Qırğızstan ilbaşınıñ töbäk illärgä säfäre

Awraziya qaytawazı 82

1677965
Qırğızstan ilbaşınıñ töbäk illärgä säfäre

"Awraziya qaytawazı” tapşıruınıñ bügenge çığarılışında Qırğızstan däwlät başlığı Sadır Caparovnıñ Urta Aziya töbägendäge illärgä yasağan säfärenä tuqtalırbız.

Qırğızstan ilbaşı Sadır Caparov däwlät başlığı sıyfatında berençe çit il säfärlären çınğa aşıra. Caparov 27-29 iyun’ könnärendä Törekmänstan häm Tacikstanğa räsmi säfär yasadı häm 2nçe iyul’dä Tışqı êşlär ministrı Ruslan Kazakbayevnı Azärbaycanğa cibärde. Xäzer isä bu säfärlärne centekläp qarap uzıyq.

İlbaşı Sadır Caparov 27-28nçe iyun’dä Törekmänstanğa räsmi säfär belän kitte. Törekmänstan ilbaşı Gurbanguli Berdimuhammedov Aşxabadta Caparovnı räsmi tantana belän qarşı aldı. Törekmänstan häm Qırğızstan liderları üzara küreşep söyläşte. Annarı wäkilleklärara cıyılış uzdı. Taraflar 100 million dollarlık urtaq qalqınu fondın barlıqqa kiterü, Törekmänstan tabiğıy gazınıñ, êlektr ênergiyaseneñ Qırğızstanğa közen häm qışın qudırıluı, Bişkekta törekmän säwdä yortınıñ häm Isık küldä Törekmänstan qunaqxanäseneñ tözelüe mäs’älälärendä kileşte. Törekmänstan häm Qırğızstan arasında barlığı 14 kileşügä qul quyıldı. Säfär qısalarında Törekmän-Qırğız êş forumı oyıştırıldı.

İlbaşı Sadır Caparov 28nçe iyun’dä Törekmänstannan Tacikstanğa küçte. Tacikstan däwlät başlığı İmamğali Raxman Duşanbeda Caparovnı räsmi tantana belän qarşı aldı. Soñınnan liderlar 6 sägät’tän artıq üzara küreşep söyläşte. Annarı wäkilleklärara cıyılış ütkärelde. Cıyılıştan soñ 4 kileşü imzalandı.

2nçe iyul’ könne Qırğızstan tışqı êşlär ministrı Ruslan Kazakbayev Azärbaycanğa säfär oyıştırdı. Ruslan Kazakbayev Baqıda Azärbaycannıñ Mäcles başlığı, prem’yer-ministrı, tışqı êşlär ministrı häm räsmi zatlar belän söyläşülär ütkärde. Azärbaycan häm Qırğızstan tışqı êşlär ministrları söyläşüendä ike yaqlı ham regional’ mäs’älälär quzğatıldı. Söyläşü axırında ike il tışqı êşlär ministrlıklarınıñ 2021-2022 yılların üz êçenä aluçı xezmättäşlek programması imzalandı. Kazakbayevnıñ Baqığa ilbaşı Sadır Caparovnıñ xatın däwlät başlığı İlham Aliyevka tapşırır öçen kilüe häm xatta ike yaqlı mönäsäbätlärne strategik däräcägä citkerü, Üzäk Aziya+Kön’yaq Qavqaz (5+3) Xezmättäşlek mäydanın qoru täqdimnäreneñ buluı belderelde.

İlbaşı Sadır Caparovnıñ tışqı säyäsättä östenlekne töbäktäge urtaq yazmışı bulğan qardäş, kürşe illärgä birüe soqlandıra. Qardäş illär belän berlek, ahäñ urnaştırmıyça qalqınu, zur köçlärneñ basımnarına qarşı toru awır. Urta Aziya Cömhüriyätläre liderlarınıñ räsmi bulmağan oçraşuı bıyıl Törekmänstan yäisä Qırğızstanda kötelä. Aşxabada Caparov häm Berdimuhammedovnıñ bu mäs’älädä qarar qabul itülären çamalarğa mömkin.

Äfğanstannan kilä alaçaq iminlek yanawın beterü häm Äfğanstanda tınıçlıq häm totrıqlılıqnı urnaştıru da töbäk illäre köçlären berläştergän oçraqta mömkin bulaçaq. Caparovnıñ çik buyındağı bäreleşkä qaramastan Duşanbeğa säfär yasawın Äfğanstan belän bäyle iminlek mäs’älälären töbäk illäreneñ urtaq räweştä çişü tırışlığı belän açıqlap bula.

Sadır Caparov täqdim itkän Üzäk Aziya+Kön’yaq Qavqaz (5+3) Xezmättäşlek mäydanın tormışqa aşırırğa waqıt citte. Çönki ozaq yıllar buyı bäxäsläşelgän Xäzär diñgeze statusı çişeleşkä qawıştı. Qavqaz häm Urta Aziya liderları üz aralarında küreşep söyläşä. Üzäk Aziya + Kön’yaq Qavqaz (5+3) Xezmättäşlek mäydanı çınğa aşırılsa, möhim êşlär başqara alınaçaq.

Avtor – Abdrasul İsakov



Bäyläneşle xäbärlär