Törekmänstan ilbaşınıñ Üzbäkstanğa säfäre

Awraziya qaytawazı 7/2021

1718918
Törekmänstan ilbaşınıñ Üzbäkstanğa säfäre

 

Törekmänstan ilbaşı Gorbangulı Berdımöxämädov 4-5 nçe oktyabr’ könnärendä Üzbäkstanğa räsmi vizit belän kilde. Üzbäkstan ilbaşı Şäwkät Mirziyayev anı Taşkenttağı İslam Kärimov isemendge xalıqara aêroportta qarşı aldı.

5 nçe oktyabr’dä ike il liderları üzara häm wäkilleklär ara söyläşülär ütkärde. Söyläşülär näticäsendä ike il mönasäbätläreneñ törle ölkälären üz êçenä alğan 23 kileşü imzalandı.

Säfär qısalarında 4 nçe oktyabr’dä Taşkentta ike ilneñ prem’yer - ministrlar urınbasarları qatnaşında Üzbäkstan – Törekmänstan Êş forumı ütte. İke il oyışmaları häm şirkätläre arasında 13 kileşügä qul quyıldı.

İlbaşı Berdımöxämädovnıñ vizitı aldınnan Törekmänstan wäkillekläre Üzbäkstanda söyläşülär ütkärgän ide. Bıyılnıñ 13 nçe sentyabrendä Taşkentta täwge tapqır Üzbäkstan –Törekmänstan su problemaları buyınça xökümätara komissiya cıyılışı uzdı. Su probleması töbäk illäreneñ iñ möhim problemalarınıñ berse buluın isäpkä alğanda mondıy cıyılışlar ütkärü maqtawğa layıq küreneş.

Monnan tış 14 nçe sentyabr’dä Üzbäkstan – Törekmänstan xökümätara komissiyäseneñ 16 nçı cıyılışı da näticäle uzğan ide. İke il arasındağı säwdä küläme 2017 nçe yılda 177 million dollar bulğan bulsa, 2020 nçe yılda 527 million dollarğa qadär arttı. Üzbäkstan häm Törekmänstan urtaq säwdä külämen kiläse yıllarda 1 milliard dollarğa qadär citkerergä uylıylar.

 Törekmänstan häm Üzbäkstan üzara qızıqsınularğa yünälgän qazan-qazan prinśibın qullanıp xalıqara bazarda tağın da kübräk öleş alu öçen xezmättäşlekne yaña däräcägä kütärergä tırışalar. Monnan alıp Üzbäkstan Könbatışqa, Törekmänstan Könçığışqa, ber-berseneñ mömkinleklärennän faydalanıp, tağın da ciñelräk ireşäçäk. İke il liderları cir öste, diñgez häm timer yul transportında ber-bersenä yärdäm itäçäklären belderdelär.

Taşkenttağı cıyılışta qabul itelgän qarar watandaşlarnıñ kerü-çığuın ciñeläytäçäk, ike il arasındağı mönäsäbätlärneñ, ayıruça säwdä mönäsäbätläreneň, alga taba üseşenä yärdäm itäçäk. Çik buyı töbäklärendä säwdä yortların açu häm töbäklär arasında üzara xezmättäşlekne üsterü maqsatınnan Xivädä Üzbäkstan -Törekmänstan regional’ forumın oyıştıru qararları – säfärneň konkret näticälärennän qayberläre. Liderlar şulay uq ike ilneň kürşe illäre arasında üzara säfärlärne arttıru turında cirle citäkçeleklärgä boyırıqlar da birdelär.

Sänäğät’ ölkäsendä citeşterü başqaraçaq urtaq şirkätlär tözü turında kileşü täêmin itü Berdımöxämädovnıñ Taşkentqa säfäreneň iň möhim näticäläreneň  berse dip äytä alabız.

Törekmänstan häm Üzbäkstan ilbaşları Urta Aziya töbäge problemalarında urtaq êş başqaruların belderdelär. Regional’ mäs’älälärdä kileşülär täêmin itü Urta Aziya illäre arasında integraśiyäne tizlätäçäk.

Tacikstannan ayırmalı bularaq, Üzbäkstan häm Törekmänstan Äfganstannıň yaňa xakimiyäte belän söyläşülär alıp bara. İke ilneň dä Äfganstanda zur investiśiyäläre bar. Transport häm ênergetika ölkälärendä salınğan investiśiyälär yärdämendä Törekmänstan häm Üzbäkstan Kön’yaq Aziyägä  barıp citärgä teli. Taşkenttağı oçraşu waqıtında Mirziyayev häm Berdımöxämädov Äfganstanğa bulışuların däwam itäçäklären belderdelär.

Yomğaqlap äytkändä, Törekmänstan ilbaşı Gorbangulı Berdımöxämädovnıň Üzbäkstanğa säfäre näticäle buldı häm ike yaqlı  mönäsäbätlärne tağın da  üsterü adımnarı yasaldı.

 

Avtor – Abdrasul İsakov

 

 



Bäyläneşle xäbärlär