Tatarstan xäbärläre 24/2024

Tatarstan häm tatar dönyasındağı qayber waqıyğalarğa qısqaça küzätü

2151319
Tatarstan xäbärläre 24/2024

Qazan Sabantuyı 23 nçe iyün’dä bula

8-9 nçe iyün’dä awıllar häm rayonnarda, şul isäptän respublika şähärlärendä Saban tuyları görläde. Tatar xalqınıñ milli bäyräme Çallıda 15 nçı iyün’dä, Tatarstannıñ töp Sabantuyı Qazanda 23 nçe iyün’dä bula.

 

Tatarstanda berençe kvartal yomğaqları buyınça tuuçılar sanı kimegän

2024 nçe yılnıñ berençe kvartalında Tatarstanda tuuçılar sanınıñ kimüe häm ülüçelär sanınıñ artuı terkälgän. Ğıynwar-mart aylarında respublikada 8 meñ 284 bala tuğan, bu uzğan yılnıñ şuşı çorına qarağanda 595 sabıyğa kimräk. Şul uq waqıtta töbäktä 11 meñ 866 ülem oçrağı terkälgän – bu 2023 nçe yılnıñ ğıynwar-martı belän çağıştırğanda 843 kä kübräk. Näticädä tuuçılar sanı kürsätkeçe 7,8%qa kimegän, ä ülüçelär sanı 6,3%qa artqan. Şul räweşle xalıqnıñ kimü tempları tizäygän: 2023 nçe yılnıñ berençe 3 ayında ul 2 meñ 144, ä 2024 nçe yılnıñ berençe 3 ayında 3 meñ 582 keşegä azayğan.

 

Tatarstan yuğarı uqu yortlarında 22 meñnän artıq çit il studentı uqıy

Tatarstan Respublikası Däwlät Sovetı Räise Färit Möxämmätşin beldergänçä, Tatarstan yuğarı uqu yortlarında 15 yaqın häm 111 yıraq çit ildän kilgän 22 meñnän artıq student belem ala. “Tatarstan Üzäk Aziya töbäge däwlätläre belän xezmättäşlek buyınça aldınğı poziśiyälärne bili”,- dip belderä respublika parlamentı başlığı. Möxämmätşin bilgeläp uzğança, Tatarstan mäğarif ölkäsendä çit illär belän urtaq programmalar oyıştıru buyınça 700 dän artıq xezmättäşlek kileşüe tözede.

 

Törkiyä ğalime Qazanda Şihabetdin Märcänineñ 7 tomlığın çığarırğa cıyınuların äytte

Tatar mäğ’rifätçese, din ğalime Şihabetdin Märcänineñ “Vafiyätel-äslyäf wä taxiyätel-äxlyäf” äsäreneñ 7 tomlığın çığaruğa äzerlek êşe bara.

Bu xaqta İRSİKA direktorı urınbasarı, Törkiyä ğalime Cängiz Tomar xäbär itä.

”Şihabetdin Märcäni - tatar tarixı öçen töp ğalimnärneñ berse. Anıñ tanılğan “Vafiyätel-äslyäf wä taxiyätel-äxlyäf” äsäre bar. Bezneñ köngä qadär äsärneñ tulı analizı bulğanı yuq ide, nindider keçkenä öleşläre genä tärcemä itelgän, öyränelgän ide. Bez ul kitapnı 7 tomda bastırıp çığaruğa äzerlädek”,- dip belderä  Cängiz Tomar.

”Şihabetdin Märcäni şulqadär ğıylemle bulğan : ğaräp telendä kitap yaza alğan”,- di Cängiz äfände. Ul Märcänineñ “Vafiyätel-äslyäf wä taxiyätel-äxlyäf” äsären “ênśiklopediya kebek” dip bäyäli.

Ğalim KFUnıñ Milli kitapxanäsendä saqlana torğan 450 qul’yazmanı öyrängännären äytä.

“Bez xezmätneñ çığanaqları tuğan urında çığuın telibez. Qazannan qardäşlärebez belän bergä şuşı kitapnı çığarırğa niyätlibez”,-dip plannarı belän urtaqlaşa Törkiyä ğalime.

Malayziyädä Tatarstan Respublikası mädäniyate könnäre uza

Şuşı könnärdä Kuala-Lumpurda räsmi räweştä Tatarstan Respublikası mädäniyäte könnäre başlanıp kitte. Anı açu tantanasında bäyläneşle räsmi zatlar qatnaştı. Mädäniyät könnäre qısalarında Kuala-Lumpurda “Altın minbär” 20 nçe Xalıqara möselman kinosı festivale kino kürsätüläre uza. Tatarstan kinosı täq’dm iteläçäk kiläse şähär Djoxor bulaçaq. İke ilneñ rässam, kinematografistların häm mädäniyät ölkäsendäge êkspertların berläşterep, ”Altın minbär” festivale xezmättäşlek häm üzara belem alışu öçen mömkinleklär tudıra.Malayziya xökümäteneñ festival’ne xuplawı anıñ mädäni törlelekne alğa êtärü häm xalıqara partnyerlar belän uñay mönäsäbätlärne nığıtuda tuğrılığın assızıqlıy.

Tapşıruda Tatarstan Räiseneñ matbuğat xezmäte“Tatar-inform” xäbär agentlığı  yazmaları qullanıldı.



Bäyläneşle xäbärlär