Tatarstan xäbärläre 57/2023

Tatarstan Räise Rusiyädäge Törkiyä ilçese belän oçraştı

Tatarstan Räise Röstäm Miñnexanov Törkiyäneñ Rusiyädäge Ğadättän tış häm tulı wäqalätle ilçese Mäxmät Samsar belän oçraştı. Missiyäse tämamlanuğa bäyle räweştä diplomat ildän kitä.

Samsar assızıqlağança, Tatarstanğa ul respublika citäkçelegenä xezmättäşlek öçen räxmät belderergä dip maxsus kilergä qarar qılğan. Monnan tış, bu säfär ayırım simvolğa iyä: 5 yıl êlek bu wazifağa bilgelängännän soñ, ilçe iñ berençe kilgän urınnarnıñ berse Qazan bulğan.

”Berençe oçraşudan uq sezneñ yärdämegezne sizdem, şuña kürä sezgä kilü häm kitär aldınnan şäxsän sawbullaşu möhim ide”, - dip añlattı ul.

Samsar Törkiyägä qaytqaç, tışqı êşlär ministrlığınıñ üzäk apparatında Rusiyägä kuratorlıq êşen däwam itäçägen bilgeläp ütte häm Tatarstanğa kiräkle böten yärdämne kürsätergä wäğ’dä itte.

”Bezneñ illär arasındağı mönäsäbätne nığıtuğa yünälderelgän Tatarstan-Törkiyä xezmättäşlegen üsterügä kertkän öleşegez öçen räxmät belderäsem kilä”,-dide üz çiratında Tatarstan Räise Röstäm Miñnexanov.

Ul iskärtkänçä, Törkiyä Tatarstannıñ töp partnyerları arasına kerä. Soñğı yılda ğına da alarnıñ tovar äyläneşe 1 milliard 200 million dollarğa citkän.

Röstäm Miñnexanov Törekmänstan citäkçelege belän oçraştı

Tatarstan Räise Röstäm Miñnexanov uzğan atnada Törekmänstan citäkçelege belän oçraştı häm respublikanıñ Bäysezlek köne uñayınnan uzdırılğan çaralarda qatnaştı.

Ul Xalıq Mäsläxäte Räise Ğorbanğulı Bärdemöxämmädov belän oçraşıp Tatarstan belän Törekmänstannıñ säwdä - iq’tisadi xezmättäşlege turında fiker alıştı. Şulay uq Törekmänstan-Tatarstan êşçe törkemeneñ säwdä - iq’tisadi, fänni – texnik häm mädäni xezmättäşlek buyınça êşe turında söyläştelär. Monnan tış Tatarstan citäkçese Arkadag şähärendä buldı.

Tatarstanda ipotekağa fatir satıp alu mömkinlegenä iyä ğailälär sanı artqan

Tatarstanda ipotekağa fatir satıp alu mömkinlegenä iyä ğailälär sanı 4,5%qa artqan.“Ria Novosti” agentlığı ütkärgän tikşerenüdä şul xaqta süz bara.

Ägär 2022 nçe yılnıñ avgustında respublikada ğailälärneñ 22,8 %ı küçemsez milek satıp alu öçen kredit räsmiläşterü mömkinlgenä iyä bulsa, 2023 nçe yılnıñ avgustında inde bu kürsätkeç 27,3%qa citkän.

Tatarstan Rusiya Federaśiyäse sub’yektları arasında ipotekanıñ ütemlelege buyınça 42 nçe urınnı bili.

Qazannan Dubayğa yaña aviareyslar açarğa planlaştıralar

Tatarstan başqalası Qazannan Dubayğa yaña aviareyslar açarğa planlaştıralar. Oçışlar programması qışqı yallar häm yaña yıl kanikulları çorına tözelgän: 2023 nçe yılnıñ 21 nçe dekabrennän 2024 nçe yılnıñ 31 nçe ğıynwarına qadar dip xäbär itä Qazan aêroportınıñ matbuğat xezmäte.

Qazannan oçqıçlar atnağa ike tapqır oçaçaq: comğa könnärendä oçıp kitü – 8.00 säğat’kä, töşü- 14.10 säğat’kä bilgelängän, düşämbe könnärendä sudnolar 7.25 säğat’tä kitäçäk, 13.35 säğat’tä kilep citäçäk.

Kire yünäleştä dä reyslar atnağa ike tapqır başqarılaçaq: pänceşämbe könnärendä oçıp kitü – 17.35 säğat’kä bilgelängän, töşü - 21.50 säğat’kä, yäkşämbe könnärendä oçıp kitü 13.30 säğat’kä planlaştırılğan, kilep citü – 17.45 säğat’kä. Här aêroport öçen cirle waqıt kürsätelgän, şähärlär arasındağı yul 5 säğat’kä yaqın waqıtnı alaçaq. Grafikta üzgäreşlär bulırğa mömkin.

Färit Bikçäntäyev Törkiyädä spektakl’ quya

Oktyabr’ başında Änkara şähärendä Törkiyä däwlät teatrında Ğaliasğar Qamal teatrınıñ baş rejisserı Färit Bikçäntäyev quyılışında “Gonzagonı üterü” spektakleneñ prem’yerası bula. Spektakl’gä sśenografiyäne teatrnıñ baş rässamı Sergey Skomoroxov icat itkän. Färit Bikçäntäyev bilgeläp uzğança, repetiśiyälär avgust ayında uq başlanğan. Bolgariya dramaturgı p’yesası buyınça quyılğan spektakl’ 6 nçı oktyabr’gä planlaştırılğan.

Bügenge çığarılışta Tatarstan Räiseneñ matbuğat xezmäte belän “Tatar-inform” xäbär agentlığı yazmaları qullanıldı.