Ayaq tırnağı tiregä batıp üssä...

“Sälamät bulıyq” tapşıru tezmäbezneñ bu bülemendä ayaq tırnağının tiregä batıp üsüenä qarşı tabiğıy kiñäşlär biräçäkbez. Tik betmi torğan ülekle oçraq bulğanda, hiçşiksez, tabibqa möräcäğat’ itärgä kiräk.

Xalıqta “êt tırnağı” dip tä yörtelä torğan älege küreneş bigräk tä ayaqtağı baş barmaqta oçrıy. Ul tırnaqnıñ tiregä batuı näticäsendä barlıqqa kilgän sälamätlek probleması. Yäşäyeşebezgä tiskäre yoğıntı yasawçı älege küreneş, däwalanmasa, ülekläwgä kiteräçäk.  

Tırnaqnıñ tiregä batıp üsüenä qarşı nilär qullanırğa mömkin?

Alma serkäse

Ägär êt tırnağı yörergä qomaçawlasa, här kiç barı ayaqlarığız öçen qullanıla torğan sawıt  êçenä alma serkäse häm su qatnaşması salığız. Anda ayaqlarığıznı 15 minut totığız.

Uñaylı oyıqbaş häm ayaq kiyeme kiyü

Tar häm qısıp toruçı oyıqbaş häm ayaq kiyemnäre urınına tağın da kiñ häm uñaylı bulğannarın saylağız. Däwalaw waqıtında sandaliyä şikelle barmaqlarğa qağılmıy torğan ayaq kiyemnärenä östenlek birergä kiräk.

Batqan tırnaqnı saqlawçı

Älege caylanmalar barmaq tiräsen bocrağa ala yäisä barmaqqa kiyelä.

Sabınlı su

Ägär zäytün maylı sabınnar qullansağız, ul tırnaq astında barlıqqa kilgän ülekne çistartırğa yärdäm itär. Kön däwamında ayaqlarığıznı sabınlı su êçendä 15 minut totığız häm şunnan soñ tırnaqlarığıznı çistartığız.

Çäy ağaçı êfir mayı

Çäy ağaçı mayı  - antioksidant häm antiseptik üsemlek mayı. Tändä barlıqqa kilgän şeşü häm qızarular öçen qullanıla. Êt tırnağı çıqqanda här kiç yoqlarğa yatar aldınnan çäy ağaçı mayın zarar kürgän urınğa mamıq yärdämendä sörtep massaj yasarğa mömkin.

Sarımsaq

Tırnaq tiregä batıp üskän urınğa ber zur sarımsaqnı izep sörtergä bula. Anı 1 säğat’ totqannan soñ yuası.

 Kalendula mayı

Mamıqqa 2 tamçı kalendula mayın tamızıp, anı zarar kürgän tırnaq östenä quyığız. Niqadär ozaq totsağız, tırnaq töplärendäge awırtu häm ülekkä şulqadär tirän yoğıntı yasayaçaq. Tiz tözälüen teläsägez, monı daimi bularaq êşlägez.

Bal häm limon suı

Êt tırnağı arqasında barmaqlarda barlıqqa kilgän qızıllıq häm şeşüne ballı-limonlı su belän beterä alasız. 1 qalaq bal östenä berniçä tamçı limon suı sığıp, älege qatnaşmanı tırnaqqa sörtegez. Marlya belän bäyläp küpmeder waqıt şulay totığız.

Qıçıtqan izmäse

Ber uç yäşel qıçıtqannı suda qaynatıp bolamıq yasağız. Zarar kürgän urınğa şunı sörtep 10-15 minut totığız.

Tim’yan tönätmäse

Tim’yan tönätmäsen zur häm uñaylı lägängä buşatıp, tırnağı batqan barmaqlarnı şunın êçendä totığız. Monı 1 atna buyı här kön êşlärgä kiräk. Ul awırtu häm qızarunı kimetä.

Tırnaqnıñ tiregä batıp üsüen kisätü öçen nilär êşlärgä bula:

• Tırnaqlarığıznı bik qısqa kismäskä tırışığız.
• Tırnaqlarnı kiskändä poçmaqların oval itmägez, yarım ay räweşendä bulsın.
• Tabiğıy materiallardan êşlängän oyıqbaşlar kiyegez häm kön sayın almaştırığız.
• Êt tırnağı çıqqanda ayaq barmaqları açıq qala torğan ayaq kiyemnärenä östenlek biregez.
• Tar häm oçlı başlı, biyek ükçäle ayaq kiyemnäre kimäskä tırışığız.
• Ägär tırnaqlarığıznı üzegez kisä almasağız, maxsus salonda pedikyur yasatığız.
• Ayaqlarığıznı qorı totarğa tırışığız.
• Uzmıy torğan tırnaq batu oçrağı bulsa, kiçekmästän tabibqa kürenegez.

Tabib Mäxmät Uçar