Tatarstanda tuñdırma, ikmäk-kümäç, toraq häm uram artistları

İzge Bolğar şähärendä cıyın häm köräş bäygese

Tatarstan Däwlät başlığının matbuğat xezmätennän Bulat Nizamiyıv beldergänçä, 21nçe mayda Tatarstannıñ Bolğar muzey-tıyulığı cirlegendä İzge Bolğar cıyını waqıtında 20 meñnän artıq keşe bulğan.

Bilgele bulğança, borınğı Bolğar şähäre cirlegendä tradiśion “İzge Bolğar cıyını” uzdı.

Bıyılğı bäyrämneñ İdel buyı Bolğar däwlätendä İslam dinen qabul itügä 1 meñ 100 yıl tuluğa bağışlanuın citkerüçe “tatarstan.ru” säxifäse Tatarstan däwlät kiñäşçese Mintimer Şäymiyıvneñ, 2014nçe yılda Bolğar tarix-arxeologiya kompleksınıñ YUNESKO Bötendönya mirası isemlegenä kertelüen häm böten dönya êkspertlarınıñ Bolğarnıñ iñ tön’yaq cirlärendä İslam dinen irekle qabul itü urını buluın tanuın bilgeläp uzıp: “Bu – bezneñ urtaq uñışıbız, urtaq êşebezneñ layıqlı näticäse. Borınğı Bolğar şähären torğızu bezneñ tarixi mirasıbıznı saqlağan xalıq buluın kürsätte,” - dip äytüen belderä.

Şuşı uq könne Tatarstan Prezidentı bilbawlı köräş - 2022 Dön’ya Kuboğınıñ final yarışları uzğan mäydançıqta buldı. Turnirda 26 ildän 160 köräşçe qatnaştı.

Tatarstanda toraq belän täêmin itü planı

5 häm annan sa kübräk bala tärbiyäläwçe küp balalı ğailälärne toraq belän täêmin itü programması ğomumi mäydanı 2 meñ 384 kvadrat metr bulğan 25 sertifikat räsmiläşterelgän.

Bu turıda “tatarstan.ru” saytında äytelä.

50 yäş’ ğailä toraq belän täêmin itü ölkäsendä cirle xakimiyätlärgä programmanı finanslawnıñ ğomumi külämeneñ 93%ı citkerelgän.

Mäcbüri küçenüçelär, Yıraq Tön’yaqtan küçenüçelär häm çernobıl’çelär kategoriyäsendä bügenge köndä 5 sertifikattan 4 sertifikat räsmiläşterelgän.

Tatarstan Cömhüriyätendä bügengä 1 million 494 meñ kvadrat metr toraq faydalanuğa tapşırılğan, bu yıllıq plannıñ 54%ın täşkil itä. Sośial’ ipoteka programması planı 66%qa ütälgän.

Tatarstanğa ikmäk-kümäç qıtlığı yanamıy

“Watanım Tatarstan” gazetı Tatarstanda şikâr häm aşlıq yaña uñış cıyıp alğançı citä,” – dip yaza.

Awıl xucalığı häm azıq-tölek ministrlığı matbuğat xezmätennän xäbär itelgänçä, respublikada 400 meñ tonnadan artığraq börtek zapası buldırılğan.

Barlıq zur êşxanälärneñ cäy azağına qadär aşlıq belän täêmin itügä kontraktları bar. Cömhüriyätkä ikmäk-kümäç qıtlığı yanamıy, zur säwdä çeltärläre yaña uñış cıyıp alğançı produkśiya belän özleksez täêmin iteläçäk.

Şikär dä citärlek külämdä. Xäzerge waqıtta şikär êşxanälärendä 7 meñ tonnadan artığraq äzer produkśiya saqlana. Monıñ qadär zapas şikâr çögendereneñ yaña uñışın cıyıp alğançı citäçäk. Ministrlıqta äytülärençä, şikär êşxanäläre saqlağıçlarında 7 meñ tonnadan kübräk şikâr saqlana.

Qazan uramnarında artistlar, muzıkantlar häm rässamnar

“Şähri Qazan” gazetı beldergänçä, Tatarstan başqalası Qazanda uram artistları, muzıkantları häm rässamnarı öçen êşlängän “Art-prospekt” śifrlı (sanlı) platforması ştat rejimında êşli başladı.

Uzğan yılnıñ ğıynwarında “Säydäş” mädäniyät sarayında cämäğät’çelek wäkilläre, Bauman uramındağı yortlarda yäşäwçelär, blogerlar, Başqarma komitet bülekçäläre citäkçeläre, êkskursovodlar, muzıkantlar häm başqalar qatnaşında uzğan tügäräk östäldä uram çığışların legal’läşterü mäs’äläsendä fiker alıştılar. Uzğan yılnıñ avgust axırında şähärdä uram muzıkantları häm artistları öçen reglament raslandı.

