Татар дөньясы Тукайны хөрмәтли / Tatar dönyası Tuqaynı xörmätli
Tatarstan xäbärläre – 04/2022
ТӨРКИЯ AШA ТAТAРCТAН ҺӘМ ДӨНЬЯ XӘБӘРЛӘРE / TÖRKİYÄ AŞA TATARSTAN HÄM DÖN'YA XÄBÄRLÄRE 26.04.2022 13:00 PODKAST
26nçı aprel’ - dönyaküläm tanılğan tatar şağıyre Ğabdulla Tuqaynıñ tuğan köne. Bügen böten törki-tatar dönyasında milli şağıyrgä bağışlap törle çaralar ütkärelä.
Tatarstan başqalası Qazanda Tuğan tel köne häm Ğabdulla Tuqaynıñ 136 yıllığı tantanalı räweştä bilgeläp ütelä. “Tatar-inform” agentlığı xäbär itüençä, 26nçı aprel’ sişämbe irtäsendä Tatarstan Däwlät başlığı Röstäm Miñnexanov häm Tuqay däwlät bülägenä namzätlär qatnaşında Tuqay häykälenä çäçäklär salındı.
Musa Cälil isemendäge Tatar akademiya opera häm balet teatrında äydäp baruçı artistlar häm mädäniyät êşlekleläre qatnaşında bäyräm konśertı quyıldı.
Şuşı minutlarda isä Qazannıñ Teatr uramındağı Ğabdulla Tuqay häykäle yänäşäsendä yıl sayın ütkärelä torğan şiğ’riyät bäyräme uzdı.
16 säğat’tä Ğaliäskär Qamal isemendäge Tatar däwlät teatrı qarşındağı mäydanda “Min tatarca söyläşäm” akśiyäsenä yomğaq yasaw häm gala-konśert buldı.
Tatarstan Prezidentı Röstäm Miñnexanov Tuğan tel könen häm Ğabdulla Tuqaynıñ tuuına 136 yıl tulunı bäyräm itü uñayınnan yasağan möräcäğätendä, Tuğan tel köneneñ möhimlegenä basım yasap, kürenekle tatar yazuçısı, cämäğät êşleklese Tufan Miñnullinnıñ: “Tuqay icatına xas yuğarı rux, internaśional’lek – anıñ üz xalqına bulğan ixlas mäxäbbäteneñ, suqırlarça tügel, bälki, añlı yaratunıñ ber kürsätkeçe. Şağıyr’neñ başqa xalıqlarğa qarata olı xörmäten näq’ menä şul añlı, bernindi xorafat qatnaşmağan mäxäbbät saqlap kilde”, - digän süzlären citkerde.
Tatarstan Baş ministr urınbasarı, Bötendönya tatar kongressı Milli Şura räise Vasil Şäyxrazıyıv isä üz qotlawnamäsendä: “Tuqay ul telebez sağında toruçı olı şağıyrebez, ä millätneñ yäşäyışendä tuğan tel iñ möhim urınnarnıñ bersen alıp tora”, - dip basım yasadı.
Çığışı belän Törkiyädän bulğan, bügenge köndä Tatarstanda yäşäwçe tärcemäçe, filolog, Tatarstan Yazuçılar berlege äğ’zase, küp sanda tatar ädäbi äsären törekçägä tärcemä itkän Fatix Kutlu, tatar milli şağıyre Ğabdulla Tuqaynıñ tuğan könenä bağışlap, xatiräse belän urtaqlaşa häm “Tuğan awıl” cırın başqara. Fatix äfändeneñ çığışın videoyazmadan qarıy alasız.
