Törekmänstan ilbaşınıñ Rusiyägä säfäre

Möxtäräm tıñlawçılar, iğtibarığızğa “Awraziya qaytawazı” tapşıruınıñ çirattağı çığarılışın täqdim itäbez. Bügenge tapşıruıbızda Törekmänstan däwlät başlığı Särdar Bärdimöxämmädovnıñ Rusiyä Federaŝiyasenä yasağan säfäre häm ike il mönäsäbätlärendäge soñğı wazğıyät’kä tuqtalırbız.

Törekmänstan liderı Särdar Bärdimöxämmädov 10nçı iyun’dä Rusiyä Federaŝiyasenä räsmi säfär yasadı. Törekmänstan däwlät başlığı Kreml’da Rusiyä prezidentı Vladimir Putin belän küreşte. İke il liderı tar häm kiñäytelgän formatta söyläşü ütkärde. Vladimir Putin Bärdimöxämmädovnıñ Törekmänstanğa säfär yasaw täqdimen qabul itüen belderde. Söyläşülärdän soñ ike il arasında 15 kileşügä qul quyıldı. Şulay itep ike il arasında bügengä qadär imzalanğan kileşü sanı 300gä citte. İlbaşı Särdar Bärdimöxämmädovnıñ Törekmänstan däwlät başlığı sıyfatı belän berençe räsmi çit il säfären Rusiyägä yasawı ike yaqlı häm regional’ mönäsäbätlär cähatennän bik möhim.

Matbuğat oçraşuında Rusiyä liderı Putin Törekmanstan däwlät başlığına Duslıq ordenın tapşırdı. Putin ayıruça Rusiyä-Törekmänstan strategik mönäsäbätläreneñ tiränäytelüen küzdä totuçı deklaraŝiyağa qul quyuların assızıqladı häm urtaq säwdä külämeneñ uzğan yılnı 865 million dollar buluın belderde. İlbaşı Bärdimöxämmädov isä pandemiya çorında Rusiyä cibärgän vakŝinalar öçen räxmät belderde.

Rusiyä-Törekmänstan mönäsäbätläre törle platformalarda üsä. Mäsälän 12-13nçe may könnärendä Aşxabadta 1nçe Üzäk Aziya-Rusiyä Federaŝiyase Parlamentlarara forum häm 1nçe Üzäk Aziya-Rusiyä Federaŝiyase Xatın-qız dialogı oyıştırıldı.

Särdar Bärdimöxämmädov 12nçe mart könne uzğan saylawda prezident bulıp saylanğannan soñ bu sıyfat belän berençe itep 1-2nçe iyun’ könnärendä Soğud Ğaräbstanına säfär yasağan ide. Ğıybadät häm säwdä maqsatlı bu säfär Törekmänstan liderınıñ ğaräp investiŝiyalärenä ähämiyät birüen kürsätä.

Bärdimöxämmädovnıñ berençe räsmi säfären Rusiyä Federaŝiyasenä çınğa aşıruı tarafsız tışqı säyäsät alıp baruçı Aşxabad citäkçelegeneñ tışqı säyäsättä östenlek birgän illärdän berseneñ Rusiyä buluın kürsätep tora. Törekmänstan däwlät başlığı il êçendä häm çit illärdäge säfärlärendä ruslar citeştergän häm Vladimir Putin da qullanğan Aurus Senat Limuzin maşinasında yöri.

Törekmänstannıñ ênergetika, transport kebek strategik ölkälärendä Rusiyäneñ citdi investiŝiyaläre turında süz bara. Xalıqara Kön’yaq-Tön’yaq Transport koridorında älege illär töp rol’ uynıy. Törekmänstannıñ Tatarstan belän dä yaxşı iqtisadi mönäsäbätläre bar.

30 meñnän artıq törekmän studentı Rusiyädä yuğarı belem ala. Alardan 4300e stipendiya alıp uqıy. Ä Törkiyädä soñğı mäğlümatlarğa kürä 18 meñ törekmän studentı bar. Kreml’dağı söyläşüdä urtaq Törekmän-rus universitetınıñ açıluı mäs’äläsendä kileşü täêmin itelde. Şunı da äytep kitärgä kiräk, törekmän yäş’läre kübräk Rusiyä Federaŝiyasendäge Tatarstan, Adıgey, Karaçayevo-Çerkesiya kebek törki xalıqları küp yäşägän cömhüriyätlärdä belem ala.

Qısqası Törekmänstan prezidentı berençe räsmi çit il säfären qardäş törki cömhüriyätlärdän bersenä tügel, ä Rusiyägä yasadı.

Avtor - Abdrasul İsakov