Awraziya Cömhüriyätläreneñ kön tärtibendäge waqıyğalar
Awraziya qaytawazı - 35/2023
Uzğan atnada Awraziya cömhüriyätlärendä möhim säfärlär yasaldı häm waqıyğalar buldı.
Qıtay Xalıq Cömhüriyäteneñ saqlanu ministrı Li Şangfu berençe çit il säfären 2023nçe yılnıñ 16nçı-18nçe aprel’ könnärendä Rusiyä Federaśiyäsenä yasadı. 17nçe aprel’ könne Rusiyä İlbaşı Vladimir Putin Qıtay saqlanu ministrın qabul itte. İkençe könne ministr Li Şangfu Rusiyä saqlanu ministrı Sergey Şoygu belän küreşte. Söyläşü waqıtında ike ilneñ saqlanu xezmättäşlegeneñ möhimlegenä basım yasaldı. İsegezgä töşerep uzıyq: Amerika Quşma Ştatları Li Şangfuğa sankśiya kertkän ide.
2023nçe yılnıñ 17nçe aprel’ könne Tatarstan Cömhüriyäte Räise Röstäm Miñnexanovnıñ Moldovağa kerüenä röxsät itelmäde. Gagauziyada oyıştırılğan xalıqara xalıq diplomatiyası kongressında qatnaşu öçen Moldovağa kilgän Röstäm Miñnexanov Könbatışnıñ sankśiyälär isemlegendä bulğanı öçen aêroporttan kire qaytırğa mäcbür buldı. Küptän tügel Gagauziya İlbaşı namzäte Viktor Petrov Tatarstanğa säfär yasağan häm Röstäm Miñnexanovnı ilenä çaqırğan ide.
İzrail tışqı êşlär ministrı Êli Koên 2023nçe yılnıñ 19nçı-20nçe aprel’ könnärendä Azärbaycan belän Törekmänstanğa diplomatik säfär yasadı. Ministr Êli Koên Baqıda Azärbaycan İlbaşı İlham Äliyıv tarafınnan qabul itelde. Azärbaycan tışqı êşlär ministrı Cäyhun Bayramov belän Êli Koên oçraşuı waqıtında ike il mönäsäbätlärenä qağılışlı törle mäs’älälär quzğatıldı.
İzrail tışqı êşlär ministrı Koên 2023nçe yılnıñ 20nçe aprel’ könne Törekmänstan İlbaşı Särdar Bärdimöxamädov belän küreşep söyläşte häm şul uq könne törekmän wazıyfadaşı Raşid Märädov belän ike yaqlı häm regional’ mäs’älälärdä kiñ qırlı söyläşü ütkärde. İke ministr soñınnan İzrailneñ Aşxabad ilçelegeneñ yaña binasın açtılar. Êli Koên soñğı 29 yılda Törekmänstanğa säfär yasağan berençe İzrail tışqı êşlär ministrı buldı. Azärbaycannan soñ Törekmänstan da İzraildä ilçelek açunı planlaştıra.
Amerika Quşma Ştatları däwlät särkätibe Êntoni Blinken fevral’ ayınıñ axırı belän mart ayınıñ başında Qazaqstan belän Üzbäkstanğa säfär yasağan ide. Amerika Quşma Ştatlarınıñ Rusiyä tiräsendäge Awraziya illäre belän mönäsäbätlärenä östenlek birüe soñğı waqıtta yış ütkärelgän oçraşulardan da añlaşıla. Mäsälän, 5nçe aprel’ könne Törekmänstan İlbaşı Särdar Bärdimöxamädov ildä bulğan AQŞ êşmäkärläre wäkillegen qabul itte.
7nçe aprel’ könne Amerika Quşma Ştatları däwlät särkätibeneñ Kön’yaq häm Üzäk Aziya êşlärennän cawaplı urınbasarı Donal’d Lu Qırğızstan Cömhüriyäte tışqı êşlär ministrı urınbasarı Aibäk Moldogaziyıv belän Waşingtonda oçraşu ütkärde. Donal’d Lu 22nçe-27nçe aprel’ könnärendä Qırğızstanğa häm Tacikstanğa säfär yasadı.
AQŞ däwlät särkätibe urınbasarı Viktoriya Nuland 2023nçe yılnıñ 19nçı-20nçe aprel’ könnärendä Mongoliyağa säfär yasadı. Viktoriya Nuland Ulan Batorda Mongoliya Baş ministrı Luvsannamsrain Oyun-Ärdänä häm Mongoliya tışqı êşlär ministrı Batmunkh Battsetseg belän ayırım-ayırım küreşte.
19nçı aprel’ könne Azärbaycan İlbaşı İlham Äliyıv AQŞ däwlät departamentınıñ Awrupa häm Awraziya êşläre byurosı kiñäşçe urınbasarı Êrika Olson belän küreşep söyläşte. Êrika Olson şuşı uq könne Ärmänstan Baş ministrı Nikol Paşinyan belän dä söyläşü ütkärde.
5nçe aprel’ könne Amerika Quşma Ştatları xökümäte Gruziyanıñ 3 sudyasına qarata çikläw-sankśiya kertüen belderde.
Abdrasul İsakov
