Törki cömhüriyätlärdä bulıp uzğan waqıyğalar

Uzğan atnada törki cömhüriyätlärdä möhim säfärlär häm forumnar uzdı, Törki dön’ya yazuçılar berlege oyıştı.

9 nçı martta Üzbäkstan ilbaşı Şäwkät Mirziyayev Qırğızstan prem’yer-ministrı Akılbäk Caparovnı qabul itte. Oçraşuda Üzbäkstan-Qırğızstan mönäsäbätlären qızıqsındıruçı urtaq gidroêlektrostanśiya häm timer yul tözeleşe kebek mäs’älälär qaraldı. Monnan tış Mirziyayev häm Caparov regional’ mäs’älälär xaqında fiker alıştılar. Qırğızstan prem’yer-ministrı Akılbäk Caparov Üzbäkstanğa säfäre qısalarında Taşkentta Üzbäkstan prem’yer-ministrı Abdulla Aripov belän oçraştı. Söyläşülärdän soñ ike il xökümätläre arasında 15 kileşü imzalandı häm Üzara säwdä yortların açu turında kileşü täêmin itelde.

Mongoliya tışqı êşlär ministrı Batmunx Batśeśeg 7-10 mart könnärendä Üzbäkstanğa räsmi säfär qıldı. Ul Taşkentta Üzbäkstan tışqı êşlär, transport, investiśiyälär häm säwdä ministrları belän oçraştı. Mongoliya tışqı êşlär ministrınıñ Üzbäkstanğa säfäre soñğı 30 yılda Mongoliya tışqı êşlär ministrı tarafınnan bu ilgä tormışqa aşırılğan berençe säfär buldı.

9 nçı martta Törekmänstan tışqı êşlär ministrı Räşit Märädovnı Tacikstan ilbaşı İmamali Raxman qabul itte. Oçraşuda ike yaqlı häm regional’ mäs’älälär söyläşelde. Märädov säfär qısalarında Tacikstan tışqı êşlär ministrı Siraceddin Muhriddin belän dä küreşep söyläşte. Törekmänstan ilbaşı Särdar Bärdemöxämmädov aprel’ başında Tacikstanğa räsmi säfär yasayaçaq.

10 nçı mart könne Qırğızstan ilbaşı Sadır Caparov Kollektiv qurqınıçsızlıq kileşüe oyışması ğomum särqatibe İmangali Tasmagambetovnı qabul itte. Oçraşu waqtında oyışmanıñ êşçänlekläre, regional’ qurqınıçsızlıq mäs’äläläre turında süz bardı. “Özelmägän qardäşlek-2023” xärbi künegüläre bıyıl Qırğızstanda uzaçaq. Biredä şunı da äytergä kiräk, Ärmänstan oyışmanıñ ğomum särqatip urınbasarı urınına citäkçe cibärmäyäçägen belderde.

Uzğan atnada törki cömhüriyätlärdä ike möhim forum ütte. Azärbaycan ilbaşı idaräse ximayäsendä 9-11 nçe mart könnärendä Baqı forumı uzdı. Xalıqara Nizami Gäncävi üzäge oyıştırğan “Bügenge dön’ya:qurqınıçlar häm forsatlar” isemle forum açılışında ilbaşı İlham Aiyev ta qatnaştı. Forumğa 29 êlekke häm xäzerge ilbaşı, 2 prem’yer-ministr, 6 parlament başlığı, barlığı 61 ildän 360 wäkil kilde. İlbaşı İlham Aliyev forum qısalarında ike yaqlı oçraşular da ütkärde. Soñğı 10 yılda Xalıqara Baqı forumı citdi xalıqara platformağa äylände.

9-10 nçı martta Aşxabadta “Klimat üzgäreşe şartlarında azıq-tölek qurqınıçsızlığı öçen partnyerlıq” isemle xalıqara forum ütte. Forumda Üzäk Aziya illäreneñ awıl xucalığı ministrları, İran ilbaşı urınbasarı, BMO häm başqa xalıqara oyışmalarnıñ wäkilläre qatnaştı. Forum axırında kileşülär imzalandı.

Uzğan atnada törki cömhüriyätlärneñ mädäni êlemtälären nığıtaçaq waqıyğa buldı. 6 nçı martta törki cömhüriyätlär Yazuçılar Berlege başlıqları TÜRKSOY Yazuçılar Berlegen buldırdılar. Berlekneñ ğomum başlığı itep Qazaqstan Yazuçılar Berlege başlığı Ulugbäk Esdaulet saylandı. TÜRKSOY Yazuçılar Berlegeneñ berençe cıyılışı mart axırında Üzbäkstanda ütkäreläçäk.