Törkiyädä qayçan oçqıç yasıy başlıylar?

Törkiyädä berençe oçqıç êşxanäseneñ 1926nçı yılda tözelüen belä idegezme?

Cömhüriyät iğ’lan itkännän soñ Törkiyä här mäydanda üseş prośessı başlıy. Aviaśiya şulardan berse. Mostafa Kämal Atatörek Törkiyädä älege tarmaqnıñ üseşenä zur ähämiyät birä. 1925nçe yılnıñ 7nçe sentyabrendä ministrlar kabinetı qararı belän 3 million yarım lira kapital nigezendä şirkät tözelä. Akśiyälärneñ 51%ı Törkiyä milli saqlanu ministrlığınıqı, 49%ı – Germaniyäneñ Yunkers oçqıç firmasınıqı bula.

Kayseri oçqıç êşxanäse öçen kiräkle cihazlar Germaniyädän kiterelä. 1926nçı yılnıñ 6nçı oktyabrendä ob’yekt däwlät tantanası belän açıla.  6 angarda 50 törek, 120 nemeś êşçe belän citeşterü başlana. Ul tözelgändä dön’yadağı iñ zur oçqıç êşxanäläreneñ berse bula.  

Açılğannan soñ 2 yıl ütkäç Germaniya şirkäte akśiyälären Törek aviaśiya berlegenä tapşıra häm ob’yekt küpmeder waqıtqa citeşterüen tuqtata. 1930nçı yılda Kayseri oçqıç êşxanäse qabat açıla häm 1942nçe yılğa qadär anda 7 törle model’dä 212 oçqıç çığarıla.

1940nçı yıllarda AQŞnıñ Törkiyägä yasağan Marşall yärdäme yoğıntısında oçqıç êşxanäse başta citeşterüne tuqtata, soñınnan ul aviaśion taşu häm tözekländerü üzägenä äwerelä.