Ärdoğannıñ Törekmänstan säfäre

Awraziya qaytawazı 14

1741644
Ärdoğannıñ Törekmänstan säfäre

27-28nçe noyabr’ könnärendä Törkiyä Cömhüriyäte ilbaşı Räcäp Tayyip Ärdoğan Törekmänstanğa säfär yasadı. 27nçe noyabr’dä Ärdoğannı Törekmänstan däwlät başlığı Gurbanguli Berdimöxämmädov Aşxabad şähärendä räsmi tantana belän qarşı aldı. Liderlar ike yaqlı häm wäkilleklärara söyläşülär ütkärde.

Söyläşülärdän soñ ike il arasında 8 kileşü imzalandı. Sälamätlek saqlaw, mäğarif, media, awıl xucalığı, bank êşe häm tışqı mönäsäbätlär ölkälärendä imzalanğan kileşülär ike yaqlı mönäsäbätlärneñ üsüenä öleş kertäçäk. Ayıruça ike il däwlät başlıqları imzası belän 9 maddädän toruçı urtaq belderge açıqlandı.

Soñınnan matbuğat oçraşuı oyıştırıldı. Oçraşuda liderlar urtaq säwdä külämen 5 milliard dollarğa citkerüne maqsat itülären belderde. Soñğı mäğlümatlarğa kürä ike ilneñ urtaq säwdä küläme - 2 milliard tiräse. Törkiyä ilbaşı Räcäp Tayyip Ärdoğanğa Törkiyä-Törekmänstan xezmättäşlegeneñ nığıtıluına kertkän öleşe öçen Däwlät ordenı birelde. 2017nçe yılda barlıqqa kiterelgän älege büläkne monnan alda Vladimir Putin alğan ide.

Törkiyä ilbaşı Törekmänstanğa soñğı tapqır 2015nçe yılda säfär yasadı. Törkiyä cähatennän Törekmänstan Üzäk Aziya häm Kön’yaq Aziyağa açıluçı qapqa bularaq zur ähämiyätkä iyä. İke il dä transport ölkäsendäge potenŝialın tulısınça qullanmadı. Zengezur koridorı açılsa, ike il arasındağı cir östendäge transport yulı tağın da qısqaraçaq. Könçığış-Könbatış Urta koridorı, Quyı zäñgär koridor kebek xalıqara transport çeltärläre dä Törkiyä häm Törekmänstannı ber-bersenä tağın da yaqınaytaçaq.

İlbaşı Berdimöxämmädov Azärbaycannıñ İqtisad ministrı Mikail Cabbarovnı soñğı 10 köndä 2 tapqır qabul itte. Söyläşüdä transport häm ênergetika ölkäsendäge xezmättäşlek mäs’äläläreneñ quzğatıluı belderelde. Törekmänstan häm Azärbaycan Xäzär diñgezendäge “Duslıq” ênergiya yatması porblemasın söyläşülär yärdämendä çişte. Törekmänstan tabiğıy gazı kiläse çorda Törkiyä häm könbatışqa êksportlana alınaçaq.

Uzuı planlanğan Azärbaycan-Törkiyä-Törekmänstan 3 yaqlı oçraşuında mönäsäbätlärne yaña däräcägä çığaraçaq qararlar qabul itelä alınaçaq.

28nçe noyabr’ könne Aşxabad şähärendä “Bergä kiläçäkkä” teması belän 15nçe İqtisadi xezmättäşlek oyışması oçraşuı uzdı. Oçraşuda Azärbaycan, İran, Qazaqstan, Qırğızstan, Üzbäkstan, Paqıstan, Tacikstan, Törkiyä häm Törekmänstan liderları qatnaştı.

Oçraşuda Törkiyä ilbaşı Räcäp Tayyip Ärdoğan oyışmanıñ çirattağı räislegen Törekmänstan däwlät başlığı Berdimöxämmädovka tapşırdı. Ärdoğan oçraşuda çığış yasap, TURKOVAC vakŝinasın raslanğannan soñ bar keşelekkä täqdim itäçäklären belderde. Ayıruça Äfğanstanğa humanitar yärdäm cibärüneñ möhim buluın assızıqladı häm oyışmağa äğza däwlätlärne Tön’yaq Kipr Törek Cömhüriyäte belän mönäsäbätlärne üsterergä çaqırdı.

Oçraşu azağında liderlar tarafınnan Aşxabad kileşüe raslandı. Fän häm texnologiya, igençelek häm tirä-yaq moxitnı saqlaw, tarix, mädäniyät, ädäbiyat häm sänğat’ ölkälärendä büläklär tapşırıldı. Oçraşu qısalarında êş forumı da ütkärelde.

Qısqası Törkiyä ilbaşı Räcäp Tayyip Ärdoğannıñ Törekmänstanğa säfäre näticäle uzdı.

 

 

 



Bäyläneşle xäbärlär