Ӓrmӓnstannıñ kürşe dӓwlӓtlӓr belӓn mönӓsӓbӓtlӓre

Awraziya qaytawazı 87

1696580
Ӓrmӓnstannıñ kürşe dӓwlӓtlӓr belӓn mönӓsӓbӓtlӓre

“Awraziya qaytawazı” tapşıruınıñ çirattağı çığarılışın tӓqdim itӓbez. Bügenge tapşıruıbızda Ӓrmӓnstannıñ kürşe dӓwlӓtlӓr belӓn mönӓsӓbӓtlӓrenӓ tuqtalırbız.

18nçe avgustta Ӓrmӓnstan prem’yer-ministrı Nikol Paşinyan xökümӓteneñ 5 yıllıq planın açıqlap, tışqı sӓyӓsӓttӓ kürşelӓre belӓn yaqın xezmӓttӓşlek başqaraçaqların belderde. Annarı ber televideniye kanalında çığış yasağan Paşinyan alşartlar bulmıyça Törkiyӓ Cömhüriyӓte belӓn mönӓsӓbӓtlӓrne cayğa salırğa ӓzer buluın ӓytte. Nikol Paşinyanğa kürӓ Ӓrmӓnstan belӓn Törkiyӓ arasında diplomatik mönӓsӓbӓtlӓrneñ bulmawı, çik buylarınıñ yabıq toruı regional’ totrıqlılıq hӓm tınıçlıqqa tiskӓre tӓêsir itӓ.

Prem’yer-ministr Paşinyannıñ mondıy açıqlaw yasawı kötelmӓgӓn waqıyğa bulmadı. Belgӓnebezçӓ Nikol Paşinyan xaqimiyӓtkӓ könbatış belӓn yaqınayırğa wӓgdӓ birep kilde. Könbatış belӓn yaqınayu isӓ Gruziya hӓm Törkiyӓ belӓn mönӓsӓbӓtlӓrne üsterü digӓn süz. Paşinyannıñ Grajdan kileşü partiyase kürşelӓre belӓn yaxşı mönӓsӓbӓtlӓr qoru niyӓten monnan alda da citkerӓ ide. Ğomüm saylaw barışında Törkiyӓ belӓn mönӓsӓbӓtlӓrne küzdӓn kiçerü turında süz bardı.

20nçe iyun’ könne uzğan ğomüm saylawda ciñü yawlağan xaqimiyӓttӓge Grajdan saqlanu partiyaseneñ xökümӓt qoru öçen koaliśiyağa ixtıyac toymawı Nikol Paşinyannıñ kürşe dӓwlӓtlӓr belӓn mönӓsӓbӓtlӓren cayğa salu öçen mömkinlek tudıra. Ӓrmӓn xalqı Qarabaxta ciñelüenӓ qaramastan Paşinyannı qabat xaqimiyӓtkӓ kitertep, anıñ kürşelӓr belӓn mönӓsӓbӓtlӓrne tözӓtü süzen xuplawların ӓytӓ alabız.

2nçe avgustta Nikol Paşinyan qabat xökümӓt rӓise bulıp saylandı. Xӓzerge waqıtta yaña kabinet açıqlanğanda tışqı êşlӓr ministrı soñğı itep bilgelӓnde. Prem’yer-ministr Nikol Paşinyanğa yaqın buluı belӓn belenüçe Ararat Mirzoyannıñ tışqı êşlӓr ministrı bularaq bilgelӓnüennӓn soñ qayber dairӓlӓr anı diplomat bulmağanı öçen tӓnqıyt’lӓde. Paşinyan bӓlki dӓ tışqı sӓyӓsattӓ yaña adımnar yasar öçen yuldaşı Ararat Mirzoyannı bu wazğıyfağa kiterde. Tışqı êşlӓr ministrı Mirzoyan Törkiyӓne yaxşı tanıp belüçe hӓm könbatış tarafdarı bularaq belenӓ.

44 kön barğan Tawlı Qarabax suğışınnan soñ Rusiyӓ, Azӓrbaycan hӓm Ӓrmӓnstan tarafınnan qorılğan 3 yaqlı komissiya berniçӓ aylıq kileşmӓwçӓnlek çorınnan soñ qabat êşçӓnleklӓren başlattı. Bu wazğıyӓt’ Paşinyan xökümӓteneñ kürşelӓr, ayıruça da Törkiyӓ belӓn mönӓsӓbӓtlӓren cayğa saluğa uñay qarawına işarӓt itӓ. Ӓlege 3 yaqlı komissiya şaqtıy mӓs’ӓlӓne qarıy. Lӓkin Zangezur koridorı proyektı bu mӓs’ӓlӓlӓrdӓn iñ ӓhӓmiyӓtlelӓrennӓn berse.

Ärmӓn sӓyӓsӓtendӓ köç yuğaltqan Qarabax klanı bu barışnı tuqtatu öçen qulınnan kilgӓnne başqarırğa tırışaçaq. Fӓqat Ӓrmӓnstan êçke sӓyӓsӓtendӓ ayıq aqılnıñ ciñӓçӓgenӓ ışanabız.

Törkiyӓ hӓm Azӓrbaycan bergӓ tӓqdim itkӓn regional’ Altı yaqlı mӓydan barlıq bӓylӓneşle taraflar faydasına bulaçaq. Ӓrmӓnstannıñ qalqınuı kürşelӓre belӓn mönӓsӓbӓtlӓren üsterüenӓ bӓyle. Törkiyӓneñ Rusiyӓ Federaśiyase belӓn bulğan mönӓsӓbӓtlӓre Kön’yaq Qavqazda xezmӓttӓşlekneñ nığıtıluına yaraqlı nigez ӓzerli. Mondıy sӓbӓplӓr Paşinyan xökümӓten tışqı sӓyӓsattӓ citdi adımnar yasarğa qıyulandırdı bӓlki.

Avtor – Abdrasul İsakov



Bäyläneşle xäbärlär