Tatarstan xäbärläre - 33/2024

Röstäm Miñnexanov Malayziyagä êş säfärenä kilde

Tatarstan Räise Röstäm Miñnexanov êş säfäre belän Malayziyagä kilde.

Xalıqara aêroportta anı Rusiyä Federaśiyaseneñ Malayziyadäge Ğadättän tış häm tulı wäqalätle wäkile Nail Latıypov häm zur ênergetika korporaśiyase citäkçese Dato Daing qarşı aldı.

13 avgustta Malayziya başqalasında Miñnexanov berniçä söyläşü häm oçraşu uzdıra, alarda ildä xäläl industriyane üsterü turında fiker alışırğa, awıl xucalığı potenśialın täqdim itärgä cıyınalar.

Bötendön’ya tatar yäş’läre forumın uzdırunı kiläse yılğa küçerdelär

Bıyıl Qazan şähärendä zur Xalıqara çaralar ütkärü säbäple, oyıştıru komitetı IX Bötendön’ya tatar yäş’läre forumın kiläse yılğa küçerergä qarar itte. Bu turıda Bötendön’ya tatar kongressı xäbär itte.

Älegä IX Bötendön’ya tatar yäş’läre forumı 2025 yılnıñ 23-27 aprel’ könnärenä planlaştırılğan. Forum böyek tatar şağıyre Ğabdulla Tuqaynıñ tuuına 139 yıl tulu häm “Min tatarca söyläşäm!” festivaleneñ 20 yıllığı bäyräm itelüenä turı kiläçäk, diyelä xäbärdä.

Novosibirskida Tatar yäş’läreneñ seber festivale bula

12-15 sentäbr’dä Novosibirsk şähärendä XVI Tatar yäş’läreneñ seber festivale uzaçaq. Bu – ağımdağı yılda iñ kötep alınğan waqıyğa, diyelä “VKontakte” sośial’ çeltärendä “Novosibirsk tatarları” säxifäsendä.

Festival’ne Novosibirsk ölkäse Mädäniyät ministrlığı ğamälgä quyğan, ä Novosibirsk ölkäse tatar mädäni üzäge, Novosibirsk ölkäse töbäk tatar milli-mädäni moxtariyate, Bötendön’ya tatar kongressı, Tatarstan Mädäniyät ministrlığı; Rusiyä tatarlarınıñ federal’ milli-mädäni moxtariyate, “Seber tatarları assośiaśiyase” töbäkara ictimağıy oyışması, “İdel” yäş’lär üzäge oyıştıra.

Çara Tatar mädäniyäte yortı territoriyasendä konśert belän tämamlanaçaq.

Sidneyda Tatarstan ostalarınıñ xalıq sänğate hönärläre êşlänmäläre täqdim itelde

Uzğan yallarda Sidneynıñ Rus klubında Xalıq sänğate hönärläre köne uzdı. Klubnıñ 100 yıllığına häm Rusiyä Xalıq sänğate hönärläre köne uñayınnan qızıqlı çara äzerlände. Bu xaqta Bötendön’ya tatar kongressı matbuğat xezmäte xäbär itä.

Bäyräm qısalarında Sidney häm Mel’burn kollekśionerları häm ostaları täqdim itkän xalıq hönärçelege êşlänmäläre kürgäzmäse uzdı. Alar arasında samawır, podnos, Gjel’ ostaları êşlänmäläre, xoxlom bizäkläre, matryeşkalar, Orenburg şälläre häm başqa xalıq sänğate icatı ürnäkläre bar ide.

Watandaşlar häm Tatarstannan kilgän yaqtaşlar kürgäzmädä üzläreneñ êkspoziśiyaläre häm master-klassları belän qatnaştı, diyelgän xäbärdä.

Svetlana Garifullina yanğın sünderü-qotqaru sportı buyınça yarışlar çempionı buldı

Tatarstan sportçısı Svetlana Garifullina yanğın sünderü-qotqaru sportı buyınça yarışlar çempionı buldı. Bu turıda Tatarstan Sport ministrlığı xäbär itte.

7 avgusttan 11 avgustka qadär Sankt-Peterburg şähärendä Rusiyä Ğadättän tış xällär ministrlığınıñ Yanğınğa qarşı federal’ xezmäteneñ maxsus idaräläreneñ yanğın-qotqaru sportı buyınça “V.T. Kişkurno istälegenä” Bötenrossiya yarışları uzdı.

18 iñ köçle cıyılma komanda yanğın sünderü-qotqaru sportı disśiplinalarında çempion iseme öçen köräşte.

7.35 sekund näticäse belän “şturm basqıçı – 2 qat – uqu manarası” disśiplinasında Tatarstan sportçısı Ğarifullina Svetlana ciñüçe buldı.