Taşkentta Xalıqara sänäğät yärminkäse

2022nçe yılnıñ 25nçe-27nçe aprel’ könnärendä Taşkentta Üzbäkstan Kapital salu häm tışqı säwdä ministrlığı tarafınnan “İNNOPROM. Üzäk Aziya” Xalıqara sänäğät yärminkäse ütkärelde. Yärminkädä Bäysez Däwlätlär Berlegenä äğ’za illär, Germaniya, Qıtay, Franśiya, İtaliya, Niderland, Törkiyä häm Vengriya (Macarstan) kebek illärdän 1300dän kübräk wäkil häm 200 şirkät qatnaştı. Üzbäkstan, Azärbaycan, Belarus, Ärmänstan, Qazaqstan, Qırğızstan, Mongoliya, Rusiyä häm Tacikstannan ministr häm ministr urınbasarları, Awraziya iq’tisad berlege räsmiläre dä şuşı yärminkädä ide.

Rusiyä Federaśiyasınıñ 9 ayırım töbägeneñ kümäk stendları urnaştırıldı. Metallurgiya, avomobil’, almaş çastlär citeşterüe, ênergetika, daruxanäçelek, farmaśevtika belän bergä törle ölkälärdäge êşlänmälär häm xezmätlär täq’dim itelgän yärminkädä 20dän kübräk maxsus utırış, panellär, tügäräk östäl cıyılışları ütkärelde. İke yaqlı söyläşülär dä uzdırıldı. 27nçe aprel’ könne “İNNOPROM Universitet” iseme astında uquçı yäş’lärgä häm yäş’ belgeçlärgä seminarlar oyıştırıldı. Yärminkädä distälägän xezmättäşlek kileşüenä häm kileşü memorandumına qul quyıldı.

2022nçe yılnıñ 25nçe aprel’ könne Üzbäkstan İlbaşı Şäwkät Mirziyayıv ilgä êşlekle säfär yasağan Belarus Baş ministrı Roman Golovçenkonı qabul itte. Oçraşu waqıtında ike il mönäsäbätläre quzğatıldı. Belarus Baş ministrı Golovçenko soñınnan Üzbäkstan Baş ministrı Abdulla Aripov belän küreşep söyläşte.

Baş ministr Roman Golovçenko matbuğat wäkillärenä säfäre qısalarında Belarus belän Üzbäkstan arasında 25 million dollar külämendä törle kileşülärgä qul quyıluın belderde.

“İNNOPROM. Üzäk Aziya” xalıqara sänäğät yärminkäseneñ berençese uzğan yılnıñ aprel’ ayında ütkärelgän ide, ul çaqta yärminkädä distälägän ildän qatnaşuçınıñ buluı, yärminkägä kilüçelärneñ sanı 10 meñnän artuı, tuplam miqdarı 3 milliard 200 million dollarğa citkän kileşülärgä qul quyıluı belderelgän ide.

Dön’ya bankı Awrupa häm Urta Aziyä töbäge belän bäyle bularaq äzerlägän İq’tisad xisabınıñ soñğı sanın aprel’ ayında bastırğan ide. Xisapta Rusiyä-Ukraina suğışı soñğı ike yıl êçendä yäşängän “ikençe zur şok” bularaq bäyälände häm bu suğışnıñ Awrupa häm Urta Aziya töbägendä iq’tisadi torğınlıqqa êtäräçäge belderelde. İq’tisadi krizis belän köräş cähätennän “İNNOPROM. Üzäk Aziya” yärminkäse kebek çaralarnıñ oyıştırıluı bik möhim.

Könbatış sankśiyäläre astında qalğan Rusiyä häm Belarus öçen xalıqara sänäğät yärminkäse kebek çaralar töbäk illäre belän xäzerge mönäsäbätlärneñ tağın da nığıtıluı, çikläwlärneñ yoğıntısın kimetäçäk mömkinleklärneñ buldırıluı cähätennän ähämiyätle. Taşkenttağı sänäğät yärminkäsenä şuna kürä Rusiyä şirkätläre zur qızqsınu kürsätte. Rusiyäneñ 9 töbägennän kilgän wäkilleklär yärminkä qısalarında Üzbäkstan vilayätlärenä dä säfär qıldı. Rusiyä häm Üzbäkstan cirle citäkçelekläre häm cirle şirkätläre arasında kileşülär tözelde.

Yomğaqlap şunı äytep uzıyq: Üzbäkstan soñğı yıllarda regional’ häm xalıqara çaralarnı yış ütkärä. “İNNOPROM. Üzäk Aziya” Xalıqara sänäğät yärminkäse barı tik Üzbäkstan öçen genä tügel, böten töbäk iläre öçen dä faydalı ber çara.

Abdrasul İsakov