Tatarstan çiklären bilgeli, Qazanda möselman kinoklubı, şähär yullarında almağaçlar

Tatarstan xäbärläre – 12/2022

1846474
Tatarstan çiklären bilgeli, Qazanda möselman kinoklubı, şähär yullarında almağaçlar

ТӨРКИЯ AШA ТAТAРCТAН ҺӘМ ДӨНЬЯ XӘБӘРЛӘРE / TÖRKİYÄ AŞA TATARSTAN HÄM DÖN'YA XÄBÄRLÄRE 21.06.2022 13:00 PODKAST

Törkiyä Tatarstanğa 2 milliard dollar kapital salğan

20nçe iyün’ düşämbe könne Tatarstan Däwlät başlığı Röstäm Miñnexanov Tatarstan xökümäte yortında Törkiyä säwdä wäkillegen qabul itte. Tatarstanğa Törkiyä sänäğät’ ministrlığı, şulay uq “Gebkim” sänäğät’ töbäge citäkçelege wäkilläre kilde. Tatarstan Prezidentı matbuğat xezmäte şul xaqta xäbär itte.

Änkara belän Mäskäw arasında strategik xezmättäşlek üsä baruın iskärtep uzuçı Röstäm Miñnexanov Tatarstan belän Törkiyä arasında tovar äyläneşeneñ 2021nçe yılda 560 million dollardan artıp kitkänlegen äytte.

“Minemçä, bu san zurraq bulırğa mömkin”, - dide Tatarstan İlbaşı.

Röstäm Miñnexanov Törkiyä investorlarına ışanıç kürsätkän öçen räxmät belderde häm Tatarstandağı barlıq êşxanälärneñ uñışlı êşläwen bilgeläp ütte. Ğomumän alğanda, Törkiyä kompaniyäläre Tatarstanğa yaqınça 2 milliard yarım dollar investiśiya kertkän.

“Bez, çın küñeldän, êlemtälärebezne kiñäytü yaqlı. Aviaêlemtä, bezneñ cirle xakimiyätlär arasındağı xezmättäşlek – bolar barısı da urtaq êş öçen mömkinleklär zur buluın kürsätä. Tatarstanda yaña proyıktlarnı ğamälgä aşıru öçen qızıqlı mäydançıqlar küp”, - dip iskärtte Tatarstan Prezidentı.

Törkiyä delegaśiyäse Tatarstanğa säfäre barışında “Alabuğa” maxsus iq’tisadi töbägendä bulaçaq häm Törkiyä citeşterüläre êşe belän tanışaçaq, şulay yq “KAMAZ” êşxanäsenä baraçaq.

Tatarstan kürşeläre belän çiklären yañadan bilgeli

“Tatar-inform” agentlığı beldergänçä, Tatarstan Cömhüriyäte İlbaşı Röstäm Miñnexanov Tatarstannıñ başqa töbäklär belän çiklären bilgeläw êşeneñ ütkäreläçägen äytte. Bu mäs’älä Däwlät Şurası utırışında kütärelde.

Röstäm Miñnexanov Tatarstannıñ başqa töbäklär belän çiklären bilgeläw yünäleşendä zur êş başqarılğanın bilgeläp uzdı häm bu êşneñ däwam ittereläçägen äytte. Ul Tatarstan belän Başqortsan, Tatarstan belän Çuvaşstan arasında çikläw bilgelängänen iskärtte.

“Xäzerge waqıtta Kirov ölkäse belän çiklärne bilgeläw êşe alıp barıla. Östämä finanslaw buluğa, qalğan sorawlarnı da xäl itärbez, kürsätmä birerbez. Kollegalar belän urtaq qararğa kilergä kiräk. İñ möhime – bez xäzer territoriyäbez qayan uzğanın tögäl beläbez”, - dide Prezident. Ul çiklärne bilgeläw belän şöğıl’längän Cir häm milek mönäsäbätläre ministrlığına, Çuvaşstanğa, Başqortstanğa räxmäten belderde.

