2021nçe yılda Törkiyäneñ Awraziya illäre belän mönäsäbätläre

2021nçe yıl kizü, pandemiya däwam itkän, waqıt-waqıt çiklär yabılğan, il iq’tisadları torğızılırğa tırışılğan yıl buldı. Şuşı awırlıqlarğa qaramastan Törkiyä Awraziya geografiyasındağı illär belän mönäsäbätlären canlı tottı. İke yaqlı säfärlär yasaldı.

2021nçe yılnıñ 15nçe-16nçı iyün’ könnärendä Törkiyä Cömhüriyäte İlbaşı Räcäp Tayyip Ärdoğan Azärbaycanğa säfär yasadı. Säfär waqıtında Şuşa bäyannamäsenä qul quyıldı. İlbaşı Ärdoğannıñ 2021nçe yılnıñ 26nçı üktäbr’ könge säfäre waqıtında isä Xalıqara Fuzuli hawa mäydanı açıldı. Törkiyä Böyek Millät Mäclese başlığı Mostafa Şäntop, ministrlar häm başqa törle wäkilleklär yıl buyı Törkiyädän Azärbaycanğa säfärlär yasadı.

2021nçe yılnıñ 29nçı sentyabr’ könne İlbaşı Ärdoğan Soçidä Rusiyä Däwlät başlığı Vladimir Putin belän küreşte. Putin – İlbaşı Ärdoğannıñ 2021nçe yılda telefonnan yış söyläşkän liderlar arasında.

İlbaşı Ärdoğan 2021nçe yılnıñ 27nçe-28nçe noyabr’ könnärendä Törekmänstanğa säfär yasadı. İke il arasında sigez kileşü imzalandı. Uzğan yılnıñ 28nçe noyabrendä Ärdoğan “Bergäläşep kiläçäkkä taba” teması belän ütkärelgän 15nçe İq’tisad xezmättäşlege oyışması sammitında qatnaştı.

2021nçe yılnıñ 4nçe mart könne İlbaşı Ärdoğannıñ çirattağı räislegendä 14nçe İq’tisad xezmättäşlege oyışmasınıñ yuğarı däräcäle oçraşuı ““KOVİD-19”dan soñ regional’ iq’tisadi xezmättäşlek” iseme astında onlayn bularaq oyıştırılğan ide.

2021nçe yılnıñ 27nçe iyün’ könne Törkiyä Cömhüriyäte İlbaşı urınbasarı Fuat Oktay 6nçı Törkiyä-Üzbäkstan xökümätlärara qatnaş iq’tisad komissiyası cıyılışında qatnaşu öçen Üzbäkstanğa säfär qıldı.

2021nçe yılnıñ 5nçe-10nçı mart könnärendä Törkiyä Cömhüriyäte Tışqı êşlär ministrı Mäwlüt Çavuşoğlu Urta Aziyanıñ öç ilenä (Törekmänstan, Üzbäkstan häm Qırğızstanğa) säfär yasadı. Çavuşoğlu Sämärqandta Törkiyä baş konsullığınıñ, Bişkäktä Qırğızstan-Törkiyä Manas universitetı qarşında sälämätlek saqlaw klinikası häm Pandemiya belän köräş laboratoriyasınıñ açılışın yasadı.

Törkiyä Cömhüriyäte Milli saqlanu ministrı Hulusi Akar 2021nçe yılnıñ 28nçe iyün’-2nçe iyül’ könnärendä Qırğızstanğa häm Tacikstanğa räsmi säfärlär yasadı.

2021nçe yılda Görcestan (Gruziya), Ukraina häm Qırğızstan liderları Törkiyäfä säfär qıldı. 2021nçe yılnıñ 1nçe iyün’ könne Gruziya (Görcestan) baş ministrı İrakliy Garibaşvili Törkiyägä prem’yer-ministr sıyfatı belän berençe säfären yasadı. 2021nçe yılnıñ 10nçı aprel’ könne Ukraina İlbaşı Vladimir Zelenskiy İstanbulğa kilde. Şuşı uq yılnıñ 9nçı-11nçe iyün’ könnärendä Qırğızstan İlbaşı Sadır Caparov Törkiyägä täwge säfären yasadı.

İlbaşı Räcäp Tayyip Ärdoğan 2021nçe yılnıñ 31nçe mart könne onlayn oyıştırılğan Törki Kiñäşmäneñ “Törkistan - törki dönyanıñ ruxi başqalalarınnan berse” isemle räsmi bulmağan sammitında qatnaştı. 2021nçe yılnıñ 12nçe noyabr könne İstanbulda 8nçe Törki kiñäşmä yuğarı däräcäle oçraşuı İlbaşı Ärdoğan räislegendä ütkärelde.

2021nçe yıl çiten, qatlawlı yıl buluına qaramastan Törkiyäneñ Awraziya illäre belän mönäsäbätläre totrıqlı räweştä däwam itelde. İke yaqlı säfärlär yasaldı häm xalıqara oyışmalarnıñ planlaştırılğan yuğarı däräcäle oçraşuları, sammitları ütkärelde. Töbäktäge illärdän Ukraina, Azärbaycan, Törekmänstan häm Qırğızstan Törkiyädän keşesez qorallı hawa apparatların aldı. Qısqası, 2021nçe yılda Törkiyä Awraziya geografiyasındağı illär belän mönäsäbätlären, êlemtälären nığıttı.

Abdrasul İsakov