Tatarstan xäbärläre 42/2023
Тaтaрстaндa һәм тaтaр дөньясындa булып узгaн кaйбeр вaкыйгaлaргa кыскaчa күзәтү / Tatarstanda häm tatar dönyasında bulıp uzğan qayber waqiğalarğa qısqaça küzätü
Tatarstan Räise Röstäm Miñnexanov Azärbaycanğa êş säfären yasadı
Êşlekle säfär waqıtında Tatarstan Räise Röstäm Miñnexanov häm Azärbaycan İlbaşı İlham Äliyıv “QAMAZ” ğavämi akśionerlıq cämğıyäteneñ häm Gäncä avtomobil’ êşxanäse qatnaşında tözelgän “Auto Leasing Azerbaijan” servis üzägen açtı.
İlham Äliyıv bilgeläp ütkänçä, üzäk bik kiräkle, çönki cirlektä zur külämle tözeleş êşläre alıp barıla, alarda yözlägän berämlek texnika cälep itelgän.
Röstäm Miñnexanov üz çiratında Azärbaycan Däwlät başlığına proyıktqa şäxsi iğ’tibar kürsätkäne öçen räxmät belderde.
Azärbaycanğa êş säfäre belän kilgän Tatarstan Räise Röstäm Miñnexanov Baqı üzägendä yar buyında oyıştırılğan Saban tuyında buldı. Bu xaqta Tatarstan citäkçeseneñ matbuğat xezmäte xäbär itä.
Miñnexanov bäyrämdä qatnaşuçılarnı häm qunaqlarnı sälamläde. “Tatar xalqı qayda ğına yäşämäsen, Saban tuyı bezneñ barıbız öçen dä iñ yaratqan häm kötep alğan bäyrämnärneñ berse bulıp qala. Anıñ unikal’lege – barlıq millät häm din wäkillären ber mäydançıqta berläşterüendä”, - dip iskärtte ul.
Soñğı mäğ’lümatlärgä qarağanda, Azärbaycanda 27 meñnän artıq tatar ildäşe yäşi. Biredä “Yäş’lek” Azärbaycan Tatar yäş’läre üzäge, “Tuğan tel” Respublika tatar mädäniyäte cämğıyäte, “Tatarstan” ictimağıy berläşmäse, “Aq qalfaq” tatar xatın-qızları cämğıyäte bülege häm başqa berläşmälär, üzeşçän sänğat’ kollektivları êşläp kilä.
“Azärbaycan häm Tatarstan arasındağı êlemtälär yıldan-yıl nığıy. Sezneñ tırışlıq belän biredä tatar tormışı görli”, - dip belderde Tatarstan Cömhüriyäte Räise.
Monnan tış Saban tuyı qunaqların Azärbaycan Prezidentı İlham Äliyıv isemennän respublika iq’tisad ministrı da sälamläde.
Qırğızstanda Urta Aziya tatarları al’yansın oyıştıru utırışı ütkärelde
Bötendönya tatar kongressı Milli Şura räiseneñ berençe urınbasarı, Bötendönya tatar kongressı Başqarma komitetı citäkçese Danis Şakirov Qırğızstan Cömhüriyätenä êş säfären yasadı. Biredä Urta Aziya al’yansın oyıştıru utırışı uzdı.
Utırışta onlayn häm oflayn formatta Qazaqstan, Qırğızstan, Üzbäkstan häm Tacikstan tatar oyışmaları wäkilläre qatnaştı.
Qatnaşuçılarnı Bötendönya tatar kongressı Başqarma komitetı citäkçese Danis Şakirov häm Qırğızstan Respublikasında “Rossotrudniçestvo” wäkilçelege citäkçese Al’bert Zölxarneyıv sälamläde. Kiñäşmädä Üzäk Aziya al’yansınıñ möhimlege turında söyläştelär.
Qatnaşuçılar bertawıştan Üzäk Aziya tatarları al’yansın tözü turında qarar qabul ittelär. Citäkçe itep Qırğızstan Respublikasınıñ “Tuğan tel” tatar-başqort mädäni üzäge” ictimağıy berläşmäse räise Gölsinä Ülmäsqulova saylandı. Urınbasarı – Qazaqstannıñ Tatar-başqort kongressı räise urınbasarı Grif Xäyrullin.
Bolğarda Bötenrusiyä möselman yäş’läre cıyılaçaq
2023nçe yılnıñ 16nçı-23nçe avgust könnärendä Tatarstanda Bolğarda Bötenrusiyä möselman yäş’läre forumı uzaçaq. Cıyınnı oyıştıruçılar – Tatarstan möselmannarı Diniyä näzaräte häm İslam mädäniyäte, fäne häm mäğarifenä yärdäm kürsätü fondı. Bu xaqta Tatarstan Cömhüriyäte Diniyä näzaräte matbuğat xezmäte xäbär itä.
Ber atna däwamında uzaçaq älege çarağa 18-30 yäş’lek möselmannar häm möslimälär çaqırıla. Barlığı 130 keşeneñ qatnaşuı kötelä. Forumğa ğarizalar 2023nçe yılnıñ 15nçe iyülenä qadär qabul itelä.
Möselmannarnıñ küçmä cıyını tarixi cirlektä palatkalar şähärçegendä uzaçaq. Forumda qatnaşuçılarnıñ geografiyäse Rusiyäneñ törle şähärlären qolaçlar dip kötelä, töp temalarnıñ berse bularaq xäyriyä êşçänlege, xäyriyäçelek tarixı turında söyläw planlaştırıla.
Forumnıñ töp maqsatı – aralaşu moxiten tudıru, yäş’lärneñ başlanğıçlarına, ayırım alğanda möselman yäş’lärenä tormışta üz-üzlären tabarğa yärdäm itü, ruxi dönyanı bayıtu. Ğıyl’mi, icadi häm täcribävi çaralar aşa möselman yäş’läre üzläre uylap tapqan yaña sośial’ proyıktlarnı êşlärgä öyränäçäk.
Bügenge yazmabızda Tatarstan Räiseneñ matbuğat xezmäte belän “Tatar-inform” xäbär agentlığı häm Bötendönya tatar kongressı yazmaları qullanıldı.