“Bu êş oçraşular, köç sorıy. Qısqa waqıtta bu yulnı ütärgä kiräk. Bu soraw distä yıllar däwam itä, anı axırğaça cirenä citkerergä kiräk”, - dide Röstäm Miñnexanov.

Tatarstannıñ çiktäş sub’yektlar belän çiklären töğayınläw turında cir häm milek mönäsäbätläre ministrı Fänil Äğ’liullin söyläde. Uzğan yılnıñ dekabrendä Tatarstan häm Orenburg ölkäse arasında çiklär bilgeläw turında kileşü raslanğanın iskärtte. Xäzer andıy kileşülär Başqortstan häm Çuvaşstan belän dä tözelgän.

“Tatarstan çikläreneñ ğomumi ozınlığı 3 meñ 400 çaqrım täşkil itä. Respublika sigez sub’yekt belän çiktäş. Tatarstan häm Çuvaşstan arasında çiklär ozınlığı 554 kilometr täşkil itä. Yäşıl Üzän, Qaybıç, Apas, Bua, Çüpräle rayonnarı çiktä urnaşqan. Çiklärne töğayınläw êşe 2019nçı yıldan alıp barıldı”, - dide ministr.

Çiklärne bilgeläw turında kileşü Çuvaşstan başlığı häm Tatarstan Prezidentı arasında bıyıl 11nçe mayda imzalanğan häm raslawğa Däwlät Şurasına cibärelgän.

Tatarstan häm Başqortstan arasında çiklärne töğayınläw êşe dä tögällängän. Respublika Prezidentı häm Başqortstan  başlığı şul xaqta dokumentnı imzalağan. “Başqortstan belän çiklärneñ ozınlığı - 498 kilometr. Aqtanış, Möslim, Aznaqay, Yutazı, Bawlı rayonnarı çiktä urnaşqan”, - dide.

Fänil Äğ’liullin alğa taba Kirov, Samara, Ul’yanovsk, Udmurtiya belän çiklärne bilgeläw kiräklegen äytte.

Qazanda möselman kinoklubı

“Tatar-inform” agentlığı citkergänçä, Qazanda möselman kinoklubınıñ yaña sezonı başlandı. Yäş’lär fil’m qaraw öçen Qaban artı mäçete çatırına cıyıldı. Fil’m “fiker yörtüçelär öçen” dip saylap alındı, ul tämamlanğannan soñ täêsirlären urtaqlaşu öçen bäxäs oyıştırıldı. “Kinoklub”qa 50gä yaqın yıget häm qız kilde.

Näzarätneñ sośial’ üseş bülege citäkçese Aygöl Biktimirova süzlärenä qarağanda, virtual’ aralaşular populyar buluğa qaramastan, yäş’lär canlı oçraşularnı zarığıp kötep ala. “Kinoklub – bügenge kön küzlegennän çığıp, aralaşu, ayırım temalarda fiker alışu, qarala torğan fil’mnarda kütärelgän problemalarnı bergäläp çişü yulların êzläw öçen bik faydalı mäydançıq. Şuña kürä bu proyıkt yäş’lär arasında zur populyarlıqqa iyä häm ul bik kiräk”, - dip äytte ul. Bu xaqta Tatarstan Diniyä näzaräte matbuğat xezmäte xäbär itä.

Möselman kinoklubınıñ cäyge sezonı üz êşen sentyabr’ ayına qadär däwam itäçäk häm yäş’lärne yaña qızıqlı fil’mnar belän söyınderäçäk. Oçraşu urını häm waqıtı – här aynın ikençe häm dürtençe sişämbesendä 18.30 säğät’tä, Qazan artı mäçete çatırında, diyılä xäbärdä.

Tübän Qama yullarında almağaçlar, parklarda kitap uquçılar

Tatarstannıñ Tübän Qama uramnarın yäşelländerü öçen 12 million sumlıq ağaç üsentese satıp alınğan.

“Tuğan yaq” saytında çıqqan yazmada şähärneñ üzäk uramnarnıñ bersendäge yul bülü sızığında 169 almağaçnıñ utırtıluı turında äytelä.

Kiläçäktä Nikolay Zelenov isemendäge skvernı yäşelländerü dä planlaştırıla.

Şul uq sayttağı Aygöl Gäräyıväneñ “Kitap uquçılarnıñ – üz festivale” isemle yazmasında isä:

“Tübän Qama kitapxanäçeläre kitap uquçı tübänqamalılarnı Tuqay isemendäge uqu häm yal parkında “Tübän Qama kitap uqıy” ädäbi festivalenä cıydı. Ul ilebezdä iğ’lan itelgän Rusiyä xalıqlarınıñ mädäni mirası yılına bağışlandı”, - dip äytelä.

Älege çaranıñ öçençe tapqır ütkärelüen yazuçı sayt Tübän Qama berläşterelgän kitapxanälär sisteması direktorı Gölnaz Arslanovanıñ festival’neñ ozın ğomerle bulasına ışanıçın belderüen citkerep: “Kitap yaratqan keşe – yaqtı keşe ul. Andıylarnıñ küñelendä mäker-zolımğa urın qalmıy, küñele tulı yaxşılıq, igelek bula. Şuña kürä, äydägez, kitaptan ayırılmıyq, balalarıbıznı da kitapnı yaratırğa öyrätik. Uquğa mäxäbbät tärbiyäläw – bez, zurlarnıñ, balalarğa bira alğan iñ zur büläge”, – dip äytkän süzläre belän urtaqlaşa.

Qazan-Dubay oçqıç säfärläre

27nçe iyün’nän Qazan häm Dubaynı östämä aviareys totaştıraçaq. Xäzer oçışlar düşämbe, çärşämbe häm şimbä könnärendä başqarılaçaq. Bu turıda “Tatar-inform” agentlığı xäbär itä.

23nçe sentyabr’dän şulay uq reyslar sanın arttıru planlaştırıla – oçışlar comğa häm yäkşämbe könnärendä başqarılaçaq. Oçqıçlar atnasına barlığı biş tapqır oçaçaq.

İstanbulda tatar rok muzıkası häm Tatarstan bäyrämnäre

Küzätüebezne Törkiyä häm Törkiyädä ğomer itüçe tatarlar turında Tatarstan matbuğatında çıqqan yazmalar belän tögällibez.

İstanbulda “Rusiyä köne”ndä Tatarstan bäyrämnäre sürätlängän kartinalar kürsätelde.

“Tatar-inform” agentlığı xäbärçese Ruşaniya Altay yazmasında: “Rusiyä Federaśiyäseneñ Törkiyäneñ İstanbul şähärendäge General’ konsullığı oyıştırğan “Rusiyä köne” bäyräm çarasındağı räsem kürgäzmäsendä tatar-törek rässamı Aygöl Okutannıñ Tatarstan bäyrämnären sürätlägän “Saban tuyı” häm “Karavon” kartinaları täq’dim itelde”, - dip äytelä.

Şuşı sänğät’ çarasında Aygöl Okutan “Küp millätle Rusiyä” dip isemlängän sänğät’ kürgäzmäsen äzerläde.

Anda çığışları belän Rusiyädän bulğan, xäzer Törkiyädä yäşäwçe 8 rässamnıñ xezmätläre urın aldı. Alar arasında Başqortstanda tuıp üskän millättäşebez İldar Äxmätwäliyıv tä bar. Kürgäzmädä barlığı 18 kartina häm dürt sınlı sänğat’ äsärenä urın birelgän.

Agentlıqnıñ başqa ber yazmasında isä tatar rok muzıkantı, avtor-başqaruçı Rädif Kaşapovnıñ Törkiyäneñ İstanbul şähärendä Ärdal Ärän isemendäge mädäniyät yortında konśert quyuı turında xäbär itelä.

 
 


Bäyläneşle xäbärlär