Tatarstan xäbärläre 50/2023

Törkiyädä berençe tapqır Ğayaz İsxaqıy yözüläre uzdı

13 avgustta Türkiyäneñ Antaliya şähärendä Ğayaz İsxaqıynıñ 145 yıllığına bağışlanğan suda yözülär uzdı. Ul Urta diñgez buyında urnaşqan Sarısu plyajında oyıştırıldı.

Çaranı “Azatlıq” tatar yäş’läre berlege ütkärde. Anda 200dän artıq keşe qatnaştı.

“Azatlıq” tatar yäş’läre berlege İsxaqıy yözüläre tarixta berençe tapqır uzdı dip belderde. Qatnaşuçılar öçen maxsus istälekle büläklär äzerlände. Mäsälän, yazuçı süräte bastırılğan, Tatarstan bayraqlı medal’lär, buqçalar, futbolkalar, tüştamğalar yasalğan.
İsxaqıy yözülärendä ölkännär dä, balalar da qatnaştı. Härbersenä qatnaşqan öçen büläklär birelde. Tirä-yaq Tatarstan bayraqları belän bizälgän, start, finiş urınında tatar yazuçısı Ğayaz İsxaqıy räseme yasalğan êlmä banerlar êlende.

İsxaqıy yözülärendä qatnaşuçılarğa samovarda mätrüşkäle çäy äzerlängän, it qızdırılğan, mädäni programma da oyıştırıldı. Ğarmun, gitara belän tatarlar tuğan teldä tatar cırların başqardı, tatarça biyede.

“Tatmedia” binası yanında Robert Miñnullinğa bağışlanğan Saban tuyı uzdı

Kiçä “Tatmedia” binası yanındağı skverda “Sabantuy” balalar jurnalı Tatarstannıñ xalıq şağıyre, jurnalist Robert Miñnullinnıñ 75 yıllığına bağışlanğan “Robert Miñnullin Saban tuyı” dip isemläñgän icadi bäyräm oyıştırdı.

Çarağa Robert Miñnullinnıñ xäläl cefete Klara xanım, qızı Tañsılu Sabirova, ênese Kim Miñnullin, onıqları, dusları, qalämdäşläre häm icatın söyüçelär kilgän ide.

Qunaqlarğa “Sabantuy” jurnalınıñ Robert Miñnullinğa bağışlanğan avgust sanı täqdim itelde. Älege sanda şağıyr’neñ tormış yulı, icatı, ğailä al’bomnarındağı fotolar, ädipneñ icatına bäyle uyınnar bar.

Bäyrämdä cırçı Dilä Niğmätullina, “Batır yegetläre” törkeme, “SalavaTik”lar törkeme qatnaştı. Artistlar Robert Miñnullin süzlärenä icat itelgän cırlarnı başqardı. Tamaşaçılar “Äni kiräk”, “Yaratığız!” kebek cırlarğa quşılıp cırladı. Balalar Saban tuyı uyınnarında häm lotereyada da qatnaştı.

XVI (16nçı) Bötenrusiyä möselman yäş’läre forumında 100 möselman qatnaşaçaq

2023 yılnıñ 16 avgustında Näzarättä XVI Bötenrusiyä möselman yäş’läre forumınıñ tantanalı açılışı uzaçaq. Forum êşendä İndoneziya, Misır, London, Qırım, Başqortostan, Kabardo-Balkar (Nal’çik), Çuvaşstan häm Tatarstan respublikaları, Perm’ krayı, Mäskäw, Ästerxan, Vladikavkaz, Sverdlovsk ölkäläre, İjevsk, Yoşkar-Ola, Samara häm Xantı-Mansi şähärlärennän 18-30 yäş’lek 100 möselman qatnaşaçaq.

Forum 16-23 avgust könnärendä Bolğarda palatkalı şähärçek formatında uzaçaq. Töp tema – möselmannar arasında xäyriyä êşçänlege.

Forum yäş’lärgä Rusiyä möselman cämäğat’çelege tormışındağı törle mäs’älälärne xäl itügä qağılışlı soŝial’ startaplarnı oyıştırırğa öyränü öçen mäydançık bulıp toraçaq. Yäş’lär tulısınça äzer proyekt belän dä kilä alalar, alar anı tağın da şomartıp, Tatarstan Respublikası yäki Rusiyä külämendä ütkärelä torğan grant konkurslarda täqdim itä alaçaqlar. Forum näticäläre buyınça iñ yaxşı proyekt saylap alınaçaq.

Törkiyädä “Yaña Törkiyä” akademik jurnalı İdel-Ural törekläre turında maxsus sannar çığardı

Törkiyädä “Yaña Törkiyä” («Yeni Türkiye») akademik jurnalınıñ 131 häm 132nçe sannarı “İdel-Ural törekläreneñ maxsus sanı” bularaq dön’ya kürde. İke san 500 bittän ğıybarät. Tatar, Çuvaş, başqort, noğay, qıpçaq, qırım tatarlarına qağılışlı barlığı 43 mäqalä tuplanğan.

“Mäqalälärneñ avtorları – Törkiyäneñ fän-ğıylem ölkäse wäkilläre. Alar arasında bügenge köndä tatar tarixı, ädäbiyatına qağılışlı törekçä yazılğan xezmätläre belän mäğlüm İl’yas Qamaloğlu “Törek häm mongol tarixlarında “Tatar” mäs’äläse”, “İdel-Ural bülgesendä İslamiyät”, Çulpan Zaripova-Çätin “Qazan tatarları rivayät’lärendä möbäräk zatlar”, Roza Qorban “Tuuınıñ 145nçe yılında jurnalist, yazuçı, säyäsätçe Ğayaz İsxaqıynıñ köndälekläre” dip atalğan mäqaläläre belän urın alğan”, - dip xäbär itte “Tatar-inform”ğa Törkiyädä yäşäp icat itüçe jurnalist, yazuçı Ayziräk Gäräyeva-Aqçura.

Basmada Başqortstan, Tatarstan häm Çuvaşiya respublikaları urnaşqan cirlärneñ törkilär yäşägän urınnar buluı turında iskärtelä.

“Yaña Törkiyä” (“Yeni Türkiye”) dip atalğan akademik basma 1994 yıldan birle çığa, ike ayğa ber basıla.