Türkiye İlbaşı Ärdoğannıñ Üzbäkstan säfäre

2022nçe yılnıñ 29nçı-30nçı mart könnärendä Türkiye İlbaşı Räcäp Tayyip Ärdoğan Üzbäkstanğa räsmi säfär yasadı. Däwlät başlığı Ärdoğannı Taşkent xalıqara hawa mäydanında Üzbäkstan İlbaşı Şäwkät Mirziyayıv üze qarşı aldı.

Liderlar xäläl cefetläre belän bergä Taşkenttağı Yaña Üzbäkstan parkına bardı häm Räcäp Tayyip Ärdoğan biredäge Bäysezlek häykälenä çäçäk bäylämnären saldı. Şunı da äytep uzıyq: İlbaşı Ärdoğan Yaña Üzbäkstan parkına barğan häm Bäysezlek häykälenä çäçäk bäylämnären salğan berençe çit il liderı buldı. Monnan soñ Yaña Üzbäkstan parkı çit il liderları häm wäkillekläre, delegaśiyäläre ziyarät qılaçaq urın bulaçaq.

Çäçäk bäylämnären salu tantanasınnan soñ İlbaşı Ärdoğan Kük sarayda Üzbäkstan Däwlät başlığı Mirziyayıv tarafınnan räsmi tantana belän qarşı alındı. Räsmi qarşı alu tantanasınnan soñ Ärdoğan belän Mirziyayıv qara-qarşı söyläşte. Şuşı söyläşü waqıtında ike il liderı Türkiye-Üzbäkstan arasında ike yaqlı xörmätkä, duslıqqa häm ışanıçqa nigezlängän küpqırlı xezmättäşlekne tağın da arttıru turında fiker alıştı. Liderlar regional’ häm xalıqara kön tärtibenä qağılışlı mäs’älälärgä tuqtalıp uzıp, könüzäk mäs’älälärgä qarata totışlarınıñ oxşaş buluın belderde.

Üzara söyläşüdän soñ Ärdoğan belän Mirziyayıv Yuğarı däräcäle strategik xezmättäşlek şurasınıñ ikençe cıyılışın uzdırdı. Bu cıyılışta liderlar bıyıl Türkiye belän Üzbäkstan arasında diplomatik mönäsäbätlär urnaştırıluınıñ 30 yıllığınıñ qotlanuına häm 5 yıl êlek ike il arasındağı mönäsäbätlärneñ strategik urtaqlıq däräcäsenä kütärelüenä iğ’tibarnı yünältte.

Türkiye İlbaşı Räcäp Tayyip Ärdoğan ike il arasındağı “qardäşlekkä nigezlängän” strategik urtaqlıq mönäsäbätläreneñ ike yaqlı ışanıç häm ixtiram atmosferasında üseş aluın belderde. Taraflar ike yaqlı mönäsäbätlärne yaña däräcägä, yäğ’ni kiñqırlı strategik urtaqlıq däräcäsenä citkerü qararına kilde.

Cıyılıştan soñ "Östenlekle säwdä kileşüe", "Xärbi qısa kileşüe" belän bergä 9 kileşü häm kileşü memorandumı imzalandı.

İlbaşı Ärdoğan 30nçı mart könne Üzbäkstannıñ borınğı şähärlärennän Hivägä bardı. Hivälelär tarafınnan zur iğ’tibar häm dulqınlanu belän qarşı aldınğan Ärdoğan Üzbäkstan İlbaşı  Mirziyayıv belän bergä töbäktäge tarixi urınnarnı qaradı. Belengäne kebek, Hivä şähäre 2020nçe yılda Törki dönya mädäniyät başqalası bulğan ide.

Türkiye Üzbäkstannıñ iñ zur 4nçe urtağı wazğıyätendä. İlbaşı Mirziyayıv beldergänçä, ike yaqlı säwdä küläme soñğı biş yılda 2 tapqır, törek investorlarınıñ Üzbäkstanda kapital saluı 70 märtäbä, urtaq şirkät sanı 5 tapqır artqan.

İke yaqlı mönäsäbätlärneñ kiñqırlı strategik urtaqlıq däräcäsenä kütärelüe taraflarnıñ saqlanu sänäğäte ölkäsendä yaqın xezmättäşlek urnaştıruına mömkinlek birä. Taşkentta ike il saqlanu ministrlıqları arasında qul quyılğan kileşüneñ centeklelege açıqlanmadı. Fäqät Türkiye saqlanu sänäğäte êşlänmäläreneñ täêmin itelüe häm bu êşlänmälärneñ Üzbäkstanda citeşterelüe mäs’äläläreneñ ike ilneñ kön tärtibendä buluı belenä.

Yomğaqlap şunı äytergä bula: İlbaşı Räcäp Tayyip Ärdoğannıñ Üzbäkstan säfäre näticäle uzdı. Êlemtälärneñ barışı ike il mönäsäbätläreneñ tağın da kübräk üseş alaçağın kürsätä.

Abdrasul İsakov