İstanbul qazuları

İstanbulda transport sisteması tözeleşe öçen başlanğan qazular waqıtında şähärneñ 8 meñ 500 yıllıq ütkänenä qağılışlı êzlär tabılğanın beläsezme?

Geografik urını arqasında borıñğı zamannardan birle möhim şähär bulıp torğan İstanbul Rim imperatorlığınıñ başqalası itep iğ’lan itelgäç tağın da zur ähämiyätkä iyä bula. Vizantiya imperatorlığı häm Ğosmanlı imperatorlığı başqalası bularaq qullanılğan şähär “Öç imperiyäneñ başqalası” dip iskä alına. İstanbulnıñ ğasırlar däwamında cıyılğan bay mirası 2004-2013 nçe yıllarda alıp barılğan arxeologik qazu êşlärendä çığarıla.

Bosfor buğazı astınnan uzaçaq tunnel’ öçen 2004 nçe yılda başlanğan tözeleş êşläre waqıtında şähärneñ Awrupa yağındağı Yenikapı rayonında arxeologik qaldıqlar tabıldı. Şunnan tözeleş êşläre tuqtap qaldı häm bik zur arxeologiya kollektivı belän qazu êşläre başlandı, İstanbulnıñ borıñğı ütkänen çağıldıruçı bik möhim arxeologik häm tarixi mäğ’lümatlar tabıldı. Qazularnıñ iñ tübän qatlamında 8000-8200 yıl êlekkegä qarawçı neolit cirläşü urını tabıldı. Bu İstanbulnıñ iñ borıñğı toraq punktı ide. Vizantiya imperatorlığınıñ başqalası bulğan Konstantinopol’neñ iñ möhim portlarınıñ berse bulğan Teodosiy portı qaldıqları da bu qazu êşläre waqıtında çığarıldı.

37 batqan köyma qaldıqları ta tabılğan bu qazular ğasırnıñ iñ zur arxeologik qazularınnan berse sanala.