Düşänbedä iminlek häm xezmättäşlek cıyılışları

Awraziya qaytawazı 04/2021

1709657
Düşänbedä iminlek häm xezmättäşlek cıyılışları

16nçı-17nçe sentyabr’ könnärendä Tacikstan başqalası Düşänbedä Kollektiv iminlek kileşüe oyışması häm Şanxay xezmättäşlek oyışmasınıñ cıyılışları ütkärelde.

İñ êlek Tacikstan İlbaşı İmamali Raxman räislegendä Kollektiv iminlek şurası cıyılışı uzdırıldı. 16nçı sentyabr’dä oyıştırılğan bu cıyılışta Rusiyä Däwlät başlığı Vladimir Putin video konferenśiya ısulı belän, Belarus İlbaşı Aleksandr Lukaşenko, Ärmänstan Baş ministrı Nikol Paşinyan, Qazaqstan Däwlät başlığı Qasım Cömärt Tokayev häm Qırğızstan İlbaşı Sadır Caparov turıdan-turı üzläre qatnaştı.

Biredä şunı da äytep uzıyq: Rusiyä liderı tirä-yağındağı keşelärdä koronavirus tabıluı arqasında 14nçe sentyabr’dä üzen karantin astına alğan ide.

Kollektiv iminlek şurası cıyılışında Äfğanstandağı täräqqiyätlär häm şuşı täräqqiyätlärneñ äğ’za däwlätlärneñ iminlegenä yoğıntısı tikşerelde. Ayıruça oyışmanıñ soñğı waqıttağı êşçänlegeneñ näticäläre söyläşelde. Oyışmanıñ ğomum särkätibe Stanislav Zas beldergänçä, oyışmağa äğ’za illärneñ liderları Äfğanstannan artqan yanawlarğa qarşı köräştä xezmättäşlekneñ üsterelüe öçen östämä tırışlıqlar kürsätü mäs’äläsendä kileşte. Oyışma çik buyındağı wazğiyät naçarayğan oçraqta Tacikstannıñ iminlegen täêmin itügä qağılışlı kollektiv çaralarnı qamilläşterde häm Düşänbe tarafınnan täq’dim itelgän Tacikstan-Äfğanstan çik buyınıñ köçäytelüe programması belän bäyle êşçänlekne tizlätü qararına kilde. Kollektiv iminlek şurası cıyılışında kollektiv tiz xäräkät itü köçläreneñ modern qorallar häm xärbi caylanmalar belän cihazlandırıluına qağılışlı planğa häm başqa möhim dokumentlarğa qul quyıldı. Ayıruça oyışmanıñ çirattağı räislege Tacikstannan Ärmänstanğa küçte.

17nçe sentyabr’dä Şanxay xezmättäşlek oyışmasınıñ Däwlät başlıqları sammitı oyışmağa äğ’za bulğan häm küzätüçe statusındağı illärneñ liderları qatnaşuında Tacikstan İlbaşı İmamali Raxman räislegendä uzdırıldı.

Bu cıyılışta Qazaqstan, Qırğızstan, Belarus, Üzbäkstan, İran, Törekmänstan häm Paqıstan Däwlät başlıqları turıdan-turı üzläre qatnaştı.  Rusiyä, Qıtay, Hindstan häm Mongoliya ilbaşları cıyılışqa video konferenśiya ısulı belän quşıldı.

Yuğarı däräcäle oçraşuda töbäk iminlege, terrorçılıq belän köräştä êşçänlek koordinaśiyäse häm küzätüçe illär belän xezmättäşlekneñ köçäytelüe belän bäyle mäs’älälär quzğatıldı. Oyışmanıñ 20 yıllığı qotlanğan şuşı sammitta Şanxay xezmättäşlek oyışmasınıñ 20 yıllığına bağışlanğan Deklaraśiya belän ber rättän 30 dokumentqa imza salındı. Oyışmağa äğ’za illär şuşı deklaraśiyädä Äfganstan cämğiyätendäge böten êtnik, dini häm säyäsi törkemnärneñ qatnaşuında Äfğanstanda kiñ qolaçlı xökümät tözelüeneñ möhim buluın belderde. Ayıruça deklaraśiyädä Şanxay xezmättäşlek oyışmasına äğ’za illärneñ Äfğanstannıñ terrorçılıqtan, suğıştan häm narkomaniyadan arınğan bäysez, tarafsız, berdäm, demokratik häm kileşü yaqlı, tınıç däwlät buluın yaqlawlarına basım yasaldı.

İrannıñ oyışmağa qabul itelüe prośedurasınıñ başlatıluın küzdä totqan xezmättäşlek dokumentı yuğarı däräcäle oçraşuda qul quyılğan iñ möhim dokumentlardan berse ide.

Şanxay xezmättäşlek oyışmasınıñ Däwlät başlıqları sammitı tögällängännän soñ Kollektiv iminlek kileşüe oyışması belän Şanxay xezmättäşlek oyışmasınıñ Äfğanstan belän bäyle urtaq cıyılışı ütkärelde.

Bu cıyılışta däwlät başlıqları Äfğanstan probleması belän bäyle qaraşların häm täq’dimnären citkerde. Kollektiv iminlek kileşüe oyışması belän Şanxay xezmättäşlek oyışmasınıñ Düşänbedä urtaq cıyılış uzdırıp, tığız xezmättäşlekkä taba adım yasawların äytergä bula.

Avtor – Abdrasul İsakov



Bäyläneşle xäbärlär