Törkiyä-Üzbäkstan mönäsäbätläreneñ soñğı torışı

Awraziya qaytawazı 80

1671811
Törkiyä-Üzbäkstan mönäsäbätläreneñ soñğı torışı

27nçe iyün’ könne Törkiyä Cömhüriyäte Däwlät başlığı urınbasarı Fuat Oktay  6nçı Törkiyä-Üzbäkstan xökümätlärara qatnaş iq’tisad komissiyası cıyılışında qatnaşu öçen Üzbäkstanğa säfär yasadı. Taşkentta Fuat Oktaynı Üzbäkstan Baş ministr urınbasarı Sardor Umurzakov qarşı aldı.

İlbaşı urınbasarı Fuat Oktay  28nçe iyün’dä Taşkentta Üzbäkstan Däwlät başlığı Şavkat Mirziyoyev belän küreşte. Söyläşü waqıtında ike il Däwlät başlıqlarınıñ bıyıl yasayaçaq ike yaqlı säfärläreneñ kön tärtibendäge mäs’äläläre quzğatıldı. 2nçe Törkiyä-Üzbäkstan Yuğarı däräcäle strategik xezmättäşlek şurası cıyılışınıñ Üzbäkstanda İlbaşı Räcäp Tayyip Ärdoğan qatnaşuında ütkärelüe planlaştırıla.

Üzbäkstan İlbaşı Şavkat Mirziyoyevneñ isä  Törki Kiñäşmä sammitında qatnaşu öçen Törkiyägä kilüe kötelä.

Soñınnan Oktay häm Umurzakov räislegendä 6nçı Törkiyä-Üzbäkstan xökümätlärara qatnaş iq’tisadi komissiya cıyılışı ütkärelde. Cıyılış axırında taraflarnıñ 58 mäs’älädä kileşügä ireşelüe belderelde.

Säfär qısalarında Taşkentta 250 êşmäkär qatnaşuında Üzbäkstan-Törkiyä êş forumı oyıştırıldı. Fuat Oktay häm Sardor Umurzakov qatnaşqan forumda 679 million dollar külämendä 25 kileşü imzalandı.

Fuat Oktay Üzbäkstandağı törek êşmäkärläre belän dä oçraştı häm alarnıñ problemaların tıñladı. İlbaşı urınbasarı  Sämärqand, Boxara şähärlären qarağannan soñ Törkiyägä qayttı.

İke il Däwlät başlıqları tarafınnan  2019nçı yılda maqsat itep bilgelängän 5 milliard dollarlıq säwdä külämenä 2022nçe yılda ireşelüe küzdä totıla. Soñğı 1 yıl yarım waqıtta Üzbäkstanda 500dän kübräk törek şirkäte tözelde. İslam Kärimov çorında törle säbäplär belän qayber keşelär tarafınnan konfiskaśiyälängän törek şirkätläreneñ milege kire qaytarıla. Törkiyä bankları Üzbäkstanda bülekçälären, filialların aça.

Törkiyä säwdä ministrı  aprel’ ayında Üzbäkstanda oçraşular ütkärde. 7nçe martta Sämärqandta Törkiyä baş konsullığı räsmi räweştä açıldı. May ayında Üzbäkstannıñ Antaliya maqtawlı konsulı bilgelände. İke yaqlı oçqıç säfärläre  İstanbuldan Üzbäkstannıñ sigez şähärenä başqarıla başlandı.

Uzğan atnada Saqlanu ministrı Hulusi Akar  Üzbäkstanğa säfär yasağan, Törkiyä häm Üzbäkstan saqlanu ministrlıqları arasında Xärbi finans xezmättäşlek kileşüe häm Aqçalata yärdämne tormışqa aşıru protokolına qul quyılğan ide. Mirziyoyev  şuşı kileşüne uzğan mart ayında rasladı. 23nçe-27nçe mart könnärendä Tirmizdä Üzbäkstan-Törkiyä urtaq xärbi künegüläre ütkärelde. Yaqın kiläçäktä ike il arasında saqlanu sänäğäte êşlänmäläreneñ urtaq citeşterelüe kön tärtibenä kilergä mömkin.

Törki Kiñäşmägä quşılğan Üzbäkstan  uzğan atnalarda TürkPAğa keräçägen belderde. Annan soñ Üzbäkstannıñ TÜRKSOYğa kerüe dä iñ qısqa waqıtta tormışqa aşaçaq. 24nçe iyündä Üzbäkstanda uzdırılğan Törki Kiñäşmägä äğ’za däwlätlärneñ 6nçı Turizm ministrları cıyılışında  Hokand şähäre  törki dönyanıñ turizm başqalası itep iğ’lan itelde.

Qısqaça äytsäk, Törkiyä-Üzbäkstan mönäsäbätläre iñ näticäle çorın yäşi. Törkiyä häm Üzbäkstan mönäsäbätläreneñ yuğarı däräcädä buluı  törki dönya mönäsäbätläreneñ dä üseş aluı mäğ’näsenä turı kilä.

Abdrasul İsakov



Bäyläneşle xäbärlär