Mäskäwdä yäşäwçe millättäşebez tatar ğailälärendä üsüçe balalarnıñ tuğan telebezdä söyläşmäwenä borçılıp utırırğa tügel, ä xäräkätlänergä kiräk, dip sanıy. Ul bu xälne uñay yaqqa üzgärtergä alınğan häm teatr tügäräge oyıştırğan. Maqsatı säxnädä uynarğa öyrätüdän bigräk, balalarnı tatarça söyläşergä êtärü.

Dilä Söläymanova Mäskäw däwlät lingvistika universitetında häm Mäskäw däwlät universitetında yuğarı belem alğan. Xäzer tatar häm rus tellärennän tış, inglizçä häm almança belä, alarnı uqıtu metodikasına töşengän.

Milli tügäräk Mäskäw tatarları tuplanıp yäşi torğan Butovo rayonındağı “Buninskiye luga” toraq kompleksında bulaçaq.

Mêriya binası balkonnarında “Qazan tawışları” tamaşası bula

Qazan mêriyase binası balkonnarında 24 avgustta “Golosa Kazani – Qazan tawışları” teatral’läşterelgän tamaşa uzaçaq. Şähär xalqı häm qunaqları aldında Qazan teatrları aktyerları, vokalçılar häm muzıkantlar çığış yasayaçaq.

Başqarma komitetı citäkçese urınbasarı Güzäl Säğıytova süzlärençä, tamaşa Rusiyädä 2024 yılda iğlan itelgän Ğailä yılına bağışlana.

24 avgustta Märcani uramında “Peçän bazarı” êşli başlıy. Festival’dä zamança teatr mädäniyäten täqdim itüçe dizaynerlar, şağıyr’lär häm muzıkantlar üzläreneñ icatı belän urtaqlaşa. Çara Bötendön’ya tatar yäş’läre forumı yärdämendä oyıştırıldı.