Gruziyä Urta Aziyä belän yaqınaya

Awraziya qaytawazı - 49/2022

1863336
Gruziyä Urta Aziyä belän yaqınaya

Gruziyä xökümäte räise İrakli Garibaşvili iyül’ ayınıñ ikençe yartısında Üzbäkstan, Törekmänstan häm Qazaqstanğa räsmi säfär yasadı. 18nçe iyül’dä ul Üzbäkstanğa bardı. İrakli Garibaşvili başta Yaña Üzbäkstan parkına barıp Bäysezlek häykälenä täqıya quydı. Xökümät räise häm anıñ belän bergä kilgän delegaśiyä soñınnan yuğarı texnologiyä êşlänmäläre çığarıluçı Texnoparknı barıp qaradı.

19nçı iyül’dä İrakli Garibaşvili Üzbäkstan xökümät räise Abdulla Aripov belän qara-qarşı häm delegaśiyälärara söyläşülär uzdırdı. Anda, bigräk tä, iq’tisadi mönäsäbätlär qaraldı. Yaqlar Gruziyä portları aşa üzbäk tovarların Awrupağa çığaru mömkinlekläre turında fiker alıştı.

Şul uq könne Gruziyä xökümäte räise İrakli Garibaşvili Üzbäkstan ilbaşı Şäwkät Mirziyoyev belän küreşte. Liderlar säwdä, transport häm logistika şikelle bik küp tarmaqta berdäm proyekt tormışqa aşıru xaqında söyläşte. Räsmi säfär qısalarında uzğan söyläşülärdä Üzbäkstan-Gruziyä xökümätlärarası komissiyä cıyılışın ütkärü häm ike yaqqa da faydalı xezmättäşlekneñ kiñäytelüe öçen yul kartasın qabul itü mäs’älälärendä kileştelär.  

Gruziyä xökümäte räise Garibaşvili Üzbäkstanğa säfärennän soñ 19nçe iyül’dä Törekmänstanğa kitte. 20nçe iyül’dä ul ilbaşı Särdar Bärdımöxämmätov belän oçraştı. Liderlar ike däwlät arasındağı mönäsäbätlärneñ tiränäyüe, urtaq proyektlar häm Gruziyä belän Törkmänstannıñ tranzit mömkinlege şikelle temalarnı kütärde. Şulay uq, ênergetika tarmağındağı strategik xezmättäşlek mäs’äläsenä dä tuqtadılar.

Gruziyä xökümäte räise İrakli Garibaşvili 26nçı-27nçe iyül’dä Qazaqstanğa räsmi säfär yasadı. 27sendä ul ilbaşı Qasıym Cömärt Tokayev belän oçraştı. Liderlar transport, logistika, säwdä häm turizm mäydannarında ikeyaqlı xezmättäşlekne köçäytü mäs’äläsen qaradı.

Şul uq könne İrakli Garibaşvili Qazaqstan xökümäte räise Alixan Smailov belän qara-qarşı häm delegaśiyälärara oçraşular uzdırdı. Anda yaqlar säwdä häm iq’tisadi xezmättäşlek, investiśiyälärneñ häm êş bäyläneşläreneñ arttırıluı, ike däwlätneñ dä turizm mömkinlekläre üsterelüe, yaña oçqıç reysların açu häm mädäni bağ’lanışlar turında söyläşte. Soñınnan iq’tisad häm transport tarmağında oyışmalararası xezmättäşlekkä qağılışlı ike kileşü memorandumı häm 2023nçe-2026nçı yıllarda Qazaqstan häm Gruziyä arasındağı säwdä külämen kiñäytü turında yul kartası imzalandı.

Gruziyäneñ Urta Aziyä däwlätläre belän iq’tisadi mönäsäbätlärne üsterergä teläwe buşqa tügel. Moña qadär ul Awrupa belän bäyläneşlärgä östenlek birä ide. Tik ilneñ moña qadär iğ’tibarı citep betmägän häm üseştä bulğan Aziyä belän dä êlemtälären üsterüe kiräk.

Rusiyä belän Könbatışnıñ mönäsäbätläre bozıluı Gruziyägä Könçığış-Könbatış yünäleşendä zur mömkinleklär birä. İl Törkiyä häm Qara diñgez aşa Könbatışqa açıluçı töp qapqa bulu forsatın ıçqındırırğa telämi. Şuña kürä Garibaşvili Urta Aziyägä säfärendä ileneñ tranzit mömkinleklären qullanunı täq’dim itte. Xalıqara transport çeltärendä Üzäk koridornıñ kiñäytelüe Törki dön’yanıñ da faydasına.

 



Bäyläneşle xäbärlär