Qırğızstan ilbaşınıň Azӓrbaycanğa sӓfӓre

Qırğızstan ilbaşı Sadır Caparov 19-20 nçe aprel’ könnӓrendӓ Azӓrbaycanğa berençe rӓsmi sӓfӓren yasadı. Caparov 19 nçı aprel’dӓ Azӓrbaycannıň milli liderı Xӓydӓr Ӓliyevneň qaberenӓ hӓm Şӓhitlӓr ziratına barıp çӓçӓklӓr saldı. 

20 nçe aprel’dӓ Azӓrbaycan ilbaşı İlham Aliyev Baqıdağı Zagulba sarayında Qırğızstan ilbaşın rӓsmi tantana belӓn qarşı aldı. Rӓsmi qarşı alu tantanasınnan soň alar üzara küreşep söylӓştelӓr. Oçraşu waqıtında İlham Aliyev Qırğızstan belӓn barlıq ölkӓlӓrdӓ aktiv xezmӓttӓşlek itӓrgӓ ӓzer buluların belderde.

Sadır Caparov Qırğızstan belӓn Azӓrbaycan arasındağı mönӓsӓbӓtlӓrneň Xӓydӓr Ӓliyev çorınnan birle bik yaxşı dӓrӓcӓdӓ buluın iskӓrtte hӓm Azӓrbaycannıň qardӓş, tuğandaş il buluına basım yasadı. İke il dӓwlӓt başlıqları sӓwdӓ hӓm iq’tisad, transport, awıl xucalığı tarmağında xezmӓttӓşlek, investiśiya proyektları turında söylӓştelӓr hӓm   regional’ qurqınıçsızlıq problemaları turında fiker alıştılar.

Üzara oçraşudan soň ike lider citӓkçelegendӓ wӓkilleklӓr arasında oçraşu buldı. Söylӓşülӓrdӓn soň Aliyev belӓn  Caparov Azӓrbaycan belӓn Qırğızstan arasında strategik partnyerlıq deklarasiyӓsenӓ hӓm Azӓrbaycan belӓn Qırğızstan arasında Dӓwlӓtara şura tözü turındağı memorandumğa qul quydılar. Şulay itep ike il arasındağı mönӓsӓbӓtlӓr strategik partnyerlıq dӓrӓcӓsenӓ kütӓrelde. İmza salu tantanasında finans, awıl xucalığı, êlemtӓ, avtorlıq xoquqları, hawa êlemtӓse, massakülӓm mӓğ’lümat çaraları hӓm mӓğarif ölkӓsendӓge 8 kileşügӓ ike ilneň bӓylӓneşle ministrları qul quydı.

Sadır Caparov 20 nçe aprel’dӓ Azӓrbaycan êşmӓkӓrlӓre belӓn oçraştı. Oçraşuda Qırğızstannıň investiśiya mömkinleklӓre tanıtıldı hӓm ike ilneň investiśiya agentlıqları arasında xezmӓttӓşlek kileşüe imzalandı.

Soňraq Qırğızstan ilbaşı Azӓrbaycan parlamentı başlığı Saxiba Gafarova belӓn oçraştı. Oçraşu waqıtında ike yaqlı mönӓsӓbӓtlӓrgӓ qağılışlı törle sorawlar qaraldı.

 Sadır Caparovnıň Azӓrbaycanğa sӓfӓre global’ hӓm regional’ sӓyӓsӓttӓ tirbӓleşlӓr, krizislar dӓwam itkӓn waqıtta buldı. Törki dön’yanıň xalıqara arenada köçle buluı hӓm bergӓ êşlӓwe öçen törki cömhüriyӓtlӓr arasındağı xezmӓttӓşlek iň yuğarı dӓrӓcӓdӓ bulırğa tiyeş. Bu qısada Caparovnıň Baqığa sӓfӓre möhim borılış noqtası dip ӓytergӓ mömkin.

Azӓrbaycannıň ,Qazaqstannan qala, törki cömhüriyӓtlӓr belӓn mönӓsӓbӓtlӓre kirӓkle dӓrӓcӓdӓ tügel ide. Ӓmma Baqı soňğı yıllarda bu illӓr belӓn mönӓsӓbӓtlӓren nığıttı. Mӓsӓlӓn, Törekmӓnstan belӓn Xӓzӓrdӓge bӓxӓsle mӓs’ӓlӓlӓr çişelde. Üzbӓkstan belӓn mönӓsӓbӓtlӓr torğızıldı. Xӓzer bu bocrağa Qırğızstan belӓn mönӓsӓbӓtlӓrne strategik  partnyerlıq dӓrӓcӓsenӓ kütӓrü östӓlde.

Xalıqara transportta Urta koridornı aktiv qullanu berençe çiratta Azӓrbaycan bulu belӓn bergӓ barlıq törki cömhüriyӓtlӓrneň  faydasına. Söylӓşülӓre soňğı êtapqa citkӓn Qıtay - Qırğızstan- Üzbӓkstan timer yul proyektı Qırğızstan belӓn Azӓrbaycannı ber-bersenӓ tağın da yaqınayta torğan proyekt.

Yomğaqlap ӓytkӓndӓ, Qırğızstan ilbaşı Sadır Caparovnıň Azӓrbaycanğa berençe sӓfӓre nӓticӓle buldı.