Ukraina däwlät başlığınıñ Amerika Quşma Ştatlarına säfäre

Awraziya qaytawazı 03/2021

1705859
Ukraina däwlät başlığınıñ Amerika Quşma Ştatlarına säfäre

 

Ukraina däwlät başlığı Vladimir Zelenskiy AQŞ ilbaşı Djo Bayden çaqıruı buyınça 31 nçe avgust – 3 nçe sentyabr’ könnärendä AQŞqa räsmi säfär yasadı. Bu - Zelenskiynıñ Amerika Quşma Ştatlarına berençe räsmi vizitı. Zelenskiy 31 nçe avgustta Vaşingtonda AQŞ ênergetika ministrı Djennifer Granxol’m belän oçraştı. Oçraşuda Tön’yaq ağım -2 proyektı qısalarında Ukraina häm töbäkneñ ênergiya qurqınıçsızlığı turında fiker alıştılar. Şul uq könne Vladimir Zelenskiy Amerika milli aviaśiya häm ğaläm idaräse NASA citäkçese Bill Nel’son belän oçraşıp Ukraina kosmik institutlarınıñ NASA proyektlarında häm programmalarında qatnaşuı turında söyläşte.

Ukraina ilbaşı räsmi säfäreneñ ikençe könendä Bötendönya bankı başlığı Dêvid Malpass belän oçraştı. Zelenskiy Ukrainadağı reformalar häm Ukrainanıñ üzgäreş planı xaqında mäğ’lümat birde, Bötendönya bankın bu üzgäreş planın tormışqa aşıruda qatnaşırğa çaqırdı. Soñraq Zelenskiy AQŞ töşençä oyışmaları wäkilläre häm jurnalistlar qatnaşqan cıyılışta üzgäreş planın centekläp añlattı. Anıñ ğomumi bäyäse 277 milliard dollar häm ul 80 nän kübräk proyektnı üz êçenä ala.

Vladimir Zelenskiy 1 nçe sentyabr’ könne AQŞ saqlanu ministrı Lloyd Ostin belän Pentagonda küreşte. Şul uq könne AQŞ ilbaşı Djo Bayden Aq Yortta Ukraina däwlät başlığı belän üzara häm wäkilleklär ara oçraşular ütkärde. Bu oçraşular aldınnan ike il liderı Oval ofista jurnalistlar aldında qısqa çığış yasadı. Bayden üz çığışında:”AQŞ Rusiya agressiyäse qarşında Ukrainanıñ möstäqil’legenä häm cir bötenlegenä tuğrı qala”,-dide. Zelenskiy isä oçraşudan soñ tvitter akkauntında Bayden belän qurqınıçsızlıq problemaları turında söyläşülären yazdı.

Ukraina dawlät başlığı Vladimir Zelenskiy 2 nçe sentyabr’dä Vaşingtonda AQŞ Kongressınıñ Ukrainağa qağılışlı êşçänlek başqaru  törkeme äğ’zaları belän oçraşqannan soñ Kaliforniyägä kitte. Zelenskiy 3 nçe sentyabr’dä räsmi säfär qısalarında Kremniy üzänlegendä tanılğan investorlar häm kereşü kapitalı fondı wäkillare belän oçraştı, alarnı Ukraina belän xezmättäşlek itärgä öndäde.

 Ukraina däwlät başlığı Vladimir Zelenskiynıñ AQŞ säfäre bik näticäle buldı. Vizit barışında ike il arasında qurqınıçsızlıq, saqlanu, iq’tisad, ênergiya, sälamätlek saqlaw ölkälärendä xezmättäşlek itü turında kileşülär imzalandı.

AQŞ – Ukraina strategik partnyerlığı turındağı urtaq belderü nigezendä AQŞ xökümäte bıyıl Ukrainağa demokratiya, keşe xoquqları, cirle citäkçelek,xosusıylaştıru häm xökem çığaru reformasına yünältelgän programmalar öçen 463 million dollardan artıq yärdäm kürsätergä uylıy. AQŞ Kovid -19 nıñ taraluına qarşı köräş, vakśinalarnı taşu häm saqlaw öçen Ukrainağa östämä 12 million 800 meñ dollar bülep biräçäk. Monnan tış, AQŞ Donbasstağı suğışta zıyan kürgän häm gumanitar yärdämgä moxtac keşelärgä bıyıl 45 million dollar yärdäm kürsätäçäk.

 

Avtor – Abdrasul İsakov

 



Bäyläneşle xäbärlär