Tatarstan xäbärläre 54/2023

Qazanda xalıqara möselman kinosı festivale bulıp uzdı

5nçe sentyabr’dän 9ına qadär Tatarstan başqalası Qazanda xalıqara möselman kinosı festivale görläde. Bıyıl anda qatnaşu öçen 44 ildän 714 möräcäğat’ kilgän. Şulardan 52 fil’mnı konkurs programması öçen saylap alalar. Arasında Tatarstan rejissyerlarınıñ 4 êşe dä bar. Başqa yıllarnı, ğadättä, 1-2se genä kerä ide.

Çarağa çit illärdän dä tanılğan sänğat’ ähelläre çaqırulı ide. Töp qunaq – danlıqlı rejissyer häm muzıkant Ämir Kusturiśa. Qazanda ul üzeneñ “Qiyek qaz yulınnan” fil’mın täq’dim itte. Şunda uq tamaşaçılar belän oçraşu uzdırıp, alarnıñ sorawlarına cawap birde.

Festival’neñ Gran-priyen bıyıl da İran aldı. Rejissyer Bexruza Şoaibinıñ “Aldan kileşüsez” kartinası “İñ yaxşı tulı metrajlı fil’m” nominaśiyäsendä ciñde.

Tatarstan räise Röstäm Miñnexanov Şäñcan-Uyğır avtonomiyäle töbäge wäkillären qabul itte

Tatarstanda 7nçe häm 8nçe sentyabr’ könnärendä berençe “ROSTKİ” xalıqara forumı uzdı. “Qazan Êkspo” üzägendä oyıştırılğan çarada 20 ildän häm Rusiyäneñ 55 töbägennän 4 meñgä yaqın keşe qatnaşa. Şularnıñ 500dän artığı Qıtay wäkilläre. Älege delegaśiyä sostavında Şäñcan -Uyğır avtonomiyäle töbäge xakimiyäte başlığı urınbasarı Märdan Mukiyit tä bar. Anı Tatarstan räise Röstäm Miñnexanov qabul itte. “Şäñcan-Uyğır avtonomiyäle töbäge – Qıtaynıñ Tatarstanda aktiv dialog üseşe alğan cirlekläreneñ berse. Awıl xucalığı, tözeleş, mediśina tarmağındağı urtaq proyektlar turında fiker alışu buldı,”-dide ul. Märdan Mukiyit isä älege forumğa çaqırıluı öçen räxmät belderde häm üzläre öçen östenlekle tarmaqnıñ awıl xucalığı buluın belderde. Çönki Şäñcan – Qıtaynıñ töp awıl xucalığı töbäge, 11 million gektardan artıq çiräm cirläre bar.

Qazan xalıqara aêroportınıñ yaña terminalı tözeläçäk

2023nçe yılnıñ axırına qadär “Qazan” xalıqara aêroportınıñ yaña passajir terminalın proyektlaw başlanaçaq. Tatarstan transport häm yul xucalığı ministrı Färit Xänifov beldergänçä, êşlängän texnik birem Mäskäwgä cibärelgän. Xäzer anıñ tiyeşle oyışmalar tarafınnan raslanuın kötälär. “Şunnan soñ proyektlaw başlana. Bezneñ master-plan äzer, yaqınça qayda nindi binalar, nindi perron häm başqalar buluın beläbez,”-dip söyli ministr massaküläm mäğ’lümat çaralarına interv’yusında.

Böyek şağıyrebez Ğabdulla Tuqay isemen yörtüçe “Qazan” xalıqara aêroportın üsterü planı uzğan yıl qabul itelde. Anda farazlanğança, 2025nçe yılğa yulçılar ağımı 17 million keşegä citäçäk.

“Tatar qızı” bäygeseneñ finalına äzerlek başlandı

Qazanda “Tatar qızı” bäygeseneñ xalıqara êtabı finalına äzerlek başlandı. Üzbäkstanda uzaçaq çarada Rusiyäneñ törle töbäkläre häm çit illärdän kilgän 13 qız qatnaşa. Bäygeneñ xalıqara êtabı törle säbäplär arqasında kiçekterelde. 2021nçe yılğı töbäk ciñüçelären şul uq yılnı Qazanda uzğan yarımfinalda sınadılar. Menä xäzer ike yıldan soñ final uzaçaq. Ni öçen Üzbäkstanda? Çönki 2019nçı yılğı xalıqara êtap ciñüçese Üzbäkstannan Liliyä Kamilova bulğan ide.

Final bäygese 17nçe sentyabr’gä bilgelängän. Aña qadär qızlar ike atna däwamında biyü, vokal, sänğat’le söyläm däresläre ala.

Tapşırunı äzerlägändä Tatarstan Räiseneñ matbuğat xezmäte, “Tatar-inform” xäbär agentlığı häm “İntertat” gazetı yazmaları qullanıldı.