Törki cömhüriyätlärdä bulıp uzğan waqıyğalar

“Awraziya qaytawazı” tapşıruınıñ bügenge çığarılışında uzğan atnada törki cömhüriyätlärdä bulğan möhim waqıyğalar xaqında süz alıp barabız.

Ağımdağı yılnıñ 30 nçı aprelendä Üzbäkstanda Konstituśiyägä üzgäreşlär kertü referendumı ütkärelde. Referendumda qatnaşuçılarnıñ 90,21%ı Töp Qanun üzgäreşen xupladılar. Yaña Konstituśiya nigezendä ilbaşınıñ wazıyfa başqaru waqıtı 5 yıldan 7 yılğa qadär arttı häm Senat äğ’zaları sanı 100 dän 65 kä töşerelde.

Üzbäkstan ilbaşı Şäwkät Mirziyayev 2-4 may könnärendä Germaniyägä räsmi säfär belän kilde. 2 nçe mayda ul Germaniya kanślerı Olaf Şol’ś belän oçraştı. Söyläşülärdän soñ ike il arasında 16 kileşügä imza salındı. 3 nçe mayda Şäwkät Mirziyayev Germaniya ilbaşı Frank - Val’ter Ştaynmayer belän oçraştı. Säfär qısalarında uzğan Germaniya - Üzbäkstan Êş forumında 9 milliard dollarlq ike yaqlı kileşülär imzalandı.

Üzbäkstan häm Qırğızstan parlamentları ike il grajdannarına çit il pasportsız, êçke pasport belän kerü-kitü xoquqın birüçe kileşüne rasladı. Türkiyä häm Azärbaycan watandaşları da bu räweşle säyäxät itä ala. Törki däwlätlär oyışmasına äğ’za illär üz grajdannarına çit il pasportsız, üz illärendäge êçke pasport yäki kemlek tanıqlığı belän irekle säyäxät itü xoquqın birergä tiyeş.

4 nçe mayda Tacikstan ilbaşı İmamali Raxman Qazaqstanğa säfär qıldı. Qazaqstan ilbaşı Qasıym-Cumart Toqayev Astanada Tacikstan ilbaşı Raxman belän kiñ qırlı söyläşülär ütkärde. Söyläşülär näticäsendä yaqlar arasında 9 kileşü, şul isäptän berlek kileşüe, imzalandı. Säfär qısalarında uzğan Qazaqstan -Tacikstan Êş forumında 1 milliard 800 million dollarlıq kileşülärgä qul quyıldı.

Qazaqstan prem’yer - ministrı Älixan Smailov 5 nçe mayda Üzbäkstanda buldı. İke il prem’yer-ministrları Taşkentta 20 nçe Qazaqstan - Üzbäkstan xökümätara xezmättäşlek komissiyäse cıyılışın citäklädelär. Älixan Smailovnı Üzbäkstan ilbaşı Şäwkät Mirziyayev ta qabul itte.

Vengriya parlamentı spikerı Laslo Köver 4-7 nçe may könnärendä Mongoliyağa räsmi säfär belän kilde. Ul Mongoliyadağı xezmättäşe Zardanşatar Gombojav häm prem’yer-ministr Oyun-Êrden Lyuvsannamsrey belän oçraştı.

4 nçe mayda Vengriya tışqı êşlär häm tışqı säwdä ministrı Piter Sijarto Türkiyädä buldı. Ul Vengriya brendı “Meditor Medical” nıñ açılışında qatnaştı.

5 nçe mayda İrannıñ yaña bilgelängän Merv baş konsulı Abdulmäcit Kamcoo Törekmänstan tışqı êşlär ministrı urınbasarı Berdiniyaz Myatiyev belän oçraştı. Şulay itep İrannıñ Törekmänstandağı Merv baş konsullığına êşläw xoquqı birelde.

Uzğan atnada Futbol assośiaśiyäläreneñ xalıqara federaśiyäse FIFA başlığı Djovanni Vinçenśo İnfantino Üzäk Aziya turı qısalarında Qazaqstan, Qırğızstan, Üzbäkstan häm Törekmänstanda buldı. FIFA başlığı älege illärneñ däwlät başlıqları belän oçraşular ütkärde.

4 nçe mayda İstanbuldağı Atatörek mädäniyät üzägendä İstanbul - 2023 Törki dön’yanıñ yäş’lär başqalasın açu tantanası ütte. Açılışta Törki däwlätlär oyışmasına äğ’za illärneñ yäş’lär häm sport ministrları, alarnıñ  urınbasarları qatnaştı.