Ukraina suğışınıñ Süriyädäge ixtimal näticäläre

Rusiyäneñ Ukrainadağı basıp alu omtılışı däwam itkändä Rusiya armiyäseneñ Ukraina qırındağı yuğaltuları tiränäyä. Däwlät başlığı Vladimir Putinnıñ irraśional’ xataları arqasında Rusiya zur xalıqara izolyaśiyädä. Putinnıñ Äsäd rejimınıñ xärbi köçlären Süriyädän Ukrainağa küçerä başlawı Ukraina suğışınıñ Süriyädäge ixtimal näticäläreneñ kötelgännän tizräk barlıqqa kilüen kürsätä başladı.

Rusiya ciñel ciñü êzlägändä adım - adım Ukrainanıñ pıçraq qırında batqan kebek toyıla. Suğışnıñ öçençe atnasında äle haman da möhim şähärlärne ala almağan häm hawa östenlege buldıra almağan Rusiya armiyäsen küräbez. Rusiya armiyäse qaqşatu suğışı alıp baruçı Ukraina ğaskärlärenä qarşı zur yuğaltular kiçerä. Bu xärbi küzlektän qarağanda totrıqlı, däwam itterelä ala torğan xäl tügel. Suğış qırında êşlär äybät barmağanda Putinnıñ Yaqın Könçığışta meñlägän üzixtiyarinıñ Ukraina suğışında Rusiyä armiyäsenä quşılırğa teläwen açıqlawınnan soñ  qaraşlar Yaqın Könçığışqa, ayıruça Süriyägä töbälde. Putinnıñ Ukraina macarasınıñ ,älbättä, Süriyädä dä näticäläre bulaçaq , läkin Äsäd rejimına bäyle xärbi köçlärne Ukraina suğışına küçerüe barışnı tizlätäçäk.

 Berençedän Süriyä qırındağı köç dinamikaları Rusiya häm Äsäd rejımına qarşı üzgärä başlayaçaq. Rusiya xärbi yaqtan Ukrainağa iğ’tibar birgändä ,Süriyädäge kamil xärbi cihazlarnı ,ayıruça täcribäle oçuçılar häm maxsus köçlärne Ukrainağa cibärä başladı. Vagner köçläre dä Ukrainağa kitä. Monnan tış, Törkiyä saqlanu sänäğäteneñ Bayraktar TB2 keşesez hawa apparatlarınıñ Rusiyäneñ ğadäti köçe qarşındağı uñışı da Törkiyäne Süriyädä Rusiyägä qarşı köçle qıla. Rusiya xärbi köymälärenä buğazlar yabılğaç Rusiyäneñ Süriyädäge xärbi täêmin itüe dä qatlawlana bara. Xalıqara izolyaśiyädä bulğan Rusiya iq’tisadınıñ Äsäd rejimına küpme waqıt yärdäm itä aluı da bilgesez.

 Älbättä könbatış bloknıñ, ayıruça AQŞnıñ, Süriyägä,biredäge Rusiya xärbi köçlärenä häm anıñ berlektäşe torışındağı Äsäd rejimına qaraşı bötenläy üzgäräçäk. Rejimnıñ ,Rusiya yaqlawı belän, xalıqara legal’legen yañadan torğızu tırışlığı  inde mömkin tügel. Süriyädäge säyäsi häm xärbi köç dinamikaları Törkiyä häm Süriyä oppoziśiyäse faydasına üzgäräçäk.  Äsäd rejimınıñ säyäsi çişeleştän bigräk xärbi çişeleş êzlänüläre dä bik mömkin kürenmi. Bu yaña tigezlämädä kübräk taşlamalar yasap, säyäsi çişeleş barışınıñ ber öleşe bulırğa tiyeş, yuğisä ul yaña xärbi variantlar belän dä oçraşırğa mömkin. Ukraina suğışınıñ ozaqqa suzıluı häm tiränäyüe Süriyädäge balanslarnı bu säbäplär tiräsendä nığıtaçaq.

 Can Acun

 Säyäsi,iq’tisadi häm soŝial’ tikşerenülär waqıfı SETAnıň  tışqı sӓyӓsӓt tikşerenüçese