“Art-prospekt” platforması – şähär kiñleklärendä Qazan xalıq häm qunaqları çığışları öçen urın häm waqıt bron’lawnıñ açıq sisteması. Ul icadi janr wäkillären - muzıkantlarnı, näfis süz ostaların, aktyorlarnı, rässamnarnı häm başqalarnı berläşterä.

Yaña funkśiya şähär xalqı öçen dä faydalı bulaçaq – saytqa kerep, alar tege yäki bu mäydançıqta konkret waqıtta kem çığış yasayaçağın kürä alaçaq.

Uram artistları, muzıkantlar häm rässamnar çığışları öçen 26 mäydançıq açıq.

İzge Bolğarda köräş dönya kuboğı

“İdel buyı Bolğar Däwlätendä İslam dine qabul itüneñ 1100 yıllığı uñayınnan İzge Bolğar cirlegendä köräş Dön’ya kuboğına yarışlar uzdı. Bäygeneñ başlangıç öleşendä 150läp köräşçe qatnaştı, ä Bolğarda isä medal’lär öçen köräş bardı. Bäygeneñ iñ matur mizgellären Tatarstan Prezidentı Röstäm Miñnexanov ta küzätte,” - dip yaza “Şähri Qazan” gazetı.

Rusiyägä kürşe däwlätlärdän genä tügel, Angola, Mongoliya, Gvatelama, Gvineya, Şri-Lanka, Bangladeş kebek êkzotik töbäklärdän dä bar ide bäygedä qatnaşuçılar arasında.

Yarışlarnıñ absolyut batırı bulıp Yäşel Üzän yıgete Firdüs Zäynullin tanıldı.

“Xäräkättä – bäräkät” häm “Söylä” proyıktları

“İntertat” säxifäse citkergänçä, bıltır Tatarstanda Tuğan tellär häm xalıq berdämlege yılında Qazan parklarında häm skverlarında “Xäräkättä – bäräkät” proyıktı başlanıp kitte. Şähär xalqı tanılğan artistlarğa, xoreograflarğa quşılıp, açıq hawada fizik künegülär yasadı, biyü xäräkätlärenä öyrände. İñ möhime – çara tatar telendä bardı.

Anıñ maqsatı da sport aşa şähärdä äzme-küpme tatar moxite buldıru ide, çönki añarçı Tatarstan başqalasında tatarlıq sizelmi digän şeltälär küp buldı. Oyıştıruçılar süzlärençä, bu proyıkt uñışlı kilep çıqqan. Bıyıldan anı Qazan mäktäplärenä dä kertergä bulğannar. “Xäräkättä – bäräkät”kä “Söylä” proyıktın da östäp, oyıştıruçılar balalarğa tatar telendä aktyorlıq ostalığı däresläre dä birergä uylağannar.

Yomğaqlaw çarasın Tinçurin teatrı artistı Rezeda Säläxova alıp bardı. Ul üze dä dürt ay däwamında ostaz bulıp êşlägän. Ul “İntertat” xäbärçesenä üzeneñ uy-fikerlären citkerde.

“Tatar awazları şähär balalarında yuq däräcäsendä. Awazlarnıñ döres äyteleşe östendä dä küp tırışırğa turı kilde. İñ möhime – balalar bik teläp yörde, däreslärne tüzemsezlek belän kötep tordı,” – dide Rezeda Säläxova.

Tatarstan tuñdırması

Tatarstan “döres” tuñdırma citeşterüdä ilneñ aldınğı töbäkläre arasına kerä,” – dip xäbär itä “Tatar-inform” agentlığı.

Tuñdırma yasawda berence urında – Mäskäw, ikençedä – Mäskäw ölkäse, öçençedä – Krasnodar krayı, dürtençedä – Tatarstan Cömhüriyäte.Töbäkkä Rusiyä külämendä citeşterelä torğan tuñdırmanıñ 5,5% turı kilä.

Qazan xalıqara möselman kinosına ğazira qabul itü tögällänä

“Matbuğat.ru” saytı beldergänçä,1nçe iyün’ könne 18nçe Qazan xalıqara möselman kinosı festivalenä ğarizalar qabul itü tämamlana. Festival’ Qazanda 7nçe-11nçe sentyabr’dä Tatarstan İlbaşı yärdäme belän häm “Rusiyä-İslam dönyası” strategik törkeme belän berlektä uzaçaq.

Saylap alu komissiyäse üz êşen iyül’ başında tögälläyäçäk, şunnan soñ bäyge programması iğ’lan iteläçäk.

Qazan kinofestivaleneñ konkurs programmasında tulı metrajlı häm qısqa metrajlı uyın fil’mnarı, şulaq uq qısqa metrajlı häm tulı metrajlı dokumental’ fil’mnar qatnaşa ala.

"Matbuğat.ru”ğa bilgele bulğança, bäyge programmasınnan tış tamaşaçılarnı konkurstan tış häm parallel’ programmalar da kötä.

Qazanda qoyaş bayışı, turistlar häm dini cıyınnar | TRT Tatarça

 

Qazan-Antaliya arası häm Seber tatarlarınıň tuy cırları | TRT Tatarça