Törek aş-su ostaları
Bolarnı beläsezme? 29/2023
Bolarnı beläsezme? 29/2023
Dön’yaküläm tanılğan peşekçelär arasında törek aş-su ostalarınıñ da buluın beläsezme?
Dön’yanıñ iñ yaxşı 50 restoranı arasında bulğan häm İstanbulda urnaşqan “Mikla” peşekçe Mäxmät Gürsneñ “yaña Anadolu rizıqları” bularaq tanıtılğan menyusı belän iğ’tibarnı cälep itä. Finlyandiyada tuıp Şveśiyada üskän aş peşerüçese Mäxmät Gürs ozaq yıllar buyı Amerika Quşma Ştatlarında êşlägännän soñ häm kulinariya belemen alğannan soñ 1996nçı yıldan birle İstanbul aş-su kul’turasına yaña baylıqlar östi başlıy.
Törek peşekçeläre barı tik Türkiyädä genä tügel, dönyada da isemnären işetterä. 10 yäşendä bulğan çaqta ğailäse belän bergä Germaniyağa küçep kitkän Tuncälile Ali Güngörmüş “Mişlen” yoldızlı berençe törek aş-su ostası däräcäsenä iyä. Ätise êşçe bulıp êşlägän Germaniyağa küçkän Ali Güngörmüş yäş’ çaqta qızıqsına başlağan kulinariya belemen berençelek belän tämamlıy häm Germaniyadağı Mişlen yoldızlı küp sanda restoranda êşli. Törek mädäniyäte häm rizıqlarınıñ uram tämen, läzzäten qıyu räweştä lyuks aşaw urınnarına caylaştırğan, 27 yäşendä Urta diñgez aş-suları konśepśiyası belän üz restoranın açqan peşekçe biredä Mişlen yoldızlı berençe törek aş-su ostası isemen qazana.
Germaniyada tuıp üskän 35 yäşendäge aş peşerüçe Särkan Güzälçoban da dönyada Mişlen yoldızın alğan ikençe törek peşekçese. Dänizlile äniseneñ reśeptlarınnan ilhamlanğan Güzälçoban restoranında gastronomiya häm täm-läzzät qadär sośial’ cawaplılıqqa da ähämiyät birä. Tanılğan aş-su ostasınıñ restoran kuxnyasında häm xezmätendä êşläwçelärneñ kübese fizik häm psixik (aqıl yağınnan) mömkinlekläre çiklängännärdän (ğariplärdän) tora.
Aziyanıñ iñ yaxşı 50 restoranı arasında 36nçı urında torğan Bangkoktağı ber restorannıñ aş bülmäsendä dä şulay uq törek aşçısı bar. Bolu Mängän aş peşerü mäktäben betergän Fatih Tutak Yıraq Könçığışnıñ törle rizıq kul’turası arasına törek tarixınnan ilham alıp buldırğan tulısınça törek-Urta diñgez stilendäge menyunı kertä alğan.
Törek aş-suları bay törläre häm täm-läzzäte belän bulğanı qadär sälamät häm balanslı tuqlanuğa yaraşlı, xätta vegetarian rizıqlarına da çığanaq bula alğan misalları belän könnän-kön tağın da kübräk iğ’tibar cälep itä häm saylap alına.
