Şäwkät Mirziyoyevnıñ Rusiyägä säfäre

Awraziya qaytawazı - 13/2021

1738166
Şäwkät Mirziyoyevnıñ Rusiyägä säfäre

2021nçe yılnıñ 19nçı noyabendä Üzbäkstan ilbaşı Şäwkät Mirziyoyev Rusiyägä säfär yasadı. Ul Mäskäwdä däwlät başlığı Vladimir Putin belän oçraşıp ikeyaqlı mönäsäbätlärneñ xäzerge däräcäsennän qanäğat’ buluın belderde. İke il arasında säwdä äyläneşe 7 milliard dollarğa yaqınlaşa. Kreml’däge oçraşudan soñ tağın 18 kileşü imzalandı.

Säfär qısalarında ike däwlät arasında 3 zur forum oyıştırıldı. İkençe Rusiyä – Üzbäkstan töbäklärarası xezmättäşlek forumında 14 milliard dollarlıq kileşü tözelde.

Rusiyä strategik xezmättäşlekkä iyä illär belän mondıy forumnarnı soñğı yıllarda yış oyıştıra. Häm alar barı cirle idarälär belän çiklänmiçä barlıq mäydannarnı qolaçlawçı, tiz arada ikeyaqlı mönäsäbätlärneñ lokomotivı wazıyfasın başqaruçı çarağa äwerelä.

İkençe Rusiyä-Üzbäkstan mäğarif forumında 35 kileşü imzalandı. Üzbäkstanda Rusiyäneñ 15 yuğarı belem birü oyışmasınıñ filialları êşçänlek alıp bara. İke ilneñ rektorları uzğan may ayında Boxarada tağın ber forum oyıştırğan ide. Sonğı berniçä yılda, xökümätlärarası kileşü nigezendä, yözlärçä rusiyäle uqıtuçı Üzbäkstanda rus tele däresläre birä. İke arada mäğarif ölkäsendäge xezmättäşlek yuğarı däräcädä.  

İkençe Rusiyä-Üzbäkstan media forumında ike ilneñ älege alandağı xezmättäşlekne üsteräçäge, çit il propagandasına qarşı täcribä urtaqlaşaçağı belderelde. Däwlät başlıqları mäğ’lümat qurqınıçsızlığı mäs’äläsendä urtaq memorandum imzaladı.

18nçe noyabr’dä Üzbäkstannıñ Qanot Şarq hawa yulı şirkäte Taşkenttan Soçiğa täwge säfären oyıştırdı. Transport mäydanında Rusiyä - Üzbäkstan öçen  strategik däwlät.

Xäbärlärdä Mirziyoyevnıñ ilbaşı bularaq saylanğannan soñ berençe räsmi säfären Rusiyägä yasawı assızıqlana. Monda anıñ täwge çit il säyäxäten Törkiyägä yasawın äytep uzarğa kiräk. Mirziyoyev 12nçe noyabr’dä İstanbulda Törki däwlätlär oyışmasınıñ 8nçe sammitında qatnaştı.

Üzbäkstan ilbaşı ofisınnan belderülärençä, Rusiyä belän ike arada bıyıl 50dän artıq yuğarı däräcäle säfär yasalğan. Bu xäl mönäsäbätlärneñ üsüenä öleş kertä. Äytik, Üzbäkstanda êşçänlek alıp baruçı rus şirkätläreneñ sanı 2 meñnän arttı häm Rusiyä, Qıtaydan soñ, Üzbäkstanğa iñ küp investiśiyä kertkän ikençe däwlät buldı.  

Rusiyä häm Üzbäkstan monnan soñ ikeyaqlı säwdä äyläneşendä êtaplap dollardan baş tartu häm cirle aqça berämlege qullanu qararı çığardı.  

İlbaşı Şäwkät Mirziyoyev çorında Rusiyä belän ike aradağı mönäsäbätlär, çınnan da, yaña däräcägä kütärelde. Ruslarnıñ Üzbäkstanda atom-töş êlektr stanśiyäse töziyäçäge monı açıq kürsätä. Şul uq waqıtta, Üzbäkstan Kollektiv iminlek kileşüe oyışması, Awraziyä iq’tisadi berlege şikelle Rusiyä citäkçelek itüçe berläşmälärgä kermiçä, üzeneñ bäysez säyäsäten alıp baru mäs’äläsendä täwäkkäl buluın da anıq itä.  



Bäyläneşle xäbärlär