Törki cömhüriyätlärdä bulıp uzğan waqıyğalar

“Awraziya qaytawazı” tapşıruınıñ bügenge çığarılışında uzğan atnada törki cömhüriyätlärdä bulğan möhim waqıyğalar xaqında süz alıp barabız.

29 nçı mayda Astana şähärendä Xalıqara törki akademiya tarafınnan Törki dön’ya urtaq alfavit komissiyäseneñ berençe cıyılışı ütte. Dürt utırıştan torğan cıyılışta törki cömhüriyätlärneñ bäyläneşle oyışmalaırınıñ citäkçeläre häm belgeçlär qatnaştı.

30 nçı mayda Qırğızstan tışqı êşlär ministrı Cäänbäk Kulubayevnı Mongoliya ilbaşı Uxnaagiyn Xürêlsüx qabul itte. Oçraşuda ike il mönäsäbätlären yaña däräcägä kütärü turında söyläştelär. Säfär axırında ministr Kulubayev Qırğızstan ilbaşı Sadır Caparovnıñ iyül’ ayında Mongoliyägä kiläçägen häm Ulan - Batorda Qırğızstannıñ tulı wäqalätle ilçelege açılaçağın äytte.

30-31 nçe may könnärendä Törekmänstan Xalıq mäsläxäte räise Ğorbanğulı Bärdemöxämmädov İran İslam Cömhüriyätenä êşlekle säfär qıldı. Ul İranda ilbaşıı İbrahim Räisi, dini lider Ali Hamaney, parlament spikerı Möxämmäd Bager Galibaf belän ayırım oçraşular ütkärde. Söyläşülär näticäsendä ike il arasında 5 kileşü imzalandı. İran ilbaşı İbrahim Räisi belän Törekmänstan Xalıq mäsläxäte räise Ğorbanğulı Bärdemöxämmädov urtaq beldergegä qul quydılar.

31 nçe may - 8 nçe iyün’ könnärendä Awrupa iminlek häm xezmättäşlek oyışması ğomum särqatibe Xel’ga Mariya Şmidt Törekmänstan, Qırğızstan häm Qazaqstan cömhüriyätlärenä säfär yasıy. Ul Törekmänstanda ilbaşı, xalıq mäsläxäte räise, parlament spikerı, tışqı êşlär ministrı wäkile häm Törekmänstan ombudsmenı belän oçraşular ütkärde. Şmidt şulay uq Awrupa iminlek häm xezmättäşlek oyışmasınıñ Törekmänstandağı yaña ofisın açtı. Awrupa iminlek häm xezmättäşlek oyışması ğomum särqatibe Xel’ga Mariya Şmidt uzğan yıl Üzbäkstanda häm Tacikstanda bulıp qayttı.

1 nçe iyün’dä Üzbäkstan ilbaşı Şäwkät Mirziyayev Kön’yaq Koreya Cömhüriyäte tışqı êşlär ministrı Pak Çinnı qabul itte. Oçraşu waqıtında Üzbäkstan – Kön’yaq Koreya mönäsäbätlärenä qağılışlı törle mäs’älälär qaraldı.

2 nçe iyün’dä Qırğızstannıñ  Çulpan – Ata şähärendä 2 nçe Üzäk Aziya – Awrupa Berlege sammitı ütte. Sammitta Awrupa Berlege başlığı, Qazaqstan, Qırğızstan, Üzbäkstan häm Tacikstan ilbaşları ,Törekmänstan viśe-prem’yerı qatnaştılar. Sammit axırında urtaq matbuğat belderüe yasaldı. İsegezgä töşeräbez: 2 nçe Üzäk Aziya – Awrupa Berlege iq’tisadi forumı 18-19 nçı may könnärendä Almatıda ütte.

Qırğızstanğa säfäre qısalarında Awrupa Berlege başlığı Şarl’ Mişel’ ikençe könne räsmi oçraşular ütkärde. Qırğızstan ilbaşı Sadır Caparov häm Awrupa Berlege başlığı Şarl’ Mişel’ ike yaqlı mönäsäbätlär, regional’ mäs’älälär turında söyläştelär.

Qabattan Türkiyä ilbaşı bulıp saylanğan Räcäp Tayyip Ärdoğannıñ 3 nçe iyün’dä uzğan ant itü tantanasında törki cömhüriyätlär ilbaşları häm Vengriya prem’yer-ministrı qatnaştı. Tantanada Ärmänstan prem’yer-ministrı Nikol Paşinyannıñ da qatnaşuı Kön’yaq Kavkaznıñ üseşe öçen kiläse çorda uñay üzgäreşlär bulaçağın kürsätä.