Tatarstan xäbärläre 34/2023

Qazan Kremlendä berençe tapqır marketing buyına konferenŝiya uzaçaq

Çara 100dän artıq qatnaşuçını berläşteräçäk.

25 aprel’dä Qazan Kremleneñ Gavami urınnarında marketing buyınça buşlay konferenŝiya uzaçaq. Ul “Marketing ölkäsendä niçek üsärgä häm kliyentlarğa yaxşı näticä birergä” digän temağa bağışlana. Çara agentlıklar, SMM-belgeçlär, marketologlar, dizaynerlar, trafik buyınça belgelär öçen ütkärelä. Konferenŝiyaneñ oyıştıruçısı – «MOBi digital» marketing agentlığı.

Çarada real’ keyslar misallarında 2023 yılda marketing ölkäsendä näticägä ireşü öçen üseş instrumentları turında söyläyäçäklär.

İskärtep uzıyq, «MOBi digital» marketing agentlığı 2019 yıldan birle êşli. Anda 20 belgeç xezmät quya. Agentlıknıñ töp üzenälege – böten didjital-instrumentlarnıñ ber cirdä berläşüe.

Agentlık Rusiyä, Berläşkän Ğaräp Ämirlekläre, Türkiyä, İndoneziya, AQŞ kompaniyaläre belän xezmättäşlek itä.

Qazanda Ciñü könen bäyräm itü programması bilgele

2023 yılda Tatarstan başqalasında Ciñü könen bäyräm itüneñ masştablı programması 140qa yaqın çaranı – konŝertlarnı, açıq hawadağı muzeylarnı, istälekle mäydançıqlar açunı, xalıqara häm federal’ akŝiyalärne häm başqa aktivlıklarnı üz êçenä alaçaq. Bu xaqta êşlekle düşämbedä Qazannıñ mädäniyät idaräse başlığı Azat Abzalov xäbär itte.

Ul aprel’ urtasınnan başqalada Ciñü könenä bağışlanğan patriotik çaralar başlanuın östäp äytte. Bu temağa mäktäplärdä sıynıf sägät’läre, konkurslar, konŝertlar, kürgäzmälär häm sport yarışları bağışlana.

4 mayda Musa Cälil isemendäge opera häm balet teatrında Ciñüneñ 78 yıllığına bağışlanğan respublika çarası böten respublika veterannarı qatnaşında uzaçaq. Şulay uq 6 mayda Gorki-Ämät urmanında kvestlar häm qır kuxnyası belän açıq hawada interaktiv muzey formatında bäyräm oyıştırıla.

Ğabdulla Tuqay isemendäge däwlät premiyase külämen ike tapqır arttırdılar

Bötendön’ya tatar kongressı saytı citkergänçä Tatarstanda Ğabdulla Tuqay isemendäge däwlät premiyase külämen ike tapqır – 500 meñ sunman 1 million sumğa qadär arttırdılar. Bu turıda qararnı Tatarstan Räise Röstäm Miñnexanov imzaladı.

“1 punktnıñ ikençe abzaŝında “härberse biş yöz meñ sum” süzlären “härberse ber million sum” süzlärenä almaştırırğa”, diyelä tekstta.

İsegezgä töşeräbez, premiya yıl sayın respublikanıñ 3 mädäniyä xezmätkärenä yäki kollektivına birelä. Büläkläw tantanası Ğabdulla Tuqay tuğan könendä – 26 aprel’dä uza.

Mäskäwdä Mostay Kärim poveste buyınça töşerelgän fil’m prem’yerası buldı

Rusiyä başqalasınıñ “Xodujestvennıy” kinoteatrında 45nçe Mäskäw xalıqara kinofestivale qısalarında “Pomilovaniye” (“Yarlıqaw”) kinokartinasınıñ prem’yerası buldı.

Fil’mğa başkort sovet ädäbiyatı klassiğı Mostay Kärimneñ şul isemdäge poveste nigez itep alınğan. 4 mayda kinokartina ğomumrossiya prokatına çığa.

Ul Ufa, Qazan häm Tübän Novgorod şähärlärendä kürsäteläçäk. Bu xaqta “Başinform” agentlığı xäbär itä.

Kino töşerü törkemen kotlarğa artistlar, mädäniyät häm sänğat’ êşlekleläre, populyar blogerlar häm muzıkantlar kilde.

Fil’mnı Rusiyä Federaŝiyase Mädäniyät ministrlığı häm Mostay Kärim isemendäge fond yärdämendä “Motor fil’m studiya” kinokompaniyase töşergän.

Mäskäwdä mini-futbol buyınça “İzge Ramazan Kubogı” turnirınıñ final êtabı uzaçaq

Mäskäwdä 28-30 aprel’dä mini-futbol buyınça “İzge Ramazan Kubogı” Açıq Xalıqara turnirınıñ final êtabı uzaçaq.

Matçlarnı “Yaña liga” sport kompleksı qabul itäçäk. Comğa könne 28 aprel’dä Moscow Marriott Grand Hotel qunaqxanäsendä matbuğat konferenŝiyase uzaçaq. Turnirda qatnaşunı Tatarstan Respublikası, Mordoviya, Krasnoyarsk kraye, Mäskäw ölkäse, Mäskäw avtonomiyase komandası, Mäskäw, Äfğanstan, Azäerbaycan, Qazaqstan tatarları avtonomiyase komandaları rasladı.

“İzge Ramazan Kubogı” turnirınıñ final êtabında qatnaşu öçen komandalar töbäk turnirlarında saylap alu êtapların uzalar yäki töbäkneñ cıyılma komandaları formalaştırıla. Final ‘etabında 4 törkemgä bülengän 16 komanda çığış yasayaçaq. Törkemnärdä turnir ber tügäräk sisteması buyınça uzaçaq. Här törkemdä berençe ike urınnı alğan komandalar ber-berse belän oçraşalar, annarı bu matçlarda ciñüçelär çirekfinalda, yarımfinal häm finalda uynıylar.