Suğışlarnıň waqıt aralığı yasalma intellekt belän qısqartıla

Aqıllı qorallar êffektiv näticälärgä kiterä häm operaśiyälärdä östenlek täêmin itä. Mäğ’lümatnı analizlaw belän qurqınıçlarğa qarşı tiz arada êş itüçe sistemalar cir östendä, hawada häm diňgezdäge suğışlarnıň xarakterın üzgärtä.

Yasalma intellekt belän yaňa buın  suğışı

Texnologiya ireşkän noqtanı çağıldıruçı yasalma intellekt saqlanu sänäğätendä dä yaňa kiläçäk formalaştıra. Bügenge köndä armiyälär suğış qırında qatlawlı missiyälärgä häm küp qurqınıçlarğa duçar bula. Yasalma intellekt texnologiyäse belän êşlängän êşlänmälär suğışlarnıň waqıt aralığın qısqartalar  häm maqsatqa taba bik tiz räweştä êşlärgä mömkinlek birälär. 

"İň konkret misal itep keşesez hawa apparatların kürsätä alabız”

Saqlanu säyäsäte belgeçe Arda Mävlütoğlu “İň konkret misal bularaq keşesez hawa apparatların kürsätä alabız. Bu sistemalarda hawa, ciröste, diňgez transportınıň keşe qatnaşınnan başqa törle şartlarda üz qararların qabul itä ala torğan häm êlek cıyğan mäğ’lümatlar nigezendä üz bäyäläwlären üzläre yasawçu platformalar turında süz alıp barabız” dide. 

İllärneň töp maqsatına äwerelde

Üzgärüçän suğış şartlarında yasalma intellekt illärneň töp maqsatlarınıň berse buldı. Mäğ’lümat häm belem könnän kön arta barğanda suğış strategiyäläreneň üzägenä äwerelde.

Arda Mävlütoğlu yasalma intellektqa investiśiyälärneň illärneň töp maqsatına äwerelgänen assızıqlap, “Bu bik kiräkle äybergä äylände. Qurqınıçlar bik tiz üzgärä häm tiz reakśiya kiräk. Cıyılğan mäğ’lümatnı êşkärtü öçen  keşeneň tanıp belü köçe citmi başladı. Bik tiz qarar qabul itä alğan, qurqınıçqa qarap poziśiyäsen üzgärtkän, qararlar qabul itä  häm çaralar kürä alğan aqıllı sistemalar qullanılğanın küräbez” dide.

Xärbi ölkädä xalıqara balans yasalma intellekttan alınğan proyektlar belän bilgelänä. İllär bu ölkägä investiśiyälären arttıralar.

"Yasalma intellekt yoqlamağan ğaskärigä oxşağan”

Terror häm qurqınıçsızlıq belgeçe Abdullah Ağar bu mäs’älä xaqında mäğ’lümat birep bolay dide: “Yasalma intellekt Amerika, Qıtay, Rusiya häm İzrail öçen iň töp konśentraśiya ölkäläreneň berse. Çönki alar monıň yärdämendä suğışta ciňäçäklären yäki ciňeläçäklären belälär. Berqayçan da yoqlamağan, gel uyaw bulğan xärbi yasalma intellekt. Hawa saqlanu çeltärenä bäyle qurqınıçnı açıqlağaç şunduq aktivlaşa. Monı yasalma intellekt êşli”.

"Xatanıň üzqıymmäten kimetä”

Abdullah Ağar yasalma intellekt operaśiyälärdäge xatanıň üzqıymmäten kimetä dip äytep, tübändäge misalnı kiterde: AQŞ yasalma intellekt qullanılğan F-16 belän bik osta F-16 oçuçısın suğıştırdı. Suğışta yasalma intellekt ciňde. Ägär ul ciňelsä, pilotnı yuğaltmas, oçqıçnı ğına yuğaltqan bulır ide. İllärneň iň can ärnetüçe probleması bu – keşe yuğaltuın kimetü yäki beterü.

Xärbi ölkädä yasalma intellektqa qağılışlı iň möhim bäxäs êtika häm keşe xoquqları turında. İllär kiläçäk suğışlarına äzerlängändä yasalma intellektnı qullanu çiklären dä bilgelärgä tırışalar.

Çığanaq: TRT Xäbär