Tatarstan xäbärläre 3/2022

Tatarstan ilbaşı Röstäm Miñnexanov şuşı könnärdä İranga êş säfäre qıla

Tatarstan ilbaşınıñ räsmi internet säxifäsennän alınğan mäğ’lümatlarğa qarağanda, Tatarstan ilbaşı Röstäm Miñnexanov şuşı könnärdä İranga êş säfäre qıla. “Bezneñ säfärneñ maqsatı - iq’tisadi xezmättäşlekne kiñäytü häm yaña êlemtälär buldıru” dide ul. Röstäm Miñnexanov säfär qısalarında Könçığış Azärbaycan ostanı (provinśiyäse) gubernatorı belän oçraştı. Tatarstan ilbaşı Täbrizdä Rakhsh Khodro Diesel yök maşinaların citeşterü zavodında buldı häm DARIC kompaniyäse citäkçeläre belän oçraştı. Ul älege şähärdä Shirin Asal konditer fabrikasında da buldı. Anda Tatarstanğa produkśiya kiterü ixtimalı turında fiker alıştılar.

Röstäm Miñnexanov häm anıñ citäkçelegendäge delegaśiya Gölestan-Tatarstan tügäräk östäle utırışında qatnaştı. Gorgan şähärendä uzğan çara Gölestannıñ (İran) êşlekle dairäläre wäkillären cıydı. “Bez Rusiya –İran mönäsäbätläre qısalarında İran belän xezmättäşlekne yuğarı bäyälibez. Bezneñ bay tarixi, iq’tisadi häm mädäni bağlanışlarıbız bar. 2022 nçe yılda bez xezmättäşlekne sizelerlek aktivlaştırdıq” dide ilbaşı.

Röstäm Miñnexanov neft’ ximiyäse häm maşina tözeleşe tarmağı produkśiyäsen kiterep toru kebek yünäleşlär buyınça bağlanışlarnı kiñäytü mäs’älälärenä centekläp tuqtaldı.

Tatarstan ilbaşı Gölestan provinśiyäse gubernatorı Ali Möxämmäd Zangane belän dä oçraştı. Oçraşuda agrosänäğät’ kompleksı produkśiyäsen, ayırım alğanda, xäläl produkśiyäsen kiterep toru mäs’äläläre qaraldı.Monnan tış fän häm mäğarif ölkäsendäge xezmättäşlek temasına da tuqtaldılar. Bügen Tatarstan häm İrannıñ qayber yuğarı uqu yortları kileşengän êlemtälärgä iyä. Tatarstanda 752 İran studentı uqıy, İranistika üzäge êşli.  

2022 nçe yılğı Mäskäw Saban tuyı baş batırı dön’ya çempionı buldı

2022 nçe yılğı Mäskäw Saban tuyı baş batırı dön’ya çempionı buldı.8 nçe sentyabr’dän 12 nçe sentyabr’gä qadär Üzbäkstannıñ Namangan şähärendä Üzbäkstan prezidentı prizına bilbaw köräşe buyınça dön’ya çempionatı uzdı. Bäygedä 2022 nçe yılğı Sabantuy batırı Êmil’ Nizametdinov ta qatnaşqan. Ul 90 kilogrammlı ülçäwdä çempion bulğan. Bu xaqta Bötendön’ya tatar kongressı saytı xäbär itä.

Tatarstannıñ Arça rayonında at sportına bağışlanğan bäyräm – “At köne” uzdı

“Tatar-inform” mäğ’lümat agentlığı citkergänçä, 17 nçe sentyabr’dä Tatarstannıñ Arça rayonında at sportına bağışlanğan bäyräm – “At köne” uzdı. Bäyrämne Tatarstan ilbaşı Röstäm Miñnexanov açtı. “At bezneñ öçen xaywan ğına tügel, ul – bezneñ atribut. Bezneñ ata-babalarnı attan başqa küz aldına kiterep bulmıy. Bügen atlarğa küp iğ’tibar birergä tırışabız”,- dide ul.

Bäyrämgä Saxa (Yakutiya) respublikası başlığı Aysen Nikolayev da kilde.

Röstäm Miñnexanov oyıştıruçı,tamaşaçı,canatarlarğa räxmät süzlären äytte. Qatnaşuçılarğa uñışlar teläde. Kön yañğırlı buluğa qaramastan ,at çabışları da, “Aydarış” uyını da oyıştırıldı.

Qazan rusiyälelärneñ yaratqan şähärläre isemlegenä kerde

Qazan rusiyälelärneñ yaratqan şähärläre isemlegenä kerde. Soraştırılğan rusiyälelärneñ 2 prośentı Qazanğa ğaşıyq buluların äytkän. Xatın-qızlar häm ir - atlar bu şähärne bertigez yarata.

SuperJob.ru ütkärgän yaña soraştıru mäğ’lümatları şul xaqta söyli dip xäbär itä “Tatar-inform” mäğ’lümat agentlığı